Ⅵ
Okorua ebiegwa kwa bobisi
Ⅰ Mwerende timokora ogokora kwaino okuya ase amasio y’abanto, erinde mororwe nabarabwo, ekiagera komogookora ayio, timori neng’eria ya Iso oino ore igoro.
Ⅱ Gaki gokorua ebiegwa, tobugia engoma, buna baria abang’ainereria bagokora ase chisinagogi na ase chinchera chinene chi’emechie, erinde batogigwe n’abanto. Nekeene nabateebirie ng’a barabwo banyorire eng’eria yabo.
Ⅲ Korende aye, gokorua obokonyi gochia ase omotaka, kora ayio korende, nonya n’omosani oo oime tamanya ayio gwakora,
Ⅳ Obokonyi bwao bonyare koba bobisi; na Iso oo oyokorora bobisi nagoakane.
Amegerio igoro y’ogosaba
Ⅴ Ekero mogosaba, timoba buna baria abang’ainereria; ekiagera barabwo nigo banchete gotenena na gosaba ase chisinagogi na ase amatabekania ye chinchera, banyare kororwa n’abanto. Nekeene nabateebirie ng’a banyorire eng’eria yabo.
Ⅵ Korende aye ekero ogosaba, soa nyomba mwao ime, osieke egesieri, omosabe Iso oo ore bobisi; na Iso oo oyokorora bobisi nagoakane.
Ⅶ Ase ogosaba kwaino timokwana amang’ana amange abosa buna abanto b’Ebisaku; naki barabwo nigo bagokaga ng’a Nyasae nabaigwe ase obonge bw’amang’ana abo.
Ⅷ Gaki timoba omogwekano oyomo nabarabwo, ekiagera Iso oino namanyete aya moganetie, ritang’ani motaramosaba.
Ogosaba kw’Omonene
(Luk 11:2-4)
Ⅸ “Bono inwe nigo mogwenerete gosaba iga:
Tata oito ore igoro,
Erieta riao risikwe.
Ⅹ Oborwoti bwao boche,
Ogwancha kwao gokoreke ense,
Buna kogokoreka igoro.
Ⅺ Otoe intwe reero endagera yaito ya kera rituko.
Ⅻ Otwabere ebibe biaito,
Buna intwe tokobaabera abagotokorera bobe.
ⅩⅢ Totoira ase ogoteemwa,
Korende ototoorie korwa ase oria omobe.
ⅩⅣ Inaki inwe kamoraabere abanto ogosaria kwabo, naboigo na Iso oino ore igoro nabaabere inwe.
ⅩⅤ Korende motaabereti abanto okomocha kwabo, na Iso oino takobaabera okomocha kwaino.
Okweng’ata
ⅩⅥ “Ekero mokweng’ata timokonyiria amasio aino buna abang’ainereria, ekiagera barabwo nigo bakonyiria amasio abo, erinde banyare kororwa n’abanto ng’a mbeng’atete. Nekeene nabateebirie ng’a banyorire eng’eria yabo.
ⅩⅦ Korende aye, gokweng’ata, eake amaguta omotwe oo, bwesibie obosio bwao,
ⅩⅧ erio tobaisa kororwa n’abanto ng’a mbweng’atete, korende ororekane ase Iso oo ore bobisi, na Iso oo oyokorora bobisi nagoakane.
Obotenenku bw’ekeene
(Luk 12:33-34)
ⅩⅨ “Timogacha chinibo chiaino ase ense, aase ebigwankwa na oboboosu bigosaria, na abaibi bagotaagora na koiba;
ⅩⅩ korende mogache chinibo chiaino igoro, aase ebigwankwa na oboboosu bitagosoa, na abaibi batagotaagora na koiba.
ⅩⅪ Ekiagera aase enibo yao ere, nao nenkoro yao ekoba.
Oborabu na omosunte
(Luk 11:34-36)
ⅩⅫ “Etaya y’omobere n’eriiso. Nabo onye eriiso riao rire rigiya, omobere oo bwonsi noichorwe noborabu;
ⅩⅩⅢ korende onye eriiso riao rire riibe, omobere oo bwonsi noichorwe nomosunte. Onye oborabu boria bore ime yao bwabeire omosunte, omosunte oyio nomonene mono.
Gokorera Abanene babere
(Luk 16:13; 12:22-31)
ⅩⅩⅣ “Onde tari oranyare gokorera abanene babere, ekiagera nageche oyomo, na anche oyonde, gose nabwatane noyomo, na achaaye oyonde. Timokonyara gokorera Nyasae na enibo.
ⅩⅩⅤ “Ase ayio nabateebirie ng’a timochandeka igoro y’obogima bwaino, eki morarie, gose eki moranywe, gose ase emebere yaino, eki morabeeke. Inee! Obogima tibori obonene kobua endagera? Na omobere tori omonene kobua chianga?
ⅩⅩⅥ Morigererie chinyoni chia igoro! Chirochio tichiri gosimeka, tichiri kogesa, tichiri gosangereria gochia biage, na Iso oino ore igoro nigo agochirageria. Inee! Inwe timobueti rigori riabo?
ⅩⅩⅦ Ning’o ase more goetera ase ogwechanda kwaye oranyare komenta chingaki ase obogima bwaye?
ⅩⅩⅧ Ne chianga, nase ki mogochiechandera? Morigererie ebisicha bi’orosana buna bigokiina; tibiri gokora emeremo, gose tibiri gwesisa;
ⅩⅩⅨ korende nabateebirie, nonya Sulemani omonyene ase obonene bwaye bwonsi tabegete chianga buna ekemo ki’ebi.
ⅩⅩⅩ Korende onye Nyasae okoboyia obonyansi bw’egetii oboreo reero, na ankio botugutwe ase omorero, Inee, takomenta kobaboyia inwe, abamore nokwegena ogoke?
ⅩⅩⅪ Gaki, timona gwechanda mogoteeba: Ninki torarie? Gose: Ninki toranywe? Gose: Ninki torabeeke?
ⅩⅩⅫ Inaki abanto b’Ebisaku nigo bakorigia ebio bionsi; korende Iso oino ore igoro namanyete ng’a ’moganetie ebinto ebio bionsi.
ⅩⅩⅩⅢ Korende ritang’ani rigia oborwoti bwa Nyasae na oboronge bwaye, na ebinto ebio bionsi ’namobiegwe.
ⅩⅩⅩⅣ “Gaki, timwechandera ay’ankio, ekiagera ankio inariechande rinyene. Kera rituko ndiisaine nogwechanda kwaye.