ⅭⅢ
Komotogia Nyasae ase obwanchani bwaye obonene
(Ogoteera gwa Daudi)
Ⅰ Aye omoyo one, togia Omonene,
na bionsi ebire ime yane bitogie erieta riaye richenu.
Ⅱ Aye omoyo one, togia Omonene,
tobaisa kweba obuya bwaye bwonsi agokoreire.
Ⅲ Nere ogokwabera ebibe biao bionsi,
na kogwenia amarwaire ao onsi.
Ⅳ Nigo akobooria obogima bwao korwa ase embeera
na gokobekera egutwa y’obwanchani bogendererete botambe amo namaabera.
Ⅴ Ere nigo agoisanekia okogania kwao namaya,
erinde otigara koba omosae buna ekeongo kegwekerora.
Ⅵ Omonene nere okorua oboronge na ekeene
ase abwo bonsi bagokorerwa bobe.
Ⅶ Nere omanyekanetie chinchera chiaye ase Musa,
naboigo nogokora kwaye ase Abaisraeli.
Ⅷ Omonene nigo are omonyene amaabera na obuya,
tari omwango bw’okoba nendamwamu,
nigo are nobwanchani botari koera.
Ⅸ Ere tari kona‐gotogonyera ase chingaki chionsi,
gose takogenderera kogaacha endamwamu yaye botambe.
Ⅹ Omonene tari gotokorera aya togwenerete ase engencho y’ebibe biaito,
gose tari gotoa egesusuro koreng’ana nobobe bwaito.
Ⅺ Koreng’ana buna igoro ere aare mono korwa ase ense,
naboigo obwanchani bwaye bore obonene ase abanto bamoirogete.
Ⅻ Naende koreng’ana buna moocha ere aare mono korwa bosongo,
naboigo Omonene akorusia ebibe biaito korwa ase tore biabeera aare.
ⅩⅢ Koreng’ana buna ise abana akoba namaabera ase bare,
naboigo n’Omonene akoba namaabera ase abwo bamoirogete.
ⅩⅣ Ere nigo amanyete buna totongire,
nigo akoinyora ng’a nigo tore orotu bosa.
ⅩⅤ Amatuko ’omonto nigo anga buna obonyansi,
omonto nigo akoba buna egesicha gekoreereta ase omogondo;
ⅩⅥ ekero omwaga ogocha, okerusiao giasira kegima,
aase aye tari komanya ng’a nkiarengeo.
ⅩⅦ Korwa kare goika kare na kare obwanchani bw’ Omonene
nigo bore ase abwo bamoirogete,
na oboronge bwaye nigo borabe ase chinderia chiabo
ⅩⅧ ase abwo bakobwata okobwatana kwaye kw’ogotianania,
naende bakoinyora amachiiko aye na koyaigwera.
ⅩⅨ Omonene nigo abegete ekerogo kiaye ki’obonene aaria igoro,
na oborwoti bwaye nigo bokogambera onsi.
ⅩⅩ Inwe abamalaika b’Omonene, motogie;
inwe abamore ne chinguru chinene na mogokora aya agochika
ekero mwaigure eriogi rie ring’ana riaye.
ⅩⅪ Togia Omonene, inwe emeganda yaye yonsi,
na inwe abasomba baye, aba mogokora ogwancha kwaye!
ⅩⅫ Togia Omonene, inwe ebitongwa biaye bionsi,
motogie aande onsi ase akogamba.
Aye omoyo one, togia Omonene!