Ⅶ
Igoro y’okogaambia abande
(Luk 6:37-38,41-42)
Ⅰ “Timogaambia, nainwe timokogaambigwa.
Ⅱ Inaki ekiina mokonacha, nakio morache konacherwa. Na ekerengo keria mokorengera, nakio morache korengerwa.
Ⅲ Inaki okorigereria ekeogoto kere ase eriiso ri’oyomino, na omoriibo ore ase eriiso riao ime toyorochi?
Ⅳ Gose ’naki orateebie oyomino: ’Ntige ’nkorusie ekeogoto kere ase eriiso riao, na rora omoriibo nore ase eriiso riao?
Ⅴ Aye omonga’inereria, rusia ritang’ani omoriibo ore ase eriiso riao, nario orarore buya omanye korusia ekeogoto korwa ase eriiso ri’oyomino.
Ⅵ “Timoa chisese ekere egechenu, gose timoitera chiruru chiaino ase chimbeche, tichicha gochitacha namagoro abo, naende chibaonchokere inwe, chibarie.
Saba, Rigia, Tura
(Luk 11:9-13)
Ⅶ “Saba, ’namoegwe; rigia, ’namonyore; tura, ’namoigorerwe egesieri.
Ⅷ Ekiagera kera oyogosaba nigo akoegwa, na ere oyokorigia nigo akonyora, na ere oyogotura nigo akoigorerwa.
Ⅸ Gose monto onde n’are ase more, na omwana oye amosabe omogati, Inee, namoe rigena?
Ⅹ Gose karamosabe enswe, namoe eng’iti?
Ⅺ Onye inwe, abamore ababe, momanyete koa abana baino ebiegwa ebiya, Inee, Iso oino ore igoro takomenta mono kobaa amaya abwo bakomosaba?
Ogochika okore okuya mono
(Luk 6:31)
Ⅻ “Nabo ande onsi morigetie abanto babakorere inwe, nainwe mobakorere boigo. Ekiagera ayio naro amachiiko na amang’ana y’ababani.
Egesieri Ekegote
(Luk 13:24)
ⅩⅢ “Soa ase egesieri kere ekegote, ekiagera egesieri gekogenda ase obosiru nekegare, na enchera ekogendao nengare, na abagosoa gochiao nabange.
ⅩⅣ Korende egesieri gekogenda ase obogima nekegote, na enchera ekogendao nenyerere, na abakoyenyora nabake.
Omote n’amatunda aye
(Luk 6:43-44)
ⅩⅤ “Mwerende nababani b’oborimo abwo bagocha ase more beboyetie chingobo chi’eching’ondi, na ime yabo nigo bare chisese chi’orosana chintindi mono.
ⅩⅥ Ase amaamo abo ’namobamanye. Inee! Abanto nigo bagotwa amasabibu korwa ase emetobo, gose amako korwa ase amageri?
ⅩⅦ Naboigo kera omote omuya nigo okwama amatunda amaya, na omote omobe nigo okwama amatunda amabe.
ⅩⅧ Omote omuya tokonyara kwama amatunda amabe, na omote omobe tokonyara kwama amatunda amaya.
ⅩⅨ Kera omote otameti amatunda amaya nigo okogechwa, otugutwa ase omorero.
ⅩⅩ Naboigo, momanye ababani b’oborimo ase okwama kwabo.
Amang’ana na ogokora
(Luk 6:46; 13:25-27)
ⅩⅪ “Tari kera omonto ogonteebia: Omonene Nyasae, orasoe ase oborwoti bwa igoro, korende n’oyogokora ogwancha gwa Tata one ore igoro.
ⅩⅫ Ase rituko riria nabange baranteebie: Omonene Nyasae, titware kobana ase erieta riao, na ase erieta riao goseria ebirecha, na ase erieta riao togakora ebikone ebinge bie chinguru?
ⅩⅩⅢ Erio nainche nimbateebie maiso marore abanto baria: Timbamanyeti inwe nonya ng’ake; karue ase ’nde, inwe abakori amabe!
Abaagachi Enyomba babere
(Luk 6:47-49; Mar 1:22)
ⅩⅩⅣ “Kera oyomo oyokoigwa amang’ana aya aane, na koyakora, nagwekanigwe n’omonto orenge omong’aini, oagachete mwaye igoro ase egetare;
ⅩⅩⅤ embura egatwa amo nomwaga, na eooro egaacha, egatwoma enyomba eria, korende tiyagwa, ekiagera oboroso bwaye bwaagachetwe igoro ase egetare.
ⅩⅩⅥ Na kera oyomo oyokoigwa amang’ana aya aane, ko tayakora, nagwekanigwe n’omonto omoriri, oagachete mwaye ase amaroba;
ⅩⅩⅦ embura egatwa amo nomwaga, na eooro egaacha, bigatwoma enyomba eria, ekagwa; okogwa kwaye gokaba okonene.”
Okobua kwa Yeso
ⅩⅩⅧ Ekero Yeso akoorire amang’ana aya, emeganda egakumia ase okworokereria kwaye,
ⅩⅩⅨ ekiagera nigo arenge koborokereria buna oyore nokobua, na tari buna aborokia babo b’amariiko.