ⅩⅩⅢ
Ⅰ Baalamu akamoteebia Balaki, “Ng’agachere aiga ebisasimero bitano na bibere, naende ondetere chieri isan’aibere, ne chimingichi isan’aibere.”
Ⅱ Balaki agakora buna Baalamu amoteebetie, na abwo babere bakarua ekeng’wanso igoro ase kera egesasiimero, eeri eyemo na emingichi eyemo.
Ⅲ Baalamu agateebia Balaki, “Beera aa, otenene mbarabare ase ekeng’wanso kiao ki’ogosambwa; inche ’ngende korora gose ande Omonene nang’orokere. Kende gionsi aranteebie, ekio nakio ndagoteebie.” Baalamu agatiira gochia egetunwa igoro aarabu.
Ⅳ Nyasae agaika korwa igoro, akaumerana na Baalamu. Baalamu akamoteebia, “Naagachire ebisasimero bitano na bibere, naende narure igoro ase kera ekemo eeri eyemo na emingichi eyemo.”
Ⅴ Omonene agateebia Baalamu ring’ana agochia gokwana. Naende akamotoma airane ase Balaki namang’ana ayio ayio.
Ⅵ Baalamu akairana gochia ase Balaki, akamonyora oteneine mbarabare ase ekeng’wanso kiaye ki’ogosambwa, amo nabanene bonsi b’Abamoabu.
Ⅶ Baalamu agakwana obobani bwaye, agateeba:
“Balaki, omorwoti o Moabu, ondetire korwa Siiria,
korwa ase ebitunwa bia Moocha,
oteebire: Inchuo, ondagererie abanto ba Yakobo,
inchwo ogambie Abaisraeli.
Ⅷ Naki ’ndakore ndagererie oyo Nyasae ataragerereti?
Naki ’ndakore ’ngambie oy’Omonene atagambeti?
Ⅸ Korwa aiga ase ebitare igoro nimbarooche,
na korwa aiga ase ebitunwa nimbarigereretie.
Abwo n’abanto bamenyete boka,
beatananire korwa ase abanto b’ebisaku.
Ⅹ Ning’o oranyare kobara ororeria rwa Yakobo,
abwo bare abange buna orotu rw’amaroba?
Gose ning’o oranyare kobara nonya nenseemo ya inye y’Abaisraeli?
Tiga inkwe buna oyomo bw’abanyene oboronge,
na omoerio bw’amatuko ane obe buna oyoobo.”
Ⅺ Balaki akaboria Baalamu, “Ngento ki eke aye gwankoreire? Nigo nakorangeretie ng’a oche obaragererie ababisa bane, na rora, ribaga ri’ayio kwabasesenirie.”
Ⅻ Baalamu akamoiraneria, “Inee! Tiyangwenerete inyigwere na gokwana amang’ana ari’Omonene agonteebia nkwane?”
Obobani Bwa Kabere Bwa Baalamu
ⅩⅢ Balaki akamoteebia, “Inchuo, togende amo naye goika aase ande aao. Korwa aroro nonyare korora abare ang’e. Tokorora bonsi. Korwa aase agwo nobandagererie.”
ⅩⅣ Akamoira goika ase omogondo o Sofimu agwo ase egechuria gia Pisiga. Agwo Balaki akaagacha ebisasimero bitano na bibere, akarua eeri eyemo na emingichi eyemo igoro ase kera egesasiimero.
ⅩⅤ Baalamu agateebia Balaki, “Beera aa, otenene ensemo y’ekeng’wanso kiao ki’ogosambwa inche ’ngende aaria ng’umbu, toumerane n’Omonene.”
ⅩⅥ Omonene akamoorokera Baalamu, akamoteebia amang’ana arenge gochia gokwana, naende akamotoma airane ase Balaki namang’ana ayio ayio.
ⅩⅦ Baalamu akairana gochia ase Balaki, akamonyora oteneine mbarabare ase ekeng’wanso kiaye ki’ogosambwa, na abanene b’Abamoabu bateneine agwo amo nere. Balaki akamobooria, “Mang’ana ki Omonene akwanire?”
ⅩⅧ Baalamu agachaaka gokwana obobani bwaye, agateeba,
“Inchuo aye Balaki, omwana o Sipori,
ontegerere oigwe aya ’ngokwana!
ⅩⅨ Nyasae tari omonto, erinde akwane oborimo,
gose tari Mwanyabaanto, erinde anyare koonchoka.
Inee! Aya akwanire, takonyara koyakora?
Gose, aya ateebire, takonyara koyaikerania?
ⅩⅩ Rora, inche nigo nachigetwe ng’a ’nsesenie;
na ekero Nyasae asesenirie,
inche tinkonyara koirania ogosesenigwa okwo.
ⅩⅪ Ere tarochi obobe ase Yakobo,
tarochi bokong’u bonde ase Abaisraeli.
Omonene, Nyasae obo, nigo are amo nabarabwo,
igo bakoraria nomochengo ng’a omorwoti nareo.
ⅩⅫ Nyasae nere obarentire korwa Misiri;
barabwo nigo babwate chinguru buna echi’eng’era.
ⅩⅩⅢ Oborogi tibogokora gento ase abanto ba Yakobo,
gose oboriori ase Abaisraeli.
Nakwanwe igoro y’ abanto ba Yakobo, nabwo Abaisraeli:
Rora aya Nyasae akorire!
ⅩⅩⅣ Rigereria abanto abwo nigo banga buna endo eaberi ekoboka,
na buna endo ekoimokerera igoro,
teri korara goika eraria echi yatwarire,
goika eranywa amanyinga ay’echi yaitire.”
ⅩⅩⅤ Naende Balaki agateebia Baalamu, “Bono tobaisa kobaragereria, gose tobaisa kobasesenia nonya ng’ake.”
ⅩⅩⅥ Korende Baalamu akamoiraneria, “Tinagoteebia ng’a amang’ana onsi Omonene agonteebia, ayio naro ’ndakore?”
Obobani Bwa Gatato Bwa Baalamu
ⅩⅩⅦ Balaki agateebia Baalamu, “Bono inchwo ’nkoire aase ande aao. Aande gose Nyasae nanche obandagererie korwa aroro.”
ⅩⅩⅧ Ase ayio Balaki akaira Baalamu gochia ase egechuria ki’egetunwa gia Peori, bakarigereria erooro inse.
ⅩⅩⅨ Baalamu akamoteebia, “Ng’agachere aiga ebisasimero bitano na bibere, na ondetere chieri isan’aibere, ne chimingichi isan’aibere.”
ⅩⅩⅩ Balaki agakora buna atebetigwe, akarua eeri eyemo amo n’emingichi eyemo ase kera egesasiimero.