ⅭⅡ
Ekerero na ogosemeria
(Omonto ochandegete okorera ase Omonene)
Ⅰ Aye Omonene, igwa ogosaba kwane;
ekerero kiane tiga geike asore.
Ⅱ Tobaisa kobisa obosio bwao korwa ase ’nde ase engaki inde nemechando,
integerere onyigwe,
ong’iranerie bwango ase rituko ngokorangeria.
Ⅲ Amatuko ’obogima bwane nigo agoeta bwango na gosira buna erioki,
amauga ’omobere one nigo akoyia buna omorero bw’amakara.
Ⅳ Enkoro yane yaakirwe yabeire buna obonyansi bwagekirwe na kwoma;
nigo nkweba koria endagera yane,
Ⅴ ekiagera nigo ngendererete korera na kweumia,
amauga ’omobere one abwatanire ne chinyama chi’omobere one.
Ⅵ Inche nigo inga buna etigere ere ase erooro,
gose buna enyakweumia etigarete komenya aase amatuuri.
Ⅶ Tindi korara chitoro;
nigo inga buna enyoni etigarete yoka kerama igoro.
Ⅷ Ababisa baane nigo bagonchecheria omobaso boira;
abwo bangechete, kobakoragereria nigo bagwatora erieta riane.
Ⅸ Nigo nkoria ribu buna nkoria endagera,
na ekenyugwa kiane nigo ngokeburukania namariga,
Ⅹ ekiagera kwabeire nekeririanda na endamwamu ase ’nde.
Aye kwambwatire na gwantugutire gochia aare.
Ⅺ Amatuko aane nigo agoeta buna omorengari o mogoroba;
nasusanire buna obonyansi.
Ⅻ Korende aye Omonene nigo ore omogambi goika kare na kare;
erieta riao nigo rigendererete ase ebiaare bionsi.
ⅩⅢ Aye noimokerere igoro ororere Sayoni amaabera;
ekiagera eye nero engaki y’okoywancha;
ee, engaki eria yachigetwe yaikire.
ⅩⅣ Abasomba bao nigo banchete amagena aye,
na nigo bare namabeebe ase orotu rwaye.
ⅩⅤ Ebisaku bionsi mbiiroke erieta ri’Omonene,
na abarwoti bonsi b’ense mbairoke obonene bwaye.
ⅩⅥ Omonene naagache Sayoni naende,
nere orarorekane aroro ore ase obonene bwaye.
ⅩⅦ Nabe okoigwa ogosaba kw’abaanto batigirwe bosa,
tagochaaya ogosorora kwabo.
ⅩⅧ Amang’ana ayio tiga arikwe agachwe ase engencho y’ekiaare kegochi‐gocha,
erinde abanto abwo bataraiborwa, nabarabwo bache gotogia Omonene.
ⅩⅨ Korwa aaria igoro aase aye aachenu Omonene nigo arigereretie gocha aa,
ee, nigo arigereretie gocha ase ense,
ⅩⅩ erinde aigwe okweumia kw’abasibwa,
na gosibora abwo konya banacheirwe ekiina ki’ogokwa.
ⅩⅪ Erio abanto banyare koraria erieta ri’Omonene ase Sayoni,
na ogotogigwa kwaye agwo Yerusalemu,
ⅩⅫ ekero ekio abanto b’ebisaku bionsi mbasangererekane amo namarwoti
ase ogosasiima Omonene.
ⅩⅩⅢ Ere okeeirie chinguru chiane konde ase orogendo,
bweng’eirie amatuko aane.
ⅩⅩⅣ Nigo ngoteeba, Aye Nyasae one, takondusia aiga
ekero inde ase egati‐gati y’obogima bwane.
Omonene, aye nigo oreo kare na kare, ase ebiaare bionsi.
ⅩⅩⅤ Agwo kare nigo kwabegete oboroso bw’ense,
na igoro chionsi nigo chire emeremo y’amaboko ao.
ⅩⅩⅥ Echio chionsi nchisirigwe, korende aye nigo oreo kare na kare,
echio chionsi nchigote buna eanga,
ekiagera aye nigo ogochionchoreria buna eanga ekoonchorerigwa,
ee, nigo chirasirigwe kegima.
ⅩⅩⅦ Korende aye naye oria oria, na emiaka yao tekoba nomoerio.
ⅩⅩⅧ Abana b’abasomba bao mbamenye ase oborendi obuya,
ne chinderia chiabo chigenderere komenya ase obosio bwao.