ⅭⅩⅥ
Omonto otoorigwe korwa ase amakweri ogotogia Nyasae
Ⅰ Nigo inyanchete Omonene,
ekiagera ere oiguure eriogi riane na ogosaba kwane.
Ⅱ Ere ontegereire onyiguure,
ase ayio, ekero ’nde moyo nimbe ’nkona‐komorangeria ng’a ankonye.
Ⅲ Ebisibo bi’amakweri nigo biang’etananete;
ekeondoko gi’aase abakuure gekambwata;
nigo nabeete n’emechando na omoichano.
Ⅳ Erio nkarangeria erieta ri’Omonene, ’ngasaba,
“Aye Omonene, nagosoroire ontoorie omoyo one.”
Ⅴ Omonene nigo are nobuya na oboronge;
Ere, Nyasae oito nigo are omonyamaabera.
Ⅵ Ere nigo akorenda abanto abakanyeku;
ekero nabeete ing’ichaanete, nigo antooretie.
Ⅶ Aye omoyo one, irana ase n’obotoereru bwao,
ekiagera Omonene ogokoreire amaya amange.
Ⅷ Aye Omonene kwarusirie omoyo one ase amakweri,
gwatinyirie amariga korwa ase amaiso aane,
kwarendire amagoro aane tindichaniwa ingwe.
Ⅸ Nimbe ’ngotaara ase obosio Omonene,
’nde ase ense y’ abanto bare moyo.
Ⅹ Nigo negenete, na ase engencho eyio ’ngakwana,
“Inche nigo ’nchaandegete mono”
Ⅺ na ase okwegosa kwane ’ngateeba,
“Kere omonto nomonyaborimo.”
Ⅻ Ngento ki ’ndarue ing’akane Omonene
ase engencho y’amaya aya ankoreire?
ⅩⅢ Ninyimokie egekombe ki’ogotooreka,
’ndangerie ase erieta ri’Omonene.
ⅩⅣ Ning’ikeranie chiira chiane ase Omonene
agwo ase amasio y’ abanto baye bonsi.
ⅩⅤ Nigo ere engencho enene ase amaiso y’Omonene ekero abanto baye abachenu bagokwa.
ⅩⅥ Nagosoroire, Omonene, inche nigo ’nde omosomba oo;
nigo ’nde omosomba oo, omwana bw’omokuungu ore omosomba oo.
Aye gwachisiboire chingataare korwa ase amagoro ane.
ⅩⅦ Ase ayio ninkoruere okoruegwa gw’ekeng’wanso ki’ogoaka ng’a mbuya mono,
naende ’ndangerie erieta ri’Omonene.
ⅩⅧ Ning’ikeranie chiira chiane ase Omonene
agwo ase amasio y’ abanto baye bonsi.
ⅩⅨ Ime ase chigoora chi’enyomba y’Omonene
gati‐gati yao aye Yerusalemu; Omonene atogigwe!