Ⅸ
Obong’aini Na Oboriri
Ⅰ Obong’aini nigo bweagacherete enyomba. Nigo bwebaacherete chisiiro isano na ibere.
Ⅱ Bwanyenyire ching’iti chiaye; bwochoganirie edivai yaye, bwariganirie emesa yaye.
Ⅲ Bwatomire abasomba baye abaiseke gochia aase aimokererete igoro mono yomochie korangeria abanto, bogoteeba:
Ⅳ “Oyo otamanyeti amaange, tiga ache aa!” Na ase oyore omoriri bwateeba:
Ⅴ “Inchuo orie endagera y’ane, na onywe edivai nochoganirie!
Ⅵ Tiga oboriri bwao, erinde obe moyo! Obwatie enchera y’okonyora okomanya!”
Ⅶ Omonto ogokuurera omonyacheche, nigo akwenyorera obororo; na oyogotogonyera omonto omokori amabe nigo akwenyorera ogochaaywa.
Ⅷ Tobaisa gokuurera omonto omochaayi; oyio nigo arakogeche. Kuurera omonto omong’aini, oyio nigo aragwanche.
Ⅸ Orokereria omonto omong’aini, oyio nigo arageenderere koba omong’aini goetania. Orokereria omonto omooronge, oyio namente koba ne chiseemi.
Ⅹ Okomoiroka Omonene, oyio n’oro omochakano bw’obong’aini, na okomomanya Oyore Omochenu nabwo obomanyi.
Ⅺ Ase ogokonywa kw’ane amatuko ao nabe amaange, na emiaka y’obogima bwao nementwe.
Ⅻ Korabe nobong’aini, borobwo ’mbooboseemia; korende korabe omochaayi, obochaayi obwo ’mbokoiranere.
ⅩⅢ Omokungu omoriri nigo are omonyariogi. Ere nigo are bosa, na tamanyeti ring’ana rinde.
ⅩⅣ Nigo agoikaransera ekerogo ase egesieri ki’enyomba yaye, agwo aase aimokererete igoro ase omochie,
ⅩⅤ aba okorangeria abaeti bare ase orogendo rwabo,
ⅩⅥ oteeba, “Onde bwensi otamanyeti amaange, tiga ache aa!” Na ase oyore omoriri oteeba,
ⅩⅦ “Amaache aibire nigo are amansu, na omogati okorierwa aase abobisi nigo ogwansa.”
ⅩⅧ Korende oyio ogosoa aroro tamanyeti ng’a amakweri nareo, naende ng’a abageni b’omokuungu oyio nigo bare agwo aase abakuure.