Ⅳ
Ayakonyorekana korwa ase Obong’aini
Ⅰ Inwe abana bane, igwa amorokererio ane inche iso; tegerera mono, erinde monyaare koba n’okomanya.
Ⅱ Inche nigo ’nkobaa amorokererio amaya; timotiga aya nabachiikeire.
Ⅲ Nigo narenge omwana, narenge na tata; nigo narenge omwororo nanchire na baba, ekiagera nigo narenge omomoima.
Ⅳ Tata akanyorokereria, aganteebia, “Tiga amang’ana ane abeere ase enkoro yao ime; orende amachiiko ane, erio nario or’abe moyo.”
Ⅴ Enyorere obong’aini na okomanya, tobaisa kobieba! Tibwanga koigwera amang’ana ’ngokwana korwa ase omonwa one.
Ⅵ Tobaisa gotiga obong’aini, ekiagera borobwo ’mbokorende. Obwanche, na borobwo ’mbogere ogeenderere koba buya.
Ⅶ Obong’aini nigo bore obw’engeencho enene. Ase ayio, enyorere obong’aini, na kende gionsi okorigia, rigia obe n’okomanya.
Ⅷ Obobare koba n’engeencho enene, na borobwo ’mbogokinie; koraboboanie nigo borakorentere ogosikwa.
Ⅸ Mbobeke ase omotwe oo ekiore gechabeire, naende bokoe eguutwa y’obonene.
Ⅹ Aye omwana one, igwa amang’ana ane, oyaanche, igo nario emiaka y’obogima bwao er’abe emenge.
Ⅺ Inche nakworokereirie enchera y’obong’aini; nakoraaire ase oboeto bore oboronge.
Ⅻ Ekero oraabe kogotaara, togotererigwa, na ekero oraabe gokominyoka, tokogoochwa.
ⅩⅢ Bwata amorokererio bokong’u, toyatiga arue ase ore; yarende, ekiagera n’aro obogima bwao.
ⅩⅣ Tobaisa kobwatia enchera y’abakori amabe, gose tobwatia chiinchera chi’abaanto ababe.
ⅩⅤ Bweatanane korwa ase enchera eyio, toyebwatia, korende ogobere oetere ensemo, ogeende bosio.
ⅩⅥ Abanto abwo tibari korara goika barore ng’a bakorire amabe. Onye tibarakorera omonto amabe, tibari korara chitoro.
ⅩⅦ Endagera yabo bakoria n’ogokora amabe, na edivai yabo bakonywa n’obotindi.
ⅩⅧ Korende enchera y’abanyene oboronge nigo enga buna amasase a mambia; ayio akogeenderera koraba goetania goika bwakia se.
ⅩⅨ Enchera y’abakori amabe nigo enga buna omosunte ekerima; tibari komanya ebinto bikobagocha.
ⅩⅩ Omwana one, tegerera oigwe amang’ana ane! Igwera amang’ana ’nkogoteebia.
ⅩⅪ Amang’ana ayio tabaisa korua ase amaiso ao. Yagache ime ase enkoro yao.
ⅩⅫ Ayio nigo are obogima ase oyio oyanyorire, naende nigo akogwenia omobere oye bwonsi.
ⅩⅩⅢ Renda enkoro yao kobua ande onsi orendete, ekiagera nao chinsoko chi’obogima chikorua.
ⅩⅩⅣ Tuguta chinkwana chi’obokorekanu korwa ase omonwa oo, na amang’ana y’obong’ainereria korwa ase ebikoba biao.
ⅩⅩⅤ Tiga amaiso ao arigererie gochia bosio, na ebioge bi’amaiso ao biramokigwe boronge.
ⅩⅩⅥ Rongeyia oboeto bw’amagoro ao, ne chiinchera chiao chionsi chibe chindonge.
ⅩⅩⅦ Togobera gochia aande, ensemo y’okorio gose ey’okobee. Rusia okogoro kwao korwa ase ebibe.