ⅩⅩⅦ
Yeso okoirwa ase Pilato
(Mar 15:1; Luk 23:1-2; Yoh 18:28-32)
Ⅰ Bogachia gokia mambia, abakuani abanene bonsi na abatureti bagakora omoroberio bw’ogoita Yeso.
Ⅱ Bakamosiba, bakamoira, bakamomoa Pilato, oyorenge gabana o Rumi.
Ogokwa kwa Yudasi
Ⅲ Ekero Yudasi, oria omoruete achia korora ng’a onacheirwe ekiina, ageitia, akairania chitaabu chiria chi’echifeta emerongo etato ase abakuani abanene na abagaaka,
Ⅳ okobora, “Namochire ase okorua omonto otari na bobe bonde aitwe.” Barabwo bakaboora, “Ninki aya are ase tore? Echio n’echigurube chiao!”
Ⅴ Yudasi agatuguta chitaabu chiria chi’echifeta ase Hekalu ime, akaimoka, akagenda akeng’enta.
Ⅵ Korende abakuani abanene bakaimokia chitaabu chiria chi’echifeta bakaboora, “Tari boronge gochibeeka ase ekungo y’esadaka ya Nyasae, ekiagera chirochio nechie rigori ri’amanyinga.”
Ⅶ Bakanacha ekiina giokogora omogondo bw’omokori chinyongo, obe aase bagotindeka abageni.
Ⅷ Ase ayio omogondo oyo nigo okorokwa Omogondo bw’Amanyinga goika reero.
Ⅸ Erio rigaikeranigwa eriatebetwe nomobani Yeremia, ogoteeba, “Bakaimokia chitaabu chiria chi’echifeta emerongo etato, rigori riaye oria obegetwe rigori n’abanto bande b’Abaisraeli,
Ⅹ bagachiira ase okogora omogondo bw’omokori chinyongo, buna Omonene achigeete.”
Pilato okoboria Yeso amaborio
(Mar 15:2-15; Luk 23:3-5,13-25; Yoh 18:33—19:16)
Ⅺ Nere Yeso agatenena ase gabana bw’Abarumi; oyio omobooretie, “Naye Omorwoti bw’Abayahudi?” Yeso akamoteebia, “Naboigo, aye gwateebire.”
Ⅻ Korende ekero Abakuani abanene na abagaaka bamosoerete, tairaneria ing’ana rinde.
ⅩⅢ Erio Pilato akamoteebia, “Toigweti amang’ana aya amange bakona‐goteeba igoro yao?”
ⅩⅣ Korende ere tairaneria rinde, nonya nase ring’ana erimo, na gabana agakumia mono.
ⅩⅤ Bono ekero kie rituko rinene nigo yarenge engencho ya gabana gosiborera Abayahudi omosibwa oyomo oyo barigetie.
ⅩⅥ Mbabwate omosibwa oyomo omanyekanete, okorokwa Baraba.
ⅩⅦ Erio kobasangererekanire, Pilato akababoria, “Norori morigetie mbasiborere ase abasibwa aba babere Baraba gose Yeso, oyo okorokwa Kristo?”
ⅩⅧ Ekiagera konya omanyire ng’a Abayahudi nigo baruete Yeso ase obogechi.
ⅩⅨ Ekero Pilato aikaransire ase ekerogo gi’ekiina, akarenterwa amang’ana na mok’aye, ogoteeba, “Oyio nomonto omonyene oboronge, tobaisa kwebwatia asare, ekiagera reero inachandetwe namange ase okorota ase engencho yaye.”
ⅩⅩ Bono abakuani abanene na abagaaka bakagenka emeganda ng’a baborie baegwe Baraba, na Yeso bamoite.
ⅩⅪ Korende Pilato akaboria omoganda oria naende, “Ase abanto aba babere, norori morigetie mbasiborere?” Bakamoteebia, “Baraba.”
ⅩⅫ Pilato akababoria, “Imokore naki Yeso, oyo okorokwa Kristo?” Bakamoteebia bonsi, “Tiga abambwe!”
ⅩⅩⅢ Akababoria, “Nase ki? Mbobe ki akorete?” Barabwo bakamenta goaka egeturi, bakobora, “Tiga abambwe!”
ⅩⅩⅣ Ekero Pilato achia korora ng’a gento tikenyarekaneti asare, ne rirorooche rioka rikona‐kobucha, akaimokia amaache, agaisaba amaboko aye ase obosio bw’omoganda, ogoteeba, “Inche tindi na komocha ase amanyinga y’omonto oyo omonyene oboronge. Niigoro yaino abanyene.”
ⅩⅩⅤ Abanto bonsi bakairaneria, “Amanyinga aye, tiga abe igoro ase tore, na ase abana baito!”
ⅩⅩⅥ Erio akabasiborera Baraba, na magega gaakire Yeso emecharichi, akabamotigera anyare kobambwa.
Abasikari bagochecheria Yeso
(Mar 15:16-32; Luk 23:26-43; Yoh 19:17-27)
ⅩⅩⅦ Erio abarwani ba Pilato bakaira Yeso ime ase enyomba y’egabana, bakamosangererekanera omoganda omogima bw’abarwani.
ⅩⅩⅧ Bakamorusia chianga chiaye, bakamobeekera eyanga embariri.
ⅩⅩⅨ Bagatwang’a egutwa y’amagwa, bakamobeekera motwe, na egetonto bakamobekera ase okoboko kwaye gw’okorio; bagatung’ama asare, bakamochecheria na kobora, “Ochie kare, Omorwoti bw’Abayahudi!”
ⅩⅩⅩ Erio bakamotwera amate, bakaimokia egetonto keria, bakamoaka ase omotwe.
ⅩⅩⅪ Kobamochecheirie, bakamorusia eyanga eria embariri, bakamobeekera chianga chiaye omonyene, bakamoira isiko abambwe.
ⅩⅩⅫ Kobagosoka korwa ase omochie, bakarora omonto oyomo, Omokurene, okorokwa Simioni; erio abasikari bakabetereria omonto oyio abogorerie Yeso omosalaba.
ⅩⅩⅩⅢ Bagachia goika aase akorokwa Gologotha (engencho yaye: Aase Ekeore),
ⅩⅩⅩⅣ bakamoa edivai esang’anirie egento ekeroro, anywe; Agachia koyeigwa, tancha konywa.
ⅩⅩⅩⅤ Kobamobambire bagakora obomera, bagaatanana chianga chiaye.
ⅩⅩⅩⅥ Erio bagaikaransa komorigereria aria.
ⅩⅩⅩⅦ Igoro ase omotwe oye bakabeeka ogosoerwa kwaye, koriikire, “OYO NERE YESO, OMORWOTI BW’ABAYAHUDI”.
ⅩⅩⅩⅧ Erio abauri babere bakabambwa amo nere, oyomo ensemo y’okoboko kwaye gw’okorio, na oyomo ensemo y’okoboko kwaye gw’okobee.
ⅩⅩⅩⅨ Na barabwo abaare goeta, bakamorama, bagosinga‐singisia emetwe yabo, bakobora,
ⅩⅬ “Aye oyogotagora Hekalu na koyeagaacha ase amatuko atato, etoorie! Onye naye Omwana o Nyasae, ika korwa ase omosalaba.”
ⅩⅬⅠ Na baria abakuani abanene bagakora boigo, bakamokorera echeche amo naborokia b’amariiko na abagaaka, bakobora,
ⅩⅬⅡ “Natooretie abande, ere omonyene takonyara gwetooria. Ere n’Omorwoti bw’Abaisraeli, tiga aike bono korwa ase omosalaba, na intwe rirorio ntomwegene.
ⅩⅬⅢ Nigo asemeretie Nyasae, tiga Nyasae amotoorie bono, onye omoganetie, ekiagera nateebete: Inche n’Omwana o Nyasae.”
ⅩⅬⅣ Na baria abauri, abaabambetwe amo nere, bakamorama boigo.
Ogokwa kwa Yeso
(Mar 15:33-41; Luk 23:44-49; Yoh 19:28-30)
ⅩⅬⅤ Bono korwa chinsa isano nemo omosunte okaba igoro ase ense yonsi goika chinsa kianda.
ⅩⅬⅥ Chiachia koba ang’e chinsa kianda, Yeso, akarera neriogi rinene, akabora, “Eloi, Eloi, lama sabakitani?” Okoonchorwa kwaye, “Nyasae one, Nyasae one, naki gwantigire?”
ⅩⅬⅦ Na abande b’abwo bateneine aroro, bakayaigwa, bakaboora, “Omonto oyo n’Elija akorangeria.”
ⅩⅬⅧ Erio kegima oyomo obo akaimokia esifunchi, akayeichoria chinkama, akayebeeka ase egetonto, akamoa anywe.
ⅩⅬⅨ Korende baria abande bakaboora, “Tiga torore gose Elija ngocha are komotooria.”
Ⅼ Yeso akarera naende neriogi rinene, erio agatweka mo.
ⅬⅠ Na rora, egetambaa gi’okonacha Hekalu kegatandoka korwa igoro goika inse, gekaba bibere, ense egatengecha, ebitare bigatandoka.
ⅬⅡ Chimbeera chikamaanoka chigaasama, na abanto abange abachenu konya bakuure bakabokigwa.
ⅬⅢ Kabaruure ase chimbeera, magega y’okoboka kwa Yeso bagasoa ase omochie omochenu agwo ase abanto abange babaroche.
ⅬⅣ Na ekero omotang’ani bw’abarwani rigana, na abwo barenge amo nere korenda Yeso, bachia korora omotengecho bw’ense na ebiakorekire, bakairoka mono, bakaboora, “Ekeene, oyo nigo arenge Omwana o Nyasae!”
ⅬⅤ Mbarengeo boigo abakungu abange, barigereretie korwa are, abatunyanete Yeso korwa Galili, bakomokorera.
ⅬⅥ Ase abwo nigo barenge Mariamu Magadalena, na Mariamu ng’ina Yakobo na Yusufu, na ng’ina ’abana ba Zebedi.
Ogotindekwa kwa Yeso
(Mar 15:42-47; Luk 23:50-56; Yoh 19:38-42)
ⅬⅦ Riachia koba mogoroba, omonto omonda bw’Arimathaya, okorokwa Yusufu, agacha; ere nomworokigwa o Yeso orenge.
ⅬⅧ Oyio akagenda ase Pilato, akarigia omobere o Yeso. Erio Pilato agachiika ayoegwe.
ⅬⅨ Yusufu akaimokia omobere, akayoboyia egetambaa ekiya ki’egatani,
ⅬⅩ akayobeka ase oboina bwaye oboyia, obwabachete ase egetare; naende agaturunkania rigena rinene gochia ase egesieri ki’oboina, akagenda.
ⅬⅪ Mbarengeo Mariamu Magadalena na Mariamu onde, baikaransete bosio bw’oboina.
Oboina bokorendwa
ⅬⅫ Rituko ria kabere, erio riare rituko ri’Esabato, abakuani abanene na Abafarisai bagasangererekana ase Pilato,
ⅬⅩⅢ bakaboora, “Omonene, twainyoire ng’a omong’ainereria oria nateebete ekero arenge moyo: Magega ase amatuko atato nimboke.
ⅬⅩⅣ Gaki, chiika oboina borendwe buya goika rituko ria gatato, aborokigwa baye tibaabaisa gocha komoiba, bateebie abanto ng’a obokire korwa ase abakuure; oborimo bw’omoerio inabobue boria bw’eritang’ani.”
ⅬⅩⅤ Pilato akabateebia, “More nabarendi; genda morende mono oboina buna moranyaare.”
ⅬⅩⅥ Ase igo bakagenda bakarenda oboina mono ase okobeeka rigena riria ekemanyererio, naende bakabeeka abarendi.