Ⅴ
Ogokuurerwa gw’okwanga obonyaka
Ⅰ Omwana one, tegerera oigwe obong’aini bwane! Igwera okomanya kw’ane!
Ⅱ Erio nario oramanye korenda ebirengererio biao, na ebikoba biao birende chiseemi.
Ⅲ Ebikoba bi’omokuungu omonyaka nigo bigotonyia ayaare amansu buna obooke, na omonwa oye nigo ore omoterere kobua amaguta akweakwa.
Ⅳ Korende omoerio bw’omokuungu oyio nigo ore omoororo buna ekemeri ekeroro, na omwoge buna omoyio o birende otieririe chinsemo chionsi ibere.
Ⅴ Amagoro aye nigo akoraa gochia ase amakweri, na ogotacha kwaye kwaraa gochia aase abakuure.
Ⅵ Ere tari gotaara enchera ekogeenda ase obogima; orogendo rw’aye nigo rokona‐koonchaonchoka, ere tamanyeti ayio.
Ⅶ Ase ayio, inwe abana bane, ’ntegerere; timobaisa gotiga amang’ana ane.
Ⅷ Erende obeere aare korwa ase omokungu oyio; tobaisa goika ang’e negesieri ki’enyomba yaye.
Ⅸ Oise gokora bo, nigo orae abanto abaao amasikani ao, na emiaka yao ebaise konachwa n’abanto batari n’amaabera.
Ⅹ Naende abanto abaao nigo baraire chinibo chiao chionsi, na bionsi ebi gwakoreire emeremo biirwe nabaanto abwo.
Ⅺ Omoerio oye norere, obokie amagombo ekero chinyama chi’omobere oo chiaerire,
Ⅻ ’noteebe, “Inaki nakorete ’nkageecha ogokuurerwa, na enkoro y’ane egachaaya okorongeigwa!
ⅩⅢ Tinaigwerete amorokererio yaborokia bane, gose tinategererete koigwera abarenge konyorokereria.
ⅩⅣ Nigo nabeete ang’e gosira ase obosooku kegima bosio bw’omogaanda ondigereretie.”
ⅩⅤ Kanywe amaache okobucha korwa ase egesima kiao, na aya agosoka korwa ase ensoko yao.
ⅩⅥ Inee! Chinsooko chiao ’nchigwenerete gwesiarera gochia aare, ne chindooche chiao chi’amaache ase chiinchera?
ⅩⅦ Tiga chinsoko echio chibe echiao aye bweka na tari echi’abaanto abaao.
ⅩⅧ Tiga ensoko yao esesenigwe, naye ogookere omokungu bw’oboke bwao,
ⅩⅨ oyore buna ensune eyanchire na buna engabi ensiani. Tiga obosiani bwaye bokong’use, na ogokigwe nere chingaki chionsi. Obwanchani bwaye tiga bokogokie kogeenderera.
ⅩⅩ Omwana one, nase ki okogokigwa nomokuungu omonyaka? Nase ki okoboania omokungu bw’omonto omoao?
ⅩⅪ Chinchera chi’omonto nigo chirorekanete maiso marore ase Omonene, n’Omonene nigo arigereretie ogokora kwaye gwonsi.
ⅩⅫ Ebibe bi’omokori amabe nigo bikomobwata omonyene; nasibwe ne chingori chire ebibe biaye.
ⅩⅩⅢ Omonto oyio nigo arakwe, ekiagera angete ogokuurerwa, na ase engencho y’oboriri bwaye obonene ’nasire.