EGETABU KIA GATANO
ⅭⅦ
(107—150)
Obuya bwa Nyasae bogotogigwa
Ⅰ Moakere Omonene ng’a mbuya mono, ekiagera ere nomuya,
no’bwanchani bwaye nigo bogendererete goika kare na kare.
Ⅱ Abanto abw’Omonene abooretie tiga bakwane igo,
abwo aboretie korwa ase okoboko kw’omochaandi.
Ⅲ Obasangereirie obarentire korwa ase chinse ao ao,
korwa moocha na bosongo,
na korwa sugusu na Irianyi.
Ⅳ Abanto abwo nigo babete bakona goetanana ase erooro enyomo,
tibanyorete mochie onde ase baare komenya.
Ⅴ Nigo babete n’enchara amo n’erang’o
goika bakerusia moyo.
Ⅵ Erio bakarera ase Omonene ase engencho y’emechando yaabo,
ere akabatooria korwa ase obokong’u bwabo.
Ⅶ Akabaraa ase enchera endonge,
goika akabaikia ase omochie banyaarete komenya.
Ⅷ Tiga abanto baakere Omonene ng’a mbuya mono
ase engencho y’obwanchani bwaye bwa botambe
na ase emeremo y’ogokumia akobakorera Mwanyabaanto.
Ⅸ Omonene nigo agoisanekia oyore n’erang’o,
na oyore n’enchara omoigotia n’ebinto ebiya.
Ⅹ Abanto nigo bamenyete ase omosunte na ase ekiriri ki’amakweri,
nigo basibire ase emechando, basibeire chingataare,
Ⅺ ekiagera bangete koigwera ring’ana ria Nyasae,
bagachaaya ogoseemia kw’Oyore Igoro Mono.
Ⅻ Agakanya chinkoro chiabo ase okobaa obokong’u,
bakaiyerigwa inse, na monto onde tarengeo okobakoonya.
ⅩⅢ Erio bakarera ase Omonene ase engencho y’emechando yaabo,
ere akabatooria korwa ase obokong’u bwabo.
ⅩⅣ Akabarusia korwa ase omosunte ekerima,
akabutora chingataare basibeire.
ⅩⅤ Tiga baakere Omonene ng’a mbuya mono
ase engencho y’obwanchani bwaye bwa botambe,
na ase emeremo y’ogokumia akoreire Mwanyabaanto.
ⅩⅥ Ere nigo abunete ebisiekero bie chitaai,
na akabuna emekorogoto y’ebioma ekaba ebing’ese.
ⅩⅦ Abande bakariria, ekiagera babwatetie enchera y’ogosareka,
na bakaba bagochaandeka ase engencho y’ebibe biabo.
ⅩⅧ Kera endagera ekaba enguundo ase bare,
bakaba ang’e gosoa ase ebiita bi’amakweri.
ⅩⅨ Erio bakarera ase Omonene ase engencho y’emechando yaabo,
ere akabatooria korwa ase obokong’u bwabo.
ⅩⅩ Akabatomera ring’ana riaye, akabagwenia,
akabatooria korwa ase chimbeera.
ⅩⅪ Tiga baakere Omonene ng’a mbuya mono
ase engencho y’obwanchani bwaye bwa botambe,
na ase emeremo y’ogokumia akoreire Mwanyabaanto.
ⅩⅫ Tiga barue ebing’wanso bi’ogoaka ng’a mbuya mono,
naende bararie ogokora kwaye ase ogoteera n’omogooko.
ⅩⅩⅢ Abwo bageendete ne chimeeri ase enyancha,
bagakora oboonchoreria ase chinyancha chinene,
ⅩⅩⅣ mbaarooche ogokora kw’Omonene,
ee, ogokora kwaye kw’ogokumia ime ase chindiba.
ⅩⅩⅤ Ere agachiika ekembugu‐mbugu gekaimoka,
kerokio gekaimokereria igoro emerindo y’enyancha,
ⅩⅩⅥ Emerindo eyio ekaimokerera igoro, naende ekairana inse,
na ase ayio abanto bakerusia moyo ase omoichano.
ⅩⅩⅦ Bakaba bakoong’anya na gotabataba buna abanto batiindire,
na obong’aini bwabo bwonsi bokabaerera.
ⅩⅩⅧ Erio bakarera ase Omonene ase engencho y’emechando yaabo,
nere akabatooria korwa ase obokong’u bwabo.
ⅩⅩⅨ Agachiika ekembugu‐mbugu keria, kegakira‐kiri,
na emerindo y’enyancha egatoerera.
ⅩⅩⅩ Erio bakaba n’omogooko, ekiagera banyorete obotoereru,
n’Omonene akabaikia ase ekiambokero keria baganetie.
ⅩⅩⅪ Tiga baakere Omonene ng’a mbuya mono,
ase engencho y’obwanchani bwaye bwa botambe,
na ase emeremo y’ogokumia akoreire Mwanyabaanto.
ⅩⅩⅫ Tiga baabake Omonene agwo ase omosangererekano bw’ abanto,
bamotogie nase abagaaka bagoikaransa kogaamba.
ⅩⅩⅩⅢ Omonene akaonchora chindooche chikaba erooro,
ne chinsooko chikaba ense enyomo.
ⅩⅩⅩⅣ Akaonchora n’ense ere entobu ekaba ekerubo ki’omonyo,
ase engencho y’obobe bw’ abanto bamenyeteo.
ⅩⅩⅩⅤ Boigo akaonchora erooro ekaba ritibo riichire amaache,
na ense enyomo egatuboka chinsooko chi’amaache.
ⅩⅩⅩⅥ Aroro agwo nigo arentete abanto bare n’enchara;
barabwo bakaagaacha omochie aroro bakamenyao.
ⅩⅩⅩⅦ Barabwo nigo bakobusura emegondo, naende basimeka emesabibu,
bakanyora okwama okonene mono.
ⅩⅩⅩⅧ Omonene akabasesenia bagasarara mono,
tatigete omobaro bwe chitugo chiabo okee.
ⅩⅩⅩⅨ Ekero bakeetigwe na kworoba
ase engencho y’ogokorerwa bobe na gochaandwa,
ⅩⅬ Omonene agachaaya abanene baria babachaandete,
bakaba bakoong’anya ase chirooro chitari ne chinchera.
ⅩⅬⅠ Korende ere nigo akorusia abaremeire korwa ase emechando,
na obuchia chiamate chiabo chiaba buna amaicho.
ⅩⅬⅡ Abanyaboronge nigo bakorora amang’ana ayio na bagooka mono;
korende abakori amabe nigo bagokira‐kiri baumata.
ⅩⅬⅢ Omonto onde bwensi ore omong’aini, tiga aigwe amang’ana aya,
tiga arengererie mono amanye obwanchani bw’Omonene bogendererete botambe.