Ⅸ
Abanto bagweitia ebibe biabo
Ⅰ Ase rituko ri’emerongo ebere na kane ri’omotienyi oyio, Abaisraeli bonsi bagasangererekana amo, beng’atete na beboyetie chigunia, bageaka ebundo ase emetwe yabo.
Ⅱ Abaisraeli konya berusananirie korwa ase abamenyi bonsi, na bagatenena koorokia ebibe biabo, amo nogokora okobe gwe chisokoro chiabo.
Ⅲ Bagatenena kera oyomo aseye, na Egetabu keria ki’Amachiko y’Omonene, Nyasae obo, ekaba egosomwa ase bare ase egeka gie chinsa inye, naende bakaba bakoorokia ebibe biabo na komosasiima Omonene, Nyasae obo, ase egeka kende gie chinsa inye, ase rituko erio.
Ⅳ Erio Yesua na Bani, Kadimieli na Sebania, Buni na Serebia, Bani na Kenani, bagatenena igoro y’obotindiaro bwachikeire Abalawi, bagasaba neriogi rinene ase Omonene, Nyasae obo.
Ⅴ Abalawi aba: Yesua na Kadimieli, Bani na Hasabineya, Serebia na Hodia, Sebania na Petahia, bagateebia abanto,
“Tenena motogie Omonene, Nyasae oino,
momotogie korwa bono goika kare na kare.
Ogotogigwa kobe ase erieta riaye rinene
riimokereirie igoro goetania ogosesesenigwa na ogotogigwa gwonsi.”
Ogosaba gw’okoorokia ebibe
Ⅵ “Aye naye Omonene, aye bweka.
Naye gwatongete igoro, na igoro ya igoro chionsi,
na emeganda yabo yonsi,
na ense amo n’ebinto bionsi bireo,
ne chinyancha, na ebinto bionsi bire imeo.
Naye obirendete bigendererete kobao; ebitongwa bionsi bia igoro nigo bikogosasiima.
Ⅶ Aye Omonene Nyasae gwachorete Aburamu
na okamorusia korwa Uri bw’Abakalidayo,
erio okaonchora erieta riaye, okamoroka Aburaamu.
Ⅷ Okamorora ng’a nigo arenge nenkoro y’obwegenwa ase obosio bwao,
erio ogakora okobwatana kw’ogotianania amo nere
ng’a noe ororeria rwaye ense y’Abakanaani,
ey’Abahiti na Abaamori,
ey’Abaperisi, na Abayebusi, na Abagirigasi,
na bono gwaikeranirie ring’ana gwakwanete,
ekiagera aye nomonyene oboronge.
Ⅸ “Aye kwaroche emechando ye chisokoro chiaito aaria Misiri,
naende okaigwa okorera kwabo agwo mbarabare ase Enyancha Embariri.
Ⅹ Ogakora ebikone na amakumia mamincha ya Farao,
mamincha y’abasomba baye bonsi na abanto bonsi b’ense yaye,
ekiagera nkwamanyete buna abakorerete chisokoro chiaito bobe;
boigo erieta riao rikamanyekana, rikaba rinene buna rire goika reero iga.
Ⅺ Ogaatanana amaache ’enyancha ase amasio e chisokoro chiaito,
erinde bagaeta ase egati y’enyancha buna ense enyomo;
okarimeria abachandi babo ase chindiba,
buna rigena rikorutwa ase amaache amanene ime.
Ⅻ Ase omobaso okaraa Abaisraeli ne riire,
na ase obotuko ne riire ri’omorero
ase okobamorekera enchera baare goetera.
ⅩⅢ Aye kwaigwete korwa igoro ase egetunwa gia Sinai,
ogakwana nabarabwo korwa igoro,
okabachikera emeroberio emeronge na okabaa amachiiko ay’ekeene.
ⅩⅣ Okaborokereria bakamanya Esabato yao Enchenu,
naende okabaa emeroberio na amachiiko goetera ase Musa, omosomba oo.
ⅩⅤ “Ekero barenge nenchara, okabarentera endagera korwa igoro,
na ekero barenge nerang’o, okabasokeria amaache korwa ase egetare,
naende okabateebia bagende koira ense eyio
konya kwarire eira y’ogotiana ng’a nobayee.
ⅩⅥ Korende chisokoro chiaito, barabwo bakaba abaenenu,
bagakong’ia ebigoti biabo ase ogotaigwera,
bakaanga kobwata amachiiko ao.
ⅩⅦ Bakaanga koigwera, gose tibarengereretie na koinyora amakumia gwakorete ase egati yabo;
bagakong’ia ebigoti, bagachora omoraai
abatang’ane koirana gochia Misiri ase obosomba.
Korende aye naye Nyasae bw’okwabera,
nigo ore omuya, naende omonyene amaabera,
tori omwango bw’okoba nendamwamu,
aye nigo ore nobwanchani obonge botari koera,
gose tikwabatigete.
ⅩⅧ Barabwo bakeroiseria omogwekano bw’emori
korwa ase etaabu enyititoire na kobombwa,
bagateeba ng’a oyo noro ore Nyasae oino
obarusetie korwa ase ense ya Misiri,
bagakwana amang’ana ay’okorama okonene.
ⅩⅨ Nonya naboigo, ase engencho y’amaabera ao amanene
tikwabatigete agwo ase erooro.
Riire riria riarenge kobaraa ase omobaso tiriaruete ase bare;
gose riire riria ri’omorero tiriatigete kobamorekera
ase enchera barenge goeta ase obotuko.
ⅩⅩ Aye okabaa Omoika oo omuya koborokereria;
tikwabarinete mana baare koria,
naende nigo kwabaete amaache baare konywa ekero barenge nerang’o.
ⅩⅪ Ase engaki y’emiaka emerongo ene bagendererete kobeera ase erooro okabarenda,
barabwo tibaremeretwe gento kende,
nonya ne chianga chiabo tichiagotete,
gose amagoro abo tabimbete.
ⅩⅫ “Okabaa okobua igoro ase amarwoti;
okabaatanera chinse ao ao.
Bakaira ense ya Sihoni, omorwoti o Hesiboni,
na eya Ogi, omorwoti o Basani.
ⅩⅩⅢ Okabaa abana abange buna ching’enang’eni chia igoro,
na okabarenta ase ense eyio kwarierete chisokoro chiabo eira ng’a ebe eyabo.
ⅩⅩⅣ Ase ayio, abana babo bakagenda bakaira ense eyio.
Aye okabua Abakanaani, abanto b’ense eye,
okababeka ase amaboko ’abaanto bao,
okabaa nabarwoti babo na abanto b’ense eye,
erinde baabakorere buna banchete.
ⅩⅩⅤ Barabwo bakaira emechie yagiteire chindwaki, na ense entenenku,
bakaira ne chinyomba chiaichire n’ebinto ebiya,
ne chinsoko chi’amaache chiabaachetwe ase ebitare,
na emegondo y’emesabibu na ey’emezeituni,
na emete emenge y’amatunda.
Bakaria, bakaigota na konora,
bakaba nomogooko omonene ase obuya bwao obonge.
ⅩⅩⅥ “Nonya naboigo nigo bangete gokoigwera,
bagasaria asore, bakaa amachiiko ao amagega,
bagaita ababani bao, abwo babakuurerete bairane gochia asore;
ase ayio bagakora okomocha okonge gw’okorama erieta riao.
ⅩⅩⅦ Ase ayio okababeka ase amaboko ’ababisa babo,
na barabwo bakabachanda.
Ekero barenge ase emechando yabo, bakarera asore;
aye okabaigwa agwo igoro;
na ase engencho y’amaabera ao amange,
okabaa abatooria abwo bakabatooria korwa ase amaboko ’ababisa babo.
ⅩⅩⅧ Ekero konya banyorire obotoereru, bagakora ebibe asore naende;
aye ogatiga ababisa babo bakababua na kobagambera.
Nonya naboigo, ekero barenge gokoiranera na korera asore,
nigo kwarenge kobaigwa korwa agwo igoro,
na ase engencho y’amaabera ao amange
nigo kwabeete gokobatooria ase chingaki chinyinge.
ⅩⅩⅨ Nigo kwabakuurerete bairane babwate amachiiko ao,
korende ase engencho y’oboenenu bwabo bakaanga koigwera amachiiko ao,
bagakora ebibe ase emeroberio yao echiikire,
eyio omonto karayebwate nabe moyo.
Bakaenena, bagakong’ia ebigoti tibaigwera.
ⅩⅩⅩ Ase emiaka emenge okabaremereria,
okabakuurera n’Omoika oo goetera ase ababani bao.
Nonya naboigo tibaigwerete;
erio okababeka ase amaboko ’abaanto b’ebisaku ebiao.
ⅩⅩⅪ Korende ase engencho y’amaabera ao amange,
tikwabasiretie gose kobatiga,
ekiagera aye Nyasae oito nomuya ore, na omonyene amaabera.
ⅩⅩⅫ Na bono, aye Nyasae oito,
nigo ore omonene, na omobui, na oyo bw’okoirokia.
Nigo orendete okobwatana kw’ogotianania,
na obwanchani bwao boria bogendererete botambe.
Tobara buna negento egesinini obokong’u obo bwonsi bwatonyorire.
Korwa ase engaki eria abarwoti b’Abaasuri batogamberete goika reero,
twabeire togochandeka intwe na abarwoti baito, na abanene baito,
na abakuani baito, na ababani baito, ne chisokoro chiaito;
ee, abanto bao bonsi.
ⅩⅩⅩⅢ Nonya naboigo, aye nigo ore omonyene oboronge
ase amang’ana aya onsi abeire agotonyora;
aye nigo ore omwegenwa,
korende intwe twakorire ayare amabe.
ⅩⅩⅩⅣ Abarwoti baito, na abanene baito,
na abakuani baito, ne chisokoro chiaito,
tibabwatete amachiiko ao,
gose tibaigwerete ogokuurera kwao kwabakuurerete.
ⅩⅩⅩⅤ Nonya bamenyete ase oborwoti bwabo abanyene,
na kwabaeire amaya amange ase ense eria entenenku kwabaete,
tibagokorerete gose tibaonchogete korwa ase ogokora kwabo okobe.
ⅩⅩⅩⅥ Bono nigo tore abasomba
aiga ase ense eye kwaete chisokoro chiaito
ng’a barie okwama kwaye na kwegokeria amaya.
ⅩⅩⅩⅦ Ase engencho y’ebibe biaito
obotenenku bw’ense eye bwairirwe nabarwoti abwo babekirwe gotogambera.
Abwo mbabwate okobua igoro ase emebere yaito,
na ase chitugo chiaito,
batokorere buna banchete,
na intwe nigo tore nemechando emenene.”
Abanto bakobeeka okobwatana ekemanyererio
ⅩⅩⅩⅧ Ase engencho y’amang’ana ayio onsi, bono nigo togokora okobwatana gotari koonchoka na tokorike, erinde abanene baito amo n’Abalawi baito, na abakuani baito, babeeke ebimanyererio biabo ase korokwo.