ⅭⅠ
Omorwoti okoria eira
(Ogosaba gwa Daudi)
Ⅰ Nintere igoro y’amaabera ao na oboronge bwao;
ningoterere aye Omonene.
Ⅱ Nigo nganetie na korenda enchera y’oboronge.
Inee! Ndiriri orache ase ’nde?
Nigo nganetie imbe norogendo ororonge ase enyomba yane imenyete.
Ⅲ Tinkobeeka ase obosio bwane ing’ana rinde rionsi ri’obobe;
nigo ngechete ogokora kw’abaanto bagotiga obwegenwa,
tinkonyara kobwatwa ne chingencho chiabo.
Ⅳ Nimbeere aare korwa ase abwo bare ne chinkoro chi’obokorekanu,
ring’ana rinde rionsi ri’obobe ribe aare nainche.
Ⅴ Ninsirie omonto okona‐gokwana bobe omonto onde bobisi,
tinkoremereria omonto omoenenu na omweanchi.
Ⅵ Amaiso aane narigereretie abegenwa bare ase ense,
abwo mbamenye amo nainche.
Omonto okobwatia chinchera chi’oboronge,
oyio nabe ogonkorera.
Ⅶ Omonto okwenaria obong’ainereria takomenya ase enyomba yane,
oyo ogoteeba oborimo takobeera ase obosio bwane.
Ⅷ Kera emambia nimbe ngosiria abakori amabe bonsi abare ase ense,
nindusie abakori ebibe bonsi korwa ase omochie O’ Omonene.