ⅩⅩⅥ
Yeso okoboerwa aitwe
(Mar 14:1-2; Luk 22:1-2)
Ⅰ Ekero Yeso akoorire gokwana amang’ana aya onsi, agateebia aborokigwa baye,
Ⅱ “Mwamanyire ng’a magega y’amatuko abere n’ebe Epasaka, na Omwana-o-Mwanyabaanto naruegwe kobambwa.”
Ⅲ Erio abakuani abanene n’etureti y’ abanto bagasangererekana ase egoora y’Omokuani omonene oyore korokwa Kayafa;
Ⅳ erio bakaigwana bagakora omoroberio banyare komobwata Yeso bobisi, na komoita.
Ⅴ Korende bakaboora, “Taba ase rituko rinene, tiribaisa goocha koba rirorooche ase abanto.”
Yeso ogoakwa amaguta agwo Bethania
(Mar 14:3-9; Yoh 12:1-8)
Ⅵ Na Yeso, ekero arenge Bethania ase enyomba ya Simioni, oyorenge noborwaire bwa ukoma,
Ⅶ agaacherwa n’omokuungu orenge nechuba ye rigena rirabu ere namaguta ye rigori rinene ne rimisu rigiya; gaikaransete ase endagera, akamonyororokeria ase omotwe oye.
Ⅷ Korende ekero aborokigwa baye bachia korora aya, bakagechigwa, bakaboora, “Nobwa ki obosiru obo:
Ⅸ Inaki amaguta aya anga taonigwa ase chisiringi chinyinge na chiegwe abataka?”
Ⅹ Yeso, konya omanyire aya, akabateebia, “Nase ki mokorosia omokungu oyo? Ere onkoreire emeremo emiya,
Ⅺ ekiagera amatuko onsi nigo more nabataka amo nainwe, korende timori nainche amatuko onsi.
Ⅻ Buna anyororokeria amaguta aya ase omobere one, onkoreire aya ase okombeeka ang’e ase ogotindekwa kwane.
ⅩⅢ Nekeene nabateebirie: Kera aase enchiri eye erarandigwe ase ense yonsi, neri akora oyo nariatorwe ase okomoinyora.”
Yudasi ogwancherana korwa Yeso
(Mar 14:10-11; Luk 22:3-6)
ⅩⅣ Na ekero ekio oyomo bwa baria ikomi na babere, nere, oyokorokwa Yudasi Iskariota, agachiera abakuani abanene,
ⅩⅤ akababoria, “Inki morang’e onye nkorua Yeso ase more?” Bakamoa chitaabu chi’echifeta emerongo etato.
ⅩⅥ Korwa ekero ekio akaba nkorigia are ribaga ri’okomorua.
Yeso okoria Endagera y’omoerio y’Epasaka amo n’aborokigwa baye
(Mar 14:12-26; Luk 22:7-23; Yoh 13:21-30; 1 Abakr 11:23-25)
ⅩⅦ Ase rituko rie ritang’ani ri’Emegati etabekiri memera aborokigwa bagachiera Yeso, bakamobooria, “Ng’ai origetie tokoroisie oriere Epasaka?”
ⅩⅧ Akabairaneria, “Genda ase omochie ase omonto gete, momoteebie: Omworokia oteebire: Engaki y’ane yaikire ang’e; nyomba mwao nao ndariere Epasaka amo naborokigwa bane.”
ⅩⅨ Aborokigwa bagakora buna bachiigetwe na Yeso, bakaarigania Epasaka.
ⅩⅩ Riachia koba mogoroba, agaikaransa ase endagera, amo naborokigwa baria ikomi na babere.
ⅩⅪ Kobaikaransire koragera, akabora, “Nekeene nabateebirie: oyomo oino nandue.”
ⅩⅫ Bagaichana mono, bagachaaka kera oyomo komoboria, “Inee! Omonene, ninche?”
ⅩⅩⅢ Akairaneria, “Oyo ogotobeka okoboko kwaye amo nainche ase esani, oyio nere orandue.
ⅩⅩⅣ Omwana-o-Mwanyabaanto nkogenda are buna amariiko agoteeba, korende obobe nobwaye omonto oria, Omwana-o-Mwanyabaanto arurwe nere! Nigo ere buya kobua asare omonto oria, nonya ataiboretwe.”
ⅩⅩⅤ Yudasi, nere oyokomorua, akamobooria, “Inee! Omonene, ninche? Akamoiraneria: Naboigo. Aye gwateebire.”
ⅩⅩⅥ Kobakoragera, Yeso akabogoria omogati, akayosesenia, akayosamunyora, akaa aborokigwa, akabora, “Bogoria, morie; oyo noro omobere one.”
ⅩⅩⅦ Akabogoria na egekombe, na ekero airaneirie ng’a mbuya mono, akabaa, akabora, “Kanywe aya inwe mwensi,
ⅩⅩⅧ naki aya naro amanyinga aane y’okobwatana okoyia, aitekire ase engencho y’abange ase okwaberwa kw’ebibe.
ⅩⅩⅨ Nabateebirie, tinkonywa naende okwama oko kw’emesabibu goika rituko riria ndache gokonywa oboyia amo nainwe ase oborwoti bwa Tata.”
ⅩⅩⅩ Kobakoorire goteera Ogoteera, bagasoka kogenda egetunwa ki’Emezeituni.
Yeso okobana buna Petero agocha komokana
(Mar 14:27-31; Luk 22:31-34; Yoh 13:36-38)
ⅩⅩⅪ Erio Yeso akabateebia, “Ase obotuko bwa reero inwe mwensi inamogochwe ase engencho y’ane na gontiga; naki nariikire: Ning’ake omorisia, ne ching’ondi chie riicho inachiserebekane.
ⅩⅩⅫ Korende magega y’okobooka kwane nimbatang’anere kogenda Galili.”
ⅩⅩⅩⅢ Petero akamoteebia, “Neba inabagochwe bonsi ase engencho yao na bagotige, inche tinkogochwa na kogotiga nonya ng’ake.”
ⅩⅩⅩⅣ Yeso akamoteebia, “Ekeene nagoteebirie: Ase obotuko obo, ekero etuoni etarabuga, nonkane ara gatato.”
ⅩⅩⅩⅤ Petero akamoteebia, “Nimba ngokwa amo naye, tinkogokana nonya ng’ake.” Na aborokigwa bonsi bagateeba boigo.
Yeso ogosaba Gethisemane
(Mar 14:32-42; Luk 22:39-46)
ⅩⅩⅩⅥ Naende Yeso akagenda nabarabwo goika aase akorokwa Gethisemane, agateebia aborokigwa baye, “Ikaransa aa ekero nkogenda aria gosaba.”
ⅩⅩⅩⅦ Akaira Petero na abana baria ba Zebedi babere, agachaaka goichana na gwechanda mono.
ⅩⅩⅩⅧ Erio akabateebia, “Omoyo one nore nobororo obonge, nonya ngoika ogokwa; ikaransa aa, morende amo nainche.”
ⅩⅩⅩⅨ Akagenderera ake, akagwa maumama, agasaba, “Tata one, onye ekonyarekana, tiga egekombe eke kerusigwe ase ’nde; korende taba buna nyanchete inche, korende buna bwanchete aye.”
ⅩⅬ Agachiera aborokigwa baria, akabanyora bararire, agateebia Petero, “Inee! Iga timokonyara korenda amo nainche nonya nensa eyemo?
ⅩⅬⅠ Renda, mosabe, timobaisa gosoa ase ogoteemwa; omoika oro nore nogwancha, korende omobere tori ne chinguru.”
ⅩⅬⅡ Naende akagenda eria kabere, agasaba, “Tata one, onye tekonyarekana egekombe eke keng’etere ntakenywereti, abe buna bwanchete aye.”
ⅩⅬⅢ Agacha naende, akabanyora bararire; ekiagera amaiso abo abeire amarito.
ⅩⅬⅣ Erio Yeso akabatiga naende, akagenda, agasaba eria gatato agakwana amang’ana aria amatang’ani.
ⅩⅬⅤ Erio agachiera aborokigwa baria, akabateebia, “Nonya mbono nigo moraire na gotimoka? Rora ensa yaikire, na Omwana-o-Mwanyabaanto obekirwe ase amaboko y’abanyene ebibe.
ⅩⅬⅥ Imoka, togende, rora, ere oyokondua oikire ang’e.”
Okobwatwa kwa Yeso
(Mar 14:43-50; Luk 22:47-53; Yoh 18:2-11)
ⅩⅬⅦ Ekero arenge gokwana, Yudasi, oyomo bwa baria ikomi na babere, agacha, na omoganda omonene amo nere bare nemioro ne chinungu, bakorwa ase abakuani abanene n’etureti y’ abanto.
ⅩⅬⅧ Ere oyokomorua, konya obaeire ekemanyererio, agateeba, “Oyo ndanyunyunte, oyio nere, momobwate.”
ⅩⅬⅨ Erio kegima agachiera Yeso, agateeba, “omorembe obe naye, Omonene!” Akamonyunyunta.
Ⅼ Yeso akamoteebia, “Mosani, kora bwango eki giakoreta aa?” Erio bagaacha, bakamobwata Yeso, bakamoira.
ⅬⅠ Na rora, oyomo obo bw’abarenge amo na Yeso akarambora okoboko kwaye, akang’usa omoyio oye o birende, agaaka omosomba bw’Omokuani omonene, akamobutora ogoto.
ⅬⅡ Erio Yeso akamoteebia, “Irania omoyio oo o birende aase aye, ekiagera bonsi abakoimokia omoyio o birende inabasire ase omoyio o birende.
ⅬⅢ Gose tomanyeti ng’a ninyare gosaba Tata, na ere nantomere abamalaika kobua emeganda ikomi na ebere?
ⅬⅣ Korende naki rende nanga amariiko aikeranigwa, ng’a nabo egwenerete koba?”
ⅬⅤ Ensa eria Yeso agateebia emeganda y’ abanto, “Inee! Igo mwachire buna abamokoumokera omouri nemioro ne chinungu gocha kong’ira? Kera rituko naikaransete amo nainwe ime ase Hekalu ase okworokereria, ko timwambwata.
ⅬⅥ Korende aya onsi abeire, erinde amariiko y’ababani aikeranigwe.” Erio aborokigwa bonsi bakamotiga, bagatama.
Yeso bosio bw’etureti
(Mar 14:53-65; Luk 22:54-55,63-71; Yoh 18:12-14,19-24)
ⅬⅦ Baria babwatete Yeso bakamoira ase enyomba ya Kayafa Omokuani omonene, aase aborokia b’amariiko na abagaaka basangererekanete.
ⅬⅧ Na Petero akamotunyana korwa magega ore egeka, goika ase egoora y’Omokuani omonene, agasoa ime, agaikaransa amo nabarendi, erinde arore eki gekoba omoerio.
ⅬⅨ Erio abakuani abanene na ab’ekegaambero bonsi bakarigia amang’ana y’oborimo y’ogosoera Yeso, banyare komoita;
ⅬⅩ korende nonya abarori abange b’oborimo bachete, tibayanyora. Omoerio abarori babere bagaacha,
ⅬⅪ bakaboora, “Omonto oyo nigo ateebete: Ninyare gotagora Hekalu ya Nyasae, na koyeagaacha ase amatuko atato.”
ⅬⅫ Erio Omokuani omonene agatenena akamobooria Yeso, “Tokoiraneria ing’ana? Inki aba bakogosoera?”
ⅬⅩⅢ Korende Yeso agakira. Na Omokuani omonene akamoteebia, “Nagotianirie ase Nyasae ore moyo, ototeebie gose naye Kristo, Omwana o Nyasae.”
ⅬⅩⅣ Yeso akamoteebia, “Naboigo aye gwateebire, korende nabateebirie inwe, korwa bono inamorore Omwana-o-Mwanyabaanto oikaransete ensemo y’okoboko gw’okorio kw’Oyore nokobua, ogocha ase amare a igoro.”
ⅬⅩⅤ Erio Omokuani omonene agatandora chianga chiaye, akabora, “Oramire Nyasae; abarori naba ki tokorigia? Mwaigure emerumi yaye akorama.
ⅬⅩⅥ Inaki morooche?” Bakairaneria, “Omonto oyo nigo agwenerete akwe.”
ⅬⅩⅦ Erio agwo bakamotwera amate obosio, bakamoaka chinkundi; abande bakamoaka chindoe,
ⅬⅩⅧ bakobora, “Kristo, tobanere! Ning’o ogoaka?”
Petero okomokana Yeso
(Mar 14:66-72; Luk 22:56-62; Yoh 18:15-18,25-27)
ⅬⅩⅨ Bono Petero nigo aikaransete egoora isiko. Omoiseke oyomo omosomba bw’Omokuani omonene akamochiera, akabora, “Aye naye kwarenge amo na Yeso Omogalili.”
ⅬⅩⅩ Korende ere agakaana ase amasio abo bonsi, akabora “Timanyeti ayio ogokwana.”
ⅬⅩⅪ Ekero achia gosoka gesieri, omoiseke onde akamorora, agateebia abarengeo, “Omonto oyo nigo arenge amo na Yeso, Omonazareti.”
ⅬⅩⅫ Agakaana naende, na gotiana, “Inche timomanyeti omonto oyio.”
ⅬⅩⅩⅢ Magega ase egeka egeke abateneine aroro bagaacha, bagateebia Petero, “Ekeene bori, naye noyomo obo ore, ekiagera ogokwana kwao gwakoorokirie.”
ⅬⅩⅩⅣ Erio agachaaka kweragereria na gotiana, okobora, “Inche timomanyeti omonto oyio.” Agwo kegima etuoni ekabuga.
ⅬⅩⅩⅤ Erio Petero akainyora ring’ana riria Yeso ateebete, “Ritang’ani etuoni etarabuga, nonkane ara gatato.” Agasoka isiko, akarera nobororo.