Ⅷ
Obong’aini Bogotogigwa
Ⅰ Inee! Obong’aini tibori korangeria? Okomanya tikori goaka eriogi rinene?
Ⅱ Obong’aini nigo bogotenena aase aimokererete igoro, ang’e n’enchera engendi,
nigo bokobeera ase amatabekania ye chiinchera.
Ⅲ Mbarabare ase ebiita bosio bw’omochie ase ebisoero bi’ebiita
nigo bogokwana neriogi rinene, bwateeba;
Ⅳ “Inwe abanto, ninwe ’nkorangeria;
eriogi riane nigo rigochera Mwanyabaanto.
Ⅴ Inwe abamotamanyeti amaange, egera obong’aini;
na inwe abariri, egera okomanya.
Ⅵ Tegerera moigwe, ekiagera nigo ’ndakwane amang’ana amaya mono;
amang’ana akorwa ase omonwa one nay’oboronge.
Ⅶ Amang’ana ’ngokwana nay’ekeene;
amang’ana y’obobe nigo are okogechia ase ebikoba biane.
Ⅷ Amang’ana ane onsi ’ngokwana nigo are ay’oboronge,
ande tari are ay’oborimo, gose ay’obokorekanu.
Ⅸ Nigo akoigweka buya ase omonto oyio okoyamanya,
naende namaronge ase abwo banyorire chiseemi.
Ⅹ Ancha amorokererio ane kobua efeta,
ne chiseemi kobua etaabu echenire.
Ⅺ “Obong’aini nigo bore obuya kobua amagena akomeka‐meka aye rigori rinene,
tibokoreng’anigwa n’ebinto bionsi bire ebiya biganeirie.
Ⅻ Inche obong’aini nakorire okomanya kwabeire obomenyo bwane,
nigo inde ne chiseemi, naende nimanyete kogamba buya.
ⅩⅢ Okomoiroka Omonene nokogecha obobe;
nigo ’ngechete oboenenu, na obwerori, norogendo orobe,
boigo namang’ana y’obong’ainereria.
ⅩⅣ Inche nigo ’nkorua ogoseemia na obong’aini bw’ekeene;
nigo inde nokomanya na okobua.
ⅩⅤ Ase obokonyi bwane abarwoti nigo bakogaamba,
na abagaambi nigo bakobeeka amachiiko y’ekeene.
ⅩⅥ Ase obokonyi bwane abagaambi nigo bakorwa oboronge,
boigo nabanene na abanachi ebiina bonsi.
ⅩⅦ Nigo nyanchete abwo banyanchete;
na abwo bakondigia n’omokia ’mbanyore.
ⅩⅧ Ninche ’nkorua obonda, na esiko,
boigo obotenenku na oboronge bitari koera.
ⅩⅨ Okwama nkorua nigo kore okuya kobua etaabu, ee, kobua etaabu engiya,
na ebitoki ’nkorua ’mbibuete efeta enchore.
ⅩⅩ Nigo ’nkobwatia enchera y’oboronge,
naba ’ngotaara ase oboeto bw’ekeene.
ⅩⅪ Nigo ’nkoa abwo banyanchete obotenenku na goichoria chikungo chiabo.
ⅩⅫ Omonene nigo arenge nainche korwa omochakano bwe chiinchera chiaye,
agwo kare konya ataratonga kende gionsi;
ⅩⅩⅢ nao narenge korwa agwo kare na kare,
nonya nense konya etarabao.
ⅩⅩⅣ Inche nigo naiboretwe chindiba chitarabao,
nonya ne chinsoko chi’amaache.
ⅩⅩⅤ Nigo naiboretwe oboroso bw’ebitunwa botarabekwa,
na ebigoro bitarabao,
ⅩⅩⅥ ekero ataratonga ense ne riroba riaye,
nonya norotu.
ⅩⅩⅦ Ekero atongete igoro chionsi nao narenge,
boigo nekero abeekerete amaache chimbebe.
ⅩⅩⅧ Ekero abeegete igoro ekabao,
na ekero abeegete chinsoko chigosokia amaache korwa ase chindiba ne chinguru,
ⅩⅩⅨ na ekero abeekerete chinyancha chimbebe,
amaache tabaisa goetania ogochika kwaye;
na ekero abeegete amaroso y’ense nao narenge.
ⅩⅩⅩ Inche nigo narenge amo nere buna oyomanyete emeremo eyio buya.
Kera rituko nigo arenge kogokigwa nainche,
na inche ’nkaba inde nomogooko ase obosio bwaye botambe.
ⅩⅩⅪ Nigo nagokerete ense yaye emenyire nabaanto,
na nkaba nsasokerete Mwanyabaanto.
ⅩⅩⅫ “Na bono, inwe abana bane, ’ntegerere moigwe,
mbare n’omogooko abwo barendete chiinchera chiane,
ⅩⅩⅩⅢ Igwera amorokererio!
Ancha obong’aini, timobwanga!
ⅩⅩⅩⅣ Nasesenirie omonto oyio okonyigwera;
oyio okorenda ase ebiita biane kera rituko,
oganyete ase ebisieri biane.
ⅩⅩⅩⅤ Omonto onyorire inche, oyio onyorire obogima;
naende nancherwe n’Omonene.
ⅩⅩⅩⅥ Korende oyio otari nainche nigo akwenachera ekiina ere omonyene.
Bonsi abangechete nigo banchete amakweri.”