ⅩⅤ
Amorokererio y’abagaaka
(Mar 7:1-23)
Ⅰ Ekero ekio Abafarisai na aborokia b’amariiko bakarwa Yerusalemu, bagachiera Yeso, bakamoboria,
Ⅱ “Nase ki aborokigwa bao bagosaria chingencho chi’abagaaka? Inaki kobakoragera tibari goisaaba amaboko abo buna egwenerete.”
Ⅲ Akabairaneria, Nase ki inwe mogosaria ogochika kwa Nyasae ase chingencho chiaino?
Ⅳ Inaki Nyasae nigo achiigete, agateeba: Sika iso na nyoko, na: Oyorakwane bobe ase ise, gose ase ng’ina, ogokwa nakwe.
Ⅴ Korende inwe moteba: Oyoratebie ise gose ng’ina: Bionsi ebi anga kwanyora korwa ase ’nde biaeirwe Nyasae, ere temogwenereti gosika ise.
Ⅵ Ase chingencho chiaino chia kare nigo mogosaria ring’ana ria Nyasae.
Ⅶ Inwe abang’ainereria! Mbuya Isaya abanete igoro ase more, ekero ateebete:
Ⅷ Abanto aba nigo bansigete ase ebikoba biabo igoro,
korende chinkoro chiabo nigo chire aare korwa ase ’nde.
Ⅸ Abwo nigo bagonsasiima ogosasiima kwa bosa
kobakworokereria amorokererio ayare amachiiko a Mwanyabaanto oka.
Ⅹ Akarangeria abanto bache asare, akabateebia, “Igwa na manya:
Ⅺ Tari ekio kegosoa omonwa gekobekera omonto ogotacheneka, korende egekorwa ase omonwa nakio ekio gekobekera omonto ogotacheneka.”
Ⅻ Ekero ekio aborokigwa baye bagaacha, bakamoboria, “Inee! Kwamanyire ng’a Abafarisai, ekero baigwete ring’ana riria, mbagechetigwe?”
ⅩⅢ Akairaneria, “Kera ekemeri getasimekiri na Tata one ore igoro ngesimorwe.
ⅩⅣ Batige; barabwo nabaraai emeuko. Omouko oise koraa omouko onde, nigo baragwe ase engoro bonsi babere.”
ⅩⅤ Korende Petero akamoteebia, “Totebererie omobayeeno oyio.”
ⅩⅥ Akabora, “Inee! Nonya mbono nainwe timori nobong’aini?
ⅩⅦ Timomanyeti ng’a kende gionsi kegosoa ase omonwa nigo kegoeta enda, kiagwa kebara?
ⅩⅧ Korende ebikorwa ase omonwa nigo bikorwa ase enkoro; nabio bikobekera omonto ogotacheneka.
ⅩⅨ Inaki ase enkoro nao bikorwa ebirengerio ebibe, oboiti, obotomani, obonyaka, oboibi, amang’ana y’oborimo, na okorama.
ⅩⅩ Ayio naro akobekera omonto ogotacheneka korende okoria namaboko ataisaabiri tikori kobekera omonto ogotacheneka.”
Okwegena kw’omokuungu bw’Ebisaku
(Mar 7:24-30)
ⅩⅪ Yeso akarua aroro, akagenda chinsemo chia Turo na Sidoni.
ⅩⅫ Na rora, omokungu o Kaanani korwa ase ensemo eria akaoroka, agakaa eriogi, akabora, “Omonene, omwana o Daudi, indorere amaabera; enyaroka y’ane yachandirwe mono nekerecha.”
ⅩⅩⅢ Korende tamoiraneria ing’ana. Aborokigwa baye bagaacha, bakamosorora, bakaboora, “Mokanie, agende, ekiagera akona‐gototunyana ogotoakera eriogi.”
ⅩⅩⅣ Akairaneria, “Nigo natometwe ase ching’ondi chinsiru chi’enyomba ya Israeli chioka.”
ⅩⅩⅤ Korende omokungu oria akamochiera agatugama inse ase are, akabora, “Omonene, nkonya.”
ⅩⅩⅥ Yeso akairaneria, “Tari buya kobogoria endagera y’abana na koyerutera chisese.”
ⅩⅩⅦ Omokungu oria akabora, “Ee, Omonene, korende nonya ne chisese nkoria chire amatori ayakogwa korwa ase chimesa chi’abanene babo.”
ⅩⅩⅧ Erio Yeso akamoiraneria, “Aye omong’ina, okwegena kwao nokonene! Tiga abe buna oganetie.” Na ekero ekio enyaroka yaye ekagwenigwa.
Abange bakogwenigwa
(Mar 7:31-37)
ⅩⅩⅨ Yeso akarua aroro akagenderera, agacha ensemo y’enyancha ya Galili, akariina ebitunwa igoro, agaikaransa aroro.
ⅩⅩⅩ Emeganda emenge ekamochiera, ekarenta amagata, na ebirema, na emeuko, na amamama, na abande abange, bakababeeka ase amagoro a Yeso, na ere akabagwenia.
ⅩⅩⅪ Goika emeganda egakumia ekero bachia korora abarenge amamama bagokwana, abarenge ebirema babeire buya, abarenge amagata bakogenda, na abarenge emeuko bakorora; bakamotogia Nyasae bw’Abaisraeli.
Okoragerigwa kw’ abanto chilifu inye
(Mar 8:1-10)
ⅩⅩⅫ Erio Yeso akarangeria aborokigwa baye bache asare, akabora, “Inche naroreire emeganda amaabera, ekiagera babeire amo nainche amatuko atato, batari nendagera; na tindigeti kobatiga bagende nenchara, baabaise kogoya inchera.”
ⅩⅩⅩⅢ Aborokigwa baye bakamoteebia, “Aa nerooro, ng’ai toranyore emegati emenge eraisane abanto abange buna aba baigote?”
ⅩⅩⅩⅣ Yeso akababoria, “Emegati nerenga mobwate?” Bakamoiraneria, “Netano na ebere, ne chinswe chinsinini nke igo.”
ⅩⅩⅩⅤ Agachiika omoganda oikaranse inse.
ⅩⅩⅩⅥ Akabogoria emegati eria etano n’ebere, ne chinswe chiria. Ekero airaneirie ng’a mbuya mono, akabisamunyora, akaa aborokigwa, na barabwo bakayea emeganda eria.
ⅩⅩⅩⅦ Bakaria bonsi, bakaigota; bagasangereria ebisamunye bi’emegati ebiatigarete, ebitonga bitano na bibere biichire.
ⅩⅩⅩⅧ Na abwo bariete nigo barenge abasacha chilifu inye, otatiga abakungu na abana.
ⅩⅩⅩⅨ Erio Yeso gatigire emeganda egende, akariina obwato ime, akagenda chinsemo chia Magadani.