Ⅵ
Ogokuurerwa konde
Ⅰ Omwana one, ande kweruure koba intenenera ase omonto omino, na kwarire eira ase omonto omoao na kobwatana nere amaboko.
Ⅱ Bono amang’ana gwakwanete korwa ase omonwa oo akobwatire buna omotego.
Ⅲ Ase ayio omwana one, bono nigo ore inse y’okobua kw’omonto oyio, na onye korigetie gwetooria korwa ase are okore iga: Kabe omoitongo, ogende ase are omosorore, erinde agosibore korwa ase eira eyio.
Ⅳ Tobaisa korara gose gosundoka;
Ⅴ minyoka buna engabi egotama erue ase omotwari, na buna enyoni egotama erue ase omotegi.
Ⅵ Aye ore omworo, geenda ase amage, origererie orore buna agokora emeremo n’omokia onyore obong’aini.
Ⅶ Aro tabwati omogambi, gose omoteneneri, gose omoraai,
Ⅷ korende nigo agosangereria chindagera chiabo chingaki chi’egura gura, achigacha goika ekero ki’eguru‐gura.
Ⅸ Aye omworo, ’ngoika ririri oragenderere korara? Ndiriri orabooke korwa ase chitoro chiao?
Ⅹ Okoraara ake, okwegondia ake; okoringania amaboko gotimoka,
Ⅺ obotaka ’mbogoochere buna omouri agoocha, na oboremerwa booche buna omonto obwate ebirwanero agocha.
Ⅻ Omonto otagwenereti kende ore omokori amabe nigo agoeta‐eta, ogokwana oborimo korwa ase omonwa oye.
ⅩⅢ Nigo agosumera ebioge bi’amaiso aye, naende nigo agosumera amagoro, na okworokia ebimanyererio n’amaboko aye.
ⅩⅣ Ogoitania abanto nigo goichire ase enkoro yaye, botambe nigo akoroberia korenta amabe; nigo agosimeka chimbusuro chi’ogotaigwana.
ⅩⅤ Ase engencho eyio emechando nemoochere mobosokano; nigo arasirigwe mobasokano atanyaare gotoorigwa.
ⅩⅥ Mbire ebinto bitano nakemo Omonene ageechete, ee, mbire bitan’abibere bire okogeecha ase are, nabio ebi:
ⅩⅦ Okorigereria kw’oboenenu, na oromeme rogokwana oborimo,
amaboko agoitera amanyinga atari na komocha;
ⅩⅧ enkoro ekoroberia amabe, na amagoro akominyoka gochia gokora amabe;
ⅩⅨ kirori bw’oborimo, ogokwana oborimo,
na omonto ogosimeka chimbusuro chi’ogoitania ase egati y’abanto abamo.
Ogokuurerwa gw’okwanga obonyaka
ⅩⅩ Omwana one, igwera aya inche iso ’nkogochika, na totiga amorokererio a nyoko.
ⅩⅪ Yasibe, ageenderere kobeera ase enkoro yao botambe, naende oyasibe ase rigoti ria’o.
ⅩⅫ Ekero or’abe kogotaara, aro nakoraae; ekero or’abe koraire, ’nakorende, na ekero or’abe gokoboka, ayio nakwane naye.
ⅩⅩⅢ Amachiiko nigo are etaya, na amorokererio nigo are oborabu; ogokuurera gw’okorongeigwa nigo kore enchera y’obogima.
ⅩⅩⅣ Nigo korakorende korwa ase omokungu omonyaka, na korwa ase amang’ana y’oromeme rw’aye oroterere rokoebereria.
ⅩⅩⅤ Tobaisa komogania ase enkoro yao ime ase engencho y’ekieni kiaye ekiya; amaiso aye tabaisa gokong’usa.
ⅩⅩⅥ Ase engencho y’omokuungu omotayayi omonto nigo akoremerwa oborwa nonya negesamunye ki’omogati, na omokungu bw’omonto omoao nigo akorigia obogima bw’omonto obosaria.
ⅩⅩⅦ Inee! Omonto nabogorie omorero ayobeeke ase egekuba kiaye, ne chianga chiaye tichiyia?
ⅩⅩⅧ Gose nataare ase rieera ri’omorero, na amagoro aye tayia?
ⅩⅩⅨ Naboigo er’abe ase omonto ogotomana n’omokungu bw’omonto onde; onde bwensi okoba nomokuungu oyio goika aegwe egesusuro.
ⅩⅩⅩ Abanto tibari gochaaya omoibi onye ore koiba endagera ekiagera are n’enchara.
ⅩⅩⅪ Nonya naboigo omoibi oria kanyorirwe, goika airanie ara gatano na kabere; nigo araakane ebinto bionsi abwate nyomba mwaye.
ⅩⅩⅫ Omonto ogotomana nomokuungu onde bwensi, oyio tabwati chiseemi; oyo ogokora ayio nigo agwesaria ere omonyene.
ⅩⅩⅩⅢ Omonto oyio nigo arabe n’amaakwa naende asirie amasikani onsi. Obosooku bwaye tibogotinyigwa boere.
ⅩⅩⅩⅣ Risemi nigo rigokora omosacha oba nekeririanda, na takoba n’amaabera ekero akorusia egesiomba.
ⅩⅩⅩⅤ Ere tagwancha embooria ende yonsi, naegwa ebiegwa ebinge takobiancha.