ⅩⅫ
Ⅰ Erieta rigiya nigo rigwenerete gochorwa kobua chinibo chinyinge, na ogwakwaneka okuya nigo kobuete efeta na etaabu.
Ⅱ Omonda na omotaka nigo bamenyete ase obogima obomo; Omonene nere omotongi o bonsi.
Ⅲ Omonto omong’aini nigo akororera emechando korwa aare, bwebisa, korende oy’otamanyeti amaange nigo akogeenderera gochia bosio, oumerana nero, erio ochaandeka.
Ⅳ Abare abaitongo bamoirogete Omonene nigo bakonyora obotenenku, na ogosikwa, na obogima.
Ⅴ Amagwa na emeeto nigo bitegire ase chiinchera chi’abaanto abakorekanu, korende oyo orendete omoyo oye goika eatanane korwa ase bire.
Ⅵ Orokereria omwana abwatie enchera egwenerete, na ekero abeire omogotu takoyetiga.
Ⅶ Omonto omonda nigo akogambera omotaka; na omonto ogosaba aegwe singo nigo akoba omosomba bw’oria omoa singo.
Ⅷ Oy’ogosimeka obobe, nagese ogosareka, na enyimbo y’endamwamu yaye nigo erasire bosa.
Ⅸ Omonto obwate eriiso ri’amaabera nasesenigwe, ekiagera bwatananeire omotaka endagera.
Ⅹ Seria omonyacheche, na eriomana ndiere, ee, eriomana na ogochaaya ’mbisire.
Ⅺ Omonto bwanchete enkoro echenegete, na ebikoba biaye bigokwana ayare ay’obuya, omorwoti nabe omosani oye.
Ⅻ Amaiso a Omonene nigo arigereretie na korenda oyore nokomanya, korende nigo akoonchorana na gosaria amang’ana ya abatari abegenwa.
ⅩⅢ Omonto omworo nigo agoteeba, “Endo nere isiko! Nigo ndabaise gochia goiterwa ase chiinchera.”
ⅩⅣ Omonwa bw’omokuungu omotayayi nigo ore eirima entambe, na omonto onde bwensi Omonene agechiigwe nere goika agwe ase eirima eyio.
ⅩⅤ Oboriri nigo bosiberanirie ime ase enkoro y’omwana, korende ekeranya gekorongeyia amamocho nigo gekoborusiao.
ⅩⅥ Ere oyo ogokorera abataka bobe ase ogwetenenkia ere omonyene, gose okorua ebiegwa ase abanda, goika aremerwe.
Amang’ana emerongo etato ay’obong’aini
ⅩⅦ Tega ogoto kwao oigwe amang’ana abanto abang’aini bagokwana, na obeke amorokererio ane ime ase enkoro yao.
ⅩⅧ Nigo erabe buya korayarende ime yao, erinde abe ang’e ase ebikoba biao koyakwana.
ⅩⅨ Rituko ria reero nakoyamanyirie, ee, nakoyamanyirie, erinde omosemerie Omonene.
ⅩⅩ Inee! Tinkoriikereti amang’ana amanene ay’ogoseemia na ay’amorokererio?
ⅩⅪ Ayio nakworokererie ayare ay’oboronge na ay’ekeene, erinde okwane ay’oboronge na ekeene ase abwo bagotomete.
1.
ⅩⅫ Tobaisa koura omotaka ekiaye, ekiagera are omotaka, gose agwo ase egeita tobaisa komokorera bobe omonto ochaandegete.
ⅩⅩⅢ Omonene narwanerere abataka, na abwo bakobaurereria nabasirie.
2.
ⅩⅩⅣ Tobaisa gokora obosani n’omonto ore omwango ase okobeea gose tobaisa kogeenda amo n’omonto ore nekeririanda.
ⅩⅩⅤ Oise kobwatana noyio, nigo orenarie chiinchera chiaye, erio obwatwe ase omotego.
3.
ⅩⅩⅥ Tobaisa koba oyomo bw’abaanto abwo bakobwatana amaboko, gose bakwerua koba intenenera ase chisira chi’abaanto bande.
ⅩⅩⅦ Nobaise kourwa oborere bwao okoraarera, ekiagera tobwati gento ogoakana.
4.
ⅩⅩⅧ Tobaisa gotuumana orobebe orokoro orwo chisokoro chiao chiabeegete.
5.
ⅩⅩⅨ Oise korora omonto omanyete emeremo yaye buya, oyio natenene ase amasio y’abarwoti, tagokorera abanto bande emeremo.