Ⅰ Omwana one, renda amang’ana ane, na obeke amachiiko ane abeere ime yao. Ⅱ Bwata amachiiko ane, erinde obe moyo; orende amorokererio ane buna orendete endorero y’eriiso ria’o. Ⅲ Oyasibe ase ebiara bi’amaboko ao, na oyariike oyabeeke ase enkoro ya’o. Ⅳ Teebia obong’aini, “Aye naye mosubati ominto”, na obomanyi oboroke omosani oo momanyaine, Ⅴ erinde bikorende korwa ase omokungu omonyaka ogokwana amang’ana y’okoebereria.

Ⅵ Nigo narigereretie isiko goetera ase ekebao ki’enyomba ya’ne na ebichanga bi’aroro. Ⅶ Ase egati y’abanto batamanyeti amaange, ’nkarora omomura ore ase egati y’abamura bande otabwati chiseemi. Ⅷ Oyio nigo arenge goeta ase enchera yarenge ang’e nekoona agwo ase omokungu oria omonyaka amenyete agechoba‐chobania gochia ase enyomba yaye Ⅸ mogoroba kobokomura‐mura, ekero ki’omosuunte bw’obotuko. Ⅹ Rora, omokungu agacha akaumerana n’omomura oria. Omokungu oria nigo abeegete chianga chi’obotayayi orenge omong’ainereria ase enkoro yaye. Ⅺ Nigo arenge omonyariogi otari kogoma nyomba mwaye. Ⅻ Nigo agosioma‐siomia aande onsi ase chiinchera na ase chichiiro, na ase kera amatabekania oba oganyete. ⅩⅢ Erio omokungu oria akaboania omomura oria na komonyunyunta, akomorigereria n’amaiso, atari nobosooku, akomoteebia, ⅩⅣ “Nariete eira korua ebing’wanso bi’omorembe; rituko ria reero nayeikeranirie. ⅩⅤ Ayio naro agera naacha gokorotota, nigo nakorigirie n’omokia ng’a ’nkorore, na bono nakonyorire. ⅩⅥ Naarire oborere bwane nebirarero ebiya, na ebitambaa bimatonto bikorwa Misiri. ⅩⅦ Naboumoreire manemane, na amaguta y’omogaka, na ay’omodalasini botioke buya. ⅩⅧ Inchuo togokanie ase obotuko bwonsi goika mambia; inchwo twegokie n’obwanchani. ⅩⅨ Omosacha one taiyo, ochiire orogendo orotambe. ⅩⅩ Nigo aira chitaabu chichire omobuko na nigo arairane omotienyi oikire gochia gati,” ⅩⅪ Omokungu oria akaebereria omomura oria namang’ana amansu ao ao, na ase amang’ana y’ebikoba ebiterere akamobua. ⅩⅫ Ase obwango obwo omomura oria agatunyana omokungu oria buna eng’ombe ekoirwa konyenywa, gose buna omosibwa obwatirwe ogochia kobekwa chingataare. ⅩⅩⅢ Ee, akamotunyana goika ensara ekamobeta egaika riini ime. Nigo abeete buna enyoni ekoayerera gochia ase ebisugunia na tamanyete ng’a ayio nobogima bwaye agosiria.

ⅩⅩⅣ Inwe abana bane, ’ntegerera morengererie mono amang’ana ’nkobateebia. ⅩⅩⅤ Chinkoro chiaino tichibaisa koonchorwa na kobwatia chingencho chi’omokuungu buna oyio; gose orogendo rw’aye tirobaisa gosiria obogima bwaino. ⅩⅩⅥ Omokungu oyio oiyeirie abanto abange, ee, oitire omogaanda omonene. ⅩⅩⅦ Enyomba yaye nero enchera ekogeenda aase abakuure; ee, enchera eyio nigo egosoa ase chiero chi’amakweri.