ⅭⅩⅤ
Nyasae bw’ekeene n’oyomo
Ⅰ Aye Omonene, intwe titobaisa gotogigwa,
korende erieta riao rioka ritogigwe,
ase engencho y’obwanchani bwao bwa botambe,
nase obwegenwa bwao.
Ⅱ Nase ki abanto b’ebisaku baraborie,
“Nyasae oyio obo ng’ai are?”
Ⅲ Nyasae oito niigoro are,
naende nigo agokora rinde rionsi aganetie.
Ⅳ Emegwekano abanto abwo bagosasiima nigo eroiseirie chifeta ne chitaabu,
nigo ere emeremo y’amaboko a Mwanyabaanto.
Ⅴ Nigo ebwate omonwa, korende teri gokwana,
nebwate amaiso, korende teri korora.
Ⅵ Nebwate amato, korende teri koigwa,
nebwate emioro, korende teri konyonka eigwe rimisu.
Ⅶ Nebwate amaboko, korende teri kobwata gento,
nebwate amagoro, korende teri gotaara;
gose tebwati eriogi ri’ogokwana korwa ase emioyo yaabo.
Ⅷ Abakoroisia emegwekano eyio nabo barabe buna ero ere;
na baria bayiegenete boigo.
Ⅸ Inwe Abaisraeli, mosemerie Omonene;
ere nere Omokonyi oino na enguba yaino.
Ⅹ Inwe ab’ororeeria rwa Aroni, mosemerie Omonene;
ere nere Omokonyi oino na enguba yaino.
Ⅺ Inwe abamoirogete Omonene, mosemerie Omonene;
ere nere Omokonyi oino na enguba yaino.
Ⅻ Omonene obeire ogotoinyora, natosesenie;
nasesenie Abaisraeli,
nasesenie ab’ororeeria rwa Aroni.
ⅩⅢ Ere nasesenie bonsi abamoirogete, abake na abanene.
ⅩⅣ Tiga Omonene abamentekanie,
inwe amo ne chinderia chiaino.
ⅩⅤ Mosesenigwe n’Omonene, oria otongete igoro na ense.
ⅩⅥ Igoro yonsi na aase aye ere Omonene ore igoro,
korende ense ero oyeire Mwanyabaanto.
ⅩⅦ Abakuure tibari gotogia Omonene,
na ase abwo bagendire aase aakiriru onde tari okomotogia.
ⅩⅧ Korende intwe ntogenderere gotogia Omonene,
korwa bono goika kare na kare.
Motogie Omonene!