ⅩⅩⅢ
6.
Ⅰ Ekero ogoikaransa koria endagera amo nomogaambi, orengererie mono ng’a ning’o ore ase obosio bwao.
Ⅱ Onye kore n’enchara, obeke omoyio ase ring’orong’oche ria’o.
Ⅲ Tobaisa gosanera chindagera chiaye chinyansu, ekiagera nigo chire echi’obong’ainereria.
7.
Ⅳ Tobaisa gwechaanda mono ng’a obe omonda; tobaisa gosemeria obong’aini bwao omonyene.
Ⅴ Tobirigereria ebio, obonda nigo bogochoma chimbaaba, bwairuruka buna ekeongo ekoiruruka yarimera igoro.
8.
Ⅵ Tobaisa koria endagera y’omonto ogokomogorera, gose tobaisa gosanera chindagera chiaye chinyansu.
Ⅶ Buna omonto akorengereria ime ase enkoro yaye, naboigo are. Nigo akogotiotereria, “Karie na kanywe!”, Korende enkoro yaye tegwancheti.
Ⅷ Ayio nigo aragere oroke endagera eria kwaria, naende amang’ana ao amaya asire bosa.
9.
Ⅸ Tobaisa gokwana amang’ana ao ase omonto omoriri aigwete, ekiagera nigo arachaaye obong’aini bw’amang’ana ao.
10.
Ⅹ Tobaisa gotumana orobebe orokoro, gose totumana osoe ase emegondo ye chintakana,
Ⅺ ekiagera Omobooria obo nigo are ne chinguru, ere nachirwanerere akorwanie aye.
11.
Ⅻ Karue enkoro y’ao oigwe amorokererio, na amato ao aigwe amang’ana ye chiseemi.
12.
ⅩⅢ Tobaisa gotiga korongeyia omwana oo; koramoake ekeranya, tagochia gokwa.
ⅩⅣ Ee, koramoake ekeranya nigo oratoorie obogima bwaye korwa aase abakuure.
13.
ⅩⅤ Omwana one, onye enkoro yao ekoba n’obong’aini, rirorio enkoro y’ane nigo eragooke.
ⅩⅥ Ekero ebikoba biao birakwane amang’ana amaronge, nigo ndabe nomogooko ime y’ane.
14.
ⅩⅦ Enkoro y’ao tebaisa gosanera amang’ana yabanyene ebibe, korende aye ogeenderere komoiroka Omonene kera rituko.
ⅩⅧ Ekeene, eng’eria nekare bosio, na ogosemeria kwao tikogosira bosa.
15.
ⅩⅨ Aye omwana one, igwa na obe n’obong’aini, naende orende enkoro y’ao ebwatie enchera endonge.
ⅩⅩ Tobaisa koba ase egati y’abagotinda nedivai, gose ase egati y’abakoria chinyama bobe,
ⅩⅪ ekiagera abagotinda, na abaria bobe, ’mbabe abataka; na obogondereria bwe chitoro nigo boraboyie omonto amachanchabe.
16.
ⅩⅫ Igwera iso okoiborete, na tobaisa komochaya nyoko ekero agotire.
ⅩⅩⅢ Gora ekeene, na tobaisa gokeoonia; boigo gora obong’aini, na amorokererio, na obomanyi.
ⅩⅩⅣ Ise bw’omonto ore omonyene oboronge nigo akoba nomogooko omonene. Ere oyoiboire omwana omomura omong’aini nagookigwe nere.
ⅩⅩⅤ Bagookie iso na nyoko, tiga oria okoiborete akogookere.
17.
ⅩⅩⅥ Omwana one, ing’a enkoro yao, na amaiso ao tiga agookere chiinchera chiane.
ⅩⅩⅦ Omokungu omotayayi nigo anga engoro entambe gochia inse, na omokungu bw’omonto onde nigo anga egesiima ekegote.
ⅩⅩⅧ Ee, omokungu oyio nigo akoboera buna omouri, nigo akomentekania abasaria ase egati ya Mwanyabaanto.
18.
ⅩⅩⅨ Ning’o oyio ore nobobe? Ning’o oyio oichanete? Ning’o oyio okorwana na kwereera? Ning’o oyio oakirwe chingoma chitagwenerete aakwe? Ning’o oyio obariiretie amaiso?
ⅩⅩⅩ Nabaanto abwo bakona-konywa edivai ase chingaki chintambe, na abwo bakona‐korigia konywa edivai yochoganirie n’eyende.
ⅩⅩⅪ Tobaisa korigereria edivai koyabariirire, ekero ekobera ase egekombe na koirana inse ng’ora ng’ora.
ⅩⅩⅫ Omoerio nigo ekoroma buna eng’iti na korasa buna enchoka.
ⅩⅩⅩⅢ Amaiso ao nigo ararore amang’ana amageni, na ebirengererio biao ’mbibe ebikorekanu.
ⅩⅩⅩⅣ Nigo or’abe buna omonto oraire ase egati‐gati y’enyancha, gose buna omonto ore ase omote omotambe igoro okoirwa esiororia.
ⅩⅩⅩⅤ Aye nigo orateebe, “Nigo bang’agete bororo, korende tinyigweti bobe; nigo bang’wanetie bokong’u, korende tinyigweti kende. Indi ’ngocha koboka ingeende korigia eyende?.”