ⅩⅣ
Ogokwa kwa Yohana Omobatisi
(Mar 6:14-29; Luk 9:7-9)
Ⅰ Ekero keria Herode omorwoti o Galili akaigwa chinkuma igoro ya Yeso;
Ⅱ agateebia abasomba baye, “Oyo nere Yohana Omobatisi, obokiigwe korwa ase abakuure, eke nakio gekogera chinguru echio chigokora emeremo asare.”
Ⅲ Inaki Herode konya obwatire Yohana, omosibire, omobekire echela ase engencho ya Herodia, moka Filipo, momura omwabo,
Ⅳ ekiagera Yohana amotebetie, “Teri boronge ase ore komenyana nere.”
Ⅴ Goika akarigia komoita, korende akairoka abanto, ekiagera konya banchire ng’a Yohana n’omobani orenge.
Ⅵ Rigachia goika rituko ri’okoinyora okoiborwa kwaye Herode, omoiseke bwe Herodia agatenga gati‐gati y’ abanto, akagokia Herode.
Ⅶ Erio Herode agatiana ase okomoriera eira ng’a namoe kende gionsi araborie.
Ⅷ Kobwatekana n’obosemia bwa ng’ina omoiseke oria agateeba, “Ing’a omotwe o Yohana Omobatisi aiga ase esani.”
Ⅸ Omorwoti agaichana, korende ase engencho ye chiira chiaye na abageni baye ase omoyega, agachiika ayoegwe.
Ⅹ Agatoma omonto ase echela ime anache Yohana omotwe.
Ⅺ Omotwe oye okarentwa ase esani, okaegwa omoiseke oria, na ere akayoira ase ng’ina.
Ⅻ Aborokigwa baye bagachia bakabogoria omobere, bakayotindeka, bakagenda, bagateebia Yeso amang’ana ayio.
Okoragerigwa kw’ abanto chilifu isano
(Mar 6:30-44; Luk 9:10-17; Yoh 6:1-13)
ⅩⅢ Bono ekero Yeso achia koigwa aya, akarua agwo nobwato, akagenda ere bweka aase abanto batari. Korende ekero emeganda yachia koigwa aya, bakamotunyana namagoro korwa ase emechie.
ⅩⅣ Ekero Yeso aikire engegu, akarora omoganda omonene, akabarorera amaabera, akagwenia abarwaire babo.
ⅩⅤ Ekero riachia koba mogoroba, aborokigwa baye bakamochiera, bakaboora, “Aase aa negesomo, ngochia koira bore, batige abanto bagende ebinyoro begorere endagera.”
ⅩⅥ Yeso akabora, “Tibagwenereti kogenda; inwe bae endagera barie.”
ⅩⅦ Barabwo bakamoteebia, “Titobwati gento aiga, otatiga emegati etano ne chinswe ibere.”
ⅩⅧ Akabora, “Bindetere aiga.”
ⅩⅨ Agachiika emeganda eikaranse inse ase obonyansi; akabogoria emegati eria etano ne chinswe chiria ibere, akarigereria igoro, akabisesenia, agasamunyora emegati, akaa aborokigwa emegati eria, na aborokigwa bakayea emeganda.
ⅩⅩ Bakaria bonsi, bakaigota. Bagasangereria ebisamunye bi’emegati ebiatigarete, ebitonga ikomi na bibere biichire.
ⅩⅪ Na abwo bariete nigo barenge abasacha ange chilifu isano (5,000), otatiga abakungu na abana.
Yeso ogotaara enyancha igoro
(Mar 6:45-52; Yoh 6:16-21)
ⅩⅫ Erio agachiika aborokigwa baye bariine obwato, bamotang’anere kogenda ng’umbu ende, goika akaa emeganda ribaga egende.
ⅩⅩⅢ Na nyuma kaeire emeganda ribaga kogenda, akariina ebitunwa igoro ere bweka gochia gosaba. Riachia koba mogoroba akaba agwo bweka.
ⅩⅩⅣ Korende obwato konya bwaikire enyancha gati bokorunda‐rundigwa nemerindo, ekiagera omwaga nigo obatangete.
ⅩⅩⅤ Na ekero kiabotuko ange gokiamoka, Yeso agacha ase bare, ogotaara ase enyancha igoro.
ⅩⅩⅥ Korende ekero aborokigwa bachia komorora ogotaara ase enyancha igoro, bakaondoka, bakaboora, “Eri nerirengari!” Bagaaka eriogi ase okoiroka.
ⅩⅩⅦ Erio kegima Yeso agakwana nabarabwo, akabora, “Remia chinkoro! Ninche. Timoiroka!”
ⅩⅩⅧ Petero akamoiraneria, “Omonene, onye naye, ’nchiike nchiche agwo ase ore igoro ase amaache.”
ⅩⅩⅨ Akamoteebia, “Inchuo!” Petero agaika korwa ase obwato, agataara igoro ase amaache, gochia ase Yeso.
ⅩⅩⅩ Korende ekero achia korora omwaga bw’echinguru, akairoka, agachaaka korimera amaache ime, agaaka eriogi, agateeba, “Omonene ntooria!”
ⅩⅩⅪ Erio kegima Yeso akarambora okoboko kwaye, akamobwata akamoteebia, “Aye omonto bw’okwegena ogoke, nase ki okwoboa?”
ⅩⅩⅫ Ekero bachia koriina obwato ime, omwaga ogakira.
ⅩⅩⅩⅢ N’abwo abarenge ase obwato ime bakamosasiima, bagateeba, “Ekeene, aye n’Omwana o Nyasae.”
Abanto ba Genesareti bakogwenigwa
(Mar 6:53-56)
ⅩⅩⅩⅣ Ekero bambokire, bagaika ense ya Genesareti.
ⅩⅩⅩⅤ Ekero abanto b’orogongo roria bachia komomanya, bagatoma amang’ana ase chinsemo chionsi, bamorentere bonsi abarenge abarwaire;
ⅩⅩⅩⅥ bakamosorora ng’a abae ribaga bakune nonya nomokoba bw’eyanga yaye; na bonsi abayokunete bakagwenigwa.