ⅭⅣ
Ogotogia Omotongi
Ⅰ Aye omoyo one, togia Omonene!
Omonene, Nyasae one, aye nigo ore omonene mono;
nigo bweboetie ogosikwa na obonene.
Ⅱ Aye nigo bwetubete oborabu buna ogwetuba egetambaa gi’okwambara,
kwaramboire igoro buna eema eramboire.
Ⅲ Aye nigo bwarete emiaro y’obomenyo bwao ase amaache,
gwakorire amare abeire egari yao,
nigo ogoeta kore ase chimbaaba chi’embeo.
Ⅳ Gwakorire abamalaika bao babeire chimbeo,
na abasomba bao babeire ebibemberi bi’omorero.
Ⅴ Aye nigo otenenetie ense bokong’u igoro ase amaroso aye,
tebaisa konyegerigwa nonya ng’ake.
Ⅵ Nigo kwayetubete chindiba buna eanga egotuba,
amaache akabeera igoro ase ebitunwa.
Ⅶ Ekero gwatogonyerete amaache ayio, nigo atamete,
na ekero aigwete eriogi riao ri’okogukura, nigo aayererete agatama.
Ⅷ Agatiira gochia ebitunwa igoro, na agatirimboka gochia ase amakura inse,
agaika aase kwayachikerete.
Ⅸ Nigo kwabegete chimbebe aase amaache atanyare goetania,
erinde tabaisa gotuba ense yonsi naende.
Ⅹ Nigo ogotubokia chinsoko ase amagoko,
amaache aba agoeta ase egati y’ebitunwa.
Ⅺ Chinsoko echio nigo chikoa ching’iti chionsi amaache chianywa,
ne chitigere chi’orosana nigo chikoyanywa, na erang’o yasira.
Ⅻ Chinyoni nigo chikomenya ang’e na chirochio,
nigo chikoba chigotera ekero chigwete ase chinsagia chi’emete.
ⅩⅢ Korwa agwo igoro ase omenyete, nigo ogotweria ebitunwa embura,
na ense nigo egoisaneka nokwama kw’emeremo yao.
ⅩⅣ Nigo okomeria obonyansi ching’iti chikorisia,
naende kwanyorera abanto ebimeri bagokorera,
na igo kwabanyorera chindagera korwa ase riroba.
ⅩⅤ Abanto nigo bakonywa edivai na baba nomogooko;
nigo bakweaka amaguta, bagirigenta amasio abo,
naende baria endagera, erinde emebere yabo yanyora chinguru.
ⅩⅥ Emete y’Omonene nigo egoisaneka namaache,
ee, emecharake ya Lebanoni, eyi’Omonene asimegete.
ⅩⅦ Chinyoni nigo chikoagacha ebiswa biabo ase emete eyio,
amaagonga nigo akoagacha ebiswa biabo aroro ase emetarakwa.
ⅩⅧ Ebitunwa ebitambe nabio bire obomenyo bwe chimbori chi’orosana,
emienya y’ebitare nero obotamero bw’ebisengi.
ⅩⅨ Aye kwabekire omotienyi obeire ekemanyererio gie chingaki,
na erioba nigo rimanyete boronge ekero rigwenerete kogwa.
ⅩⅩ Aye nigo okorenta omosunte bwaba botuko,
erio ching’iti chionsi chi’orosana chiachaka gotaara.
ⅩⅪ Chindo chinsae nigo chikoronya ekero chigotwara,
chiarigia endagera yabo korwa ase Nyasae.
ⅩⅫ Ekero erioba rigochia kooroka chiairana,
chiagenda korara ase amakuruma abo.
ⅩⅩⅢ Mwanyabaanto nigo bakogenda ase emeremo yabo,
bayekora goika mogoroba.
ⅩⅩⅣ Aye Omonene, naki ogokora kwao kore okonene!
Okwo gwonsi nigo okogokora nobong’aini,
ense nigo eichire nebitongwa biao.
ⅩⅩⅤ Enyancha nero enene naende engare; nigo eichire nebitongwa bire moyo bitari kobareka,
ebike na ebinene.
ⅩⅩⅥ Chimeeri nao chigoeta,
na Leviatani, eng’iti eria enene y’okwoboyia gwatongete, ekonagoswenenao.
ⅩⅩⅦ Ebitongwa ebio bionsi naye bisemeretie,
erio oe kera ekemo endagera yaye ase engaki egwenerete.
ⅩⅩⅧ Ekero kwabieire endagera, nigo bikoyesangereria;
ekero kwaramboire okoboko kwao, nigo bigoisaneka n’ebinto bire ebiya.
ⅩⅩⅨ Ekero kwabisire obosio bwao, nigo bikoba nobwoba obonene;
na ekero okobiura omoika obo, nigo bigokwa,
biairana ase amaroba ime.
ⅩⅩⅩ Ekero ogotoma omoika oo, nigo bigotongwa,
naende gwakora ense yaba enyia.
ⅩⅩⅪ Tiga obonene bw’Omonene bogenderere kobao kare na kare;
Omonene tiga agokere emeremo yaye.
ⅩⅩⅫ Ere nigo akorigereria ense, nero yatengecha,
nigo agokuna ebitunwa, na birobio biasokia erioki.
ⅩⅩⅩⅢ Ninterere Omonene ase obogima bwane bwonsi,
nimbe ngotera ase ogotogia Nyasae one ekero inde moyo.
ⅩⅩⅩⅣ Tiga Omonene agokigwe nebirengererio ebio biane,
ekiagera inche nigo ngogete asare.
ⅩⅩⅩⅤ Abanyabibe tiga basirigwe korwa ase ense,
abakori amabe tibaabaisa kobao.
Aye omoyo one, togia Omonene,
Motogie Omonene!