ⅩⅩⅣ
Ⅰ Ekero Baalamu arooche ng’a Omonene nigo amoganetie asesenie Abaisraeli tagendete naende ase okorigia oboringoria buna chingaki chiria chi’eritang’ani, korende akaonchora obosio bwaye gochia ase erooro.
Ⅱ Agachia koimokia amaiso, aye, akarora Abaisraeli batoorete egesaku ase egesaku. Erio Omoika o Nyasae ogaacha igoro ase are.
Ⅲ Agwo Baalamu agakwana obobani obo:
“Amang’ana aya naro inche Baalamu, mosinto o Beori, ’ngokwana
amang’ana aya nay’ane, inche omonto oramokiigwe amaiso.
Ⅳ Aya namang’ana y’omonto okoigwa buya aya Nyasae agoteeba,
oyo okorora amaroro akorwa ase ere oria Omonguru,
oyogotung’ama inse na koramokigwa amaiso aye.
Ⅴ Inwe abanto ba Yakobo, chiema chiaino
naki chire chingiya!
Inwe Abaisraeli aase momenyete, naki are aagiya mono!
Ⅵ Igo mogwekaine omweya orambogete gochia aare,
gose emegondo ere mbarabare y’orooche,
nigo more buna emegaka Omonene asimegete.
Gose emecharake ere ase amaache mbarabare.
Ⅶ Amache amaange naiteke korwa ase chinyongo chiabo
na oroiboro rwabo nigo roraabe oronge mono.
Omorwoti obo nabe omonene goetania Agagi,
na oborwoti bwaye inabotogigwe mono.
Ⅷ Nyasae nere obarentire korwa Misiri,
chinguru chiabo nigo chire buna echi’eng’era.
Barabwo mbasirie abanto abare mamincha yabo,
babune amauga y’emebere y’ababisa babo,
na baabarase ne chinsara chiabo.
Ⅸ Abaisraeli nigo batung’aime inse buna endo, buna endo eaberi,
ning’o oraabe noboremu abature?
Asesenigwe omonto oria okobasesenia inwe,
na aragererigwe omonto oria okobaragereria inwe.”
Ⅹ Ase amang’ana ayio Balaki akaba n’endamwamu enene ase Baalamu, agaaka chinkobi, akamoteebia, “Nigo nakorangeretie ng’a oragererie ababisa bane, na rora, bono aye kwabasesenirie chintunda echi isato.
Ⅺ Bono irana gochia bwoo. Inche igo narengereretie gokoa ogosika okonene, korende Omonene okorinire, tonyora ogosikwa okwo.”
Ⅻ Baalamu agateebia Balaki, “Inee! Tinateebetie abanto baria gwatomete ase inde ng’a
ⅩⅢ Balaki naisa kong’a enyomba yaye eichire ne chifeta, ne chitaabu, tinkonyara kwanga koigwera amang’an’Omonene anchikiire, na tingokora gento kende ase ogwancha kwane, abe amabe, gose amaya. Ay’Omonene agoteeba, ayio naro ngwenerete ’nkore.
Obobani Bw’omoerio Bwa Baalamu
ⅩⅣ “Bono ’nkoirana inde gochia ase abanto bane. Inchuo ’nkomanyie egento Abaisraeli barakore ase abanto bao ase amatuko agochia goocha.”
ⅩⅤ Erio Baalamu agakwana obobani obo:
“Amang’ana aya inche Baalamu,
mosinto o Beori, ’ngokwana,
amang’ana aya nay’ane, inche omonto oramokiigwe amaiso.
ⅩⅥ Aya namang’ana y’omonto okoigwa buya aya Nyasae agoteeba,
naende onyorire okomanya korwa ase oria ore Igoro Mono.
Na okorora amaroro akorwa ase oria Omobui,
oyogotung’ama inse na koramokigwa amaiso.
ⅩⅦ Namororire, korende tari bono;
namorigereirie, korende tari ang’e.
Eng’enang’eni neoroke korwa ase egati y’ abanto ba Yakobo,
na enyimbo y’obogambi neoroke korwa ase Abaisraeli.
Nesenyente chintakunero chi’emetwe y’Abamoabu,
neiyerie abanto b’ororeeria rwa Seti.
ⅩⅧ Ense ya Edomu nebugwe eirwe,
Edomu nebugwe ebe eyabo,
eyio nense y’ababisa babo.
Abaisraeli ’mbagenderere koba n’okobua.
ⅩⅨ Omogambi naoroke korwa ase egati y’ abanto ba Yakobo
asirie abanto batameire emechie banyore oborendi.”
ⅩⅩ Erio Baalamu akarigereria Abaameleki, agakwana obobani obo:
“Abaameleki nabwo barenge ab’eritang’ani ase ebisaku,
korende ase omoerio nabasirigwe kegima.”
ⅩⅪ Naende akarigereria Abakeni, agakwana obobani obo:
“Obomenyo bwabo nabogenderere kobao,
buna egeswa keagachire ase engako y’egetare.
ⅩⅫ Korende nonya naboigo, Abakeni nabasirigwe,
ekero Abaasuri barabaire babe abasibwa.”
ⅩⅩⅢ Baalamu akagenderera gokwana obobani bwaye:
“Obee! Ning’o oranyare koba moyo ekero Nyasae arakore aya?
ⅩⅩⅣ Abanto ’mbachiche ne chimeeri korwa ase engegu ya Kitimu,
nabarabwo ’mbachaande Abaasuri na Abaeberi,
korende barabwo abanyene ’mbasirigwe boigo.”
ⅩⅩⅤ Erio Baalamu akaimoka, akairana bwoye, na Balaki nere akabwatia enchera, akageenda bwoye.