EGETABU
KI’EMEBEYANO
Ogochaakera
Egetabu ki’Emebayeno n’ekemo ki’ebitabu bw’okobwatana ogokoro ekio kegokwana mono igoro y’obong’aini (ebitabu binde bigokwanera igoro y’obong’aini nabo Ayubu, Omorandia, n’ebinde.)
Egetabu eke nigo kebwate emebayeno ao ao eyio eganga yaye enene n’okworokereria abanto igoro y’obogima obuya.
Buna ekororekana, emebayeno emenge nigo yarigetwe n’abaroisia amatera b’echingaki ao ao n’eyende nigo yarigetwe kobwatekana n’okomenya n’ogosasiima kw’Abaisraeli. Emebayeno ende nigo emanyekanete buna ney’Omorwoti Sulemani oyio omanyekaine koba omonto obwate obong’aini mono.
Emebayeno eye ara aange nigo egotwegeria buna ninki engencho y’okoba n’obong’aini buna Abaisraeli bakare baroche na komanya gose kw’orokererigwa na baria barenge abang’aini.
Obong’aini obonene goetania bwonsi mboria bw’ogotwara oboamate obuya na Nyasae. Okobwata na korenda amachiiko aye nario ring’ana rioka ri’engencho ribwenerete ase abanto bonsi. Koborwa obong’aini n’egento getabwenereti, boigo komenya n’oboriri n’ebibe na omochakano bw’ogosira. Obong’aini ase Abaisraeli nigo bwabegetwe chinguru ase kera omonto beene, ring’ana erio ekero ritaiyo gati y’abanto, oborendi bwa Nyasae ase abanto baye nigo bogosira.
Koba n’obong’aini tari ingana igeni ase abanto. Obong’aini nigo bokoegerigwa nonya nase abana abake goetera ase ebitandawili n’emereng’anio eyio ekonyorekana ase ebisaku ao ao ime y’ense.
Amang’ana are ase egetabu eke nigo abagire ase chinchera ao ao.
Ase egesieri 1-9 nigo tokworokigwa amang’ana y’okoigorera igoro y’obong’aini. Ase ensemo eye, nigo tokworokigwa ase obogare emeremo y’obong’aini. Aiga obong’aini nigo bogokwanerwa koreng’anigwa buna “omokungu” oyio okorangeria abanto bonsi bamenye n’echisemi n’obongaini obuya. 10-29 Ase ebisieri ebi nigo tokorora emebayeno emenge ebekire amo eyio emanyekanete buna ney’Omorwoti Sulemani (10:1—22:16; 25:1—29:27), amo n’eyende ekorwa ase abang’aini bande 22:17—24:34.
Ase egesieri 30-31 nigo tokorora chinsemo inye ao ao, chinsemo ibere nigo chigotworokia amang’ana igoro y’ebirengererio boigo n’obosemia bw’abaanto abang’aini abwo kero kende bakageire buna tibarenge Abayahudi (30:11-14) na (31:1-9).
Okobagwa kw’egetabu eke
Obong’aini bogotogigwa 1:1—9:18
Emebayeno ya Sulemani 10:1—29:27
Amang’ana y’Aguri 30:1-33
Amang’ana ao ao 31:1-31
Ⅰ
Engencho Enene Y’emebayeno
Ⅰ Eye nero emebayeno ya Sulemani mosinto o Daudi, omorwoti bw’Abaisraeli.
Ⅱ Emebayeno eyio eragere abanto bamanye obong’aini na amorokererio y’okorongeyia, naende bamanye amang’ana are nengeencho.
Ⅲ Korwa ase ero abanto mbanyore amorokererio akorenta obong’aini, na oboronge, na ekeene, na ogokora kw’oboronge.
Ⅳ Emebayeno eyio nigo erae abatamanyeti amaange bamanye chiseemi, naende nigo erorokererie ekegori egeke getware obomanyi na emeroberio emiya.
Ⅴ Ase okoigwa emebayeno eyio omonto omong’aini nigo akong’ainia goetania, na oyore nobomanyi bwenyorera ogosemigwa okuya.
Ⅵ Korwa ase emebayeno eyio abanto ’mbanyaare kweorokereria emebayeno na eki egoteeba; boigo ’mbamanye amang’ana y’abanto abang’aini na emebayeno yabo.
Ogoseemia Ekiare Egeke
Ⅶ Okomoiroka Omonene, n’oro omochakano bwe chiseemi. Abariri nigo bagochaaya obong’aini na amorokererio.
Ⅷ Omwana one, igwera amorokererio a iso, na tobaisa gotiga aria nyoko akogochika.
Ⅸ Ayio nigo arabe buna egetinti gechabeire ase omotwe oo, na buna chisonoi chingiya chire ase rigoti ria’o.
Ⅹ Omwana one, abanyabibe kobarakoebererie ng’a mobwatane nabarabwo, tobaisa gwancha.
Ⅺ Baise kogoteebia, “Inchuo ogeende amo naintwe; toboere abanto tobaite, toumokere onde bwensi otari na komocha.
Ⅻ Inchuo tobamere kobare moyo, buna aase abakuure akomera, bageende abagima ase embeera.
ⅩⅢ Erio tonyore chinibo chionsi chie rigori rinene, toichorie chinyomba chiaito nebisakorwa ebio.
ⅩⅣ Inchuo obwatane amo naintwe; tobe n’ekegaancha ekemo.”
ⅩⅤ Omwana one, tobaisa gotaara amo nabarabwo. Otange okogoro kwao tikobaisa gotacha ase bagoeta,
ⅩⅥ ekiagera amagoro abo nigo akominyoka gochia ase ogokora amabe, na nigo bare abaango ase ogoitera amanyinga.
ⅩⅦ Nigo ere bosa gotegera chinyoni ebisugunia ekero chibiroche.
ⅩⅧ Abanto abwo nigo bakoboera goitera amanyinga abo abanyene, na koumokera obogima bwabo abanyene.
ⅩⅨ Naboigo omoerio bwe chiinchera chiabo ore, baria baganetie konyora chinibo ase ribero. Chinibo chiria nigo chigosiria obogima bw’abwo bagochinyora.
Obong’aini Nkorangeria Bore
ⅩⅩ Obong’aini nigo bogoaka eriogi rinene ase chiinchera, boigo nase chichiiro.
ⅩⅪ Nigo bogoaka eriogi rinene ase emesangererekano emenene y’abanto, naende ase ebiita bi’emechie, bwateeba.
ⅩⅫ “Ngoika ririri inwe abamotamanyeti amaange moranche ogotamanya kwaino? Ngoika ririri abachecheria baregokie nogochecheria kwabo, na abariri bageche chiseemi?
ⅩⅩⅢ Moise koonchoka moigwe ogokuurera kw’ane, rirorio nimbaiterere omoika one, ’mbamanyie amang’ana ane.
ⅩⅩⅣ Nabeire ’nkobarangeria, korende mwangire konyigwera; nabeire ’nkorambora okoboko kw’ane, korende monto onde tari okorigereirie.
ⅩⅩⅤ Mwachaayire ogoseemia kw’ane gwonsi, gose onde tari oigwerete ogokuurera kw’ane.
ⅩⅩⅥ Ase ayio inche nimbasekerere ekero emechando erabachere. Nimbachecherie ekero obwoba borabaachere;
ⅩⅩⅦ ee, ekero obwoba borabaachere buna ekembugu‐mbugu, na emechando buna ekerambauti, boigo ekero obokong’u na omoichano birabaachere.
ⅩⅩⅧ Erio barabwo ’mbandangerie, korende tinkobaigwa; ’mbandigie, korende tibakonyora inche.
ⅩⅩⅨ Barabwo nigo bageechete chiseemi tibancheti komoiroka Omonene.
ⅩⅩⅩ Tibancheti koigwera ring’ana riane ri’okobaseemia nonya nerimo; nigo bachaayete ogokuurera kw’ane gwonsi.
ⅩⅩⅪ Ase ayio ’mbarie okwama kw’ogokora kwabo, baisaneke n’emeroberio yabo abanyene
ⅩⅩⅫ Okoirana magega kw’abwo batamanyeti amaange ’nkobaite, na ogoisaneka kw’abariri ’nkobasirie barabwo abanyene.
ⅩⅩⅩⅢ Korende monto onde bwensi oranyigwere namenye ase omorembe, ere nabe n’obotoereru na takoiroka bobe bonde.”