ⅭⅩⅩⅩⅤ
Ogoteera kw’ogotogia Omonene
Ⅰ Motogie Omonene! Togia erieta ri’Omonene!
Inwe abasomba ba Omonene, motogie!
Ⅱ Inwe aba mogotenena ase enyomba y’Omonene,
agwo ase chigoora chi’enyomba ya Nyasae oito, motogie!
Ⅲ Motogie Omonene, ekiagera ere nigo are omuya,
terera erieta riaye, ekiagera nigo rire eriansu.
Ⅳ Omonene bwechooreire Yakobo,
bwechooreire Abaisraeli koba aba aye bori.
Ⅴ Inche nigo imanyete ng’a Omonene nigo are omonene;
ee, Omonene oito nigo are igoro ye’chinyasae chionsi.
Ⅵ Kende gionsi Omonene agwancha gokora nigo akogekora;
gokeraabe ase ense, gose igoro, gose ase enyancha, gose ase chindiba.
Ⅶ Nere okorenta amare korwa ase chinsinyo chi’ense;
nere okorenta chinkoba chire nembura,
na omwaga okogusa korwa ase ebigancha biaye.
Ⅷ Nere oitete abana abatangi ba Misiri,
ne ching’iti chintangi boigo.
Ⅸ Nere okorete ebikone na amakumia ase egati yao, aye Misiri,
na ase Farao amo nabasomba baye.
Ⅹ Omonene nigo asiretie ebisaku ebinge,
na agaita abarwoti barenge ne’chinguru;
Ⅺ Sihoni, omorwoti bw’Abaamori,
na Ogi, omorwoti o Basani;
boigo agasiria amarwoti onsi a Kaanani.
Ⅻ Ense y’ebisaku ebio akayea Abaisraeli, abanto baye,
ekaba omwando obo.
ⅩⅢ Aye Omonene, erieta riao nigo rigendererete kobao goika kare na kare.
Nobe gokoinyorwa nebiaare bionsi.
ⅩⅣ Omonene narwanerere abanto baye,
narorere abasomba baye amaabera.
ⅩⅤ Emegwekano egosasiimwa n’abanto b’ebisaku
nigo eroisirie korwa ase chifeta ne chitaabu;
nigo ere emeremo y’amaboko a Mwanyabaanto.
ⅩⅥ Nigo ebwate emenwa, korende teri gokwana,
nebwate amaiso, korende teri korora,
ⅩⅦ nebwate amato, korende teri koigwa,
gose tebwati omoika bw’okoeyana.
ⅩⅧ Abakoroisia emegwekano eyio nigo banga buna ero,
ee, naboigo abwo bonsi bayiegenete.
ⅩⅨ Inwe Abaisraeli, togia Omonene!
Nainwe ab’ororeeria rwa Aroni, togia Omonene!
ⅩⅩ Inwe ab’ororeeria rwa Lawi, togia Omonene!
Nainwe abamoirogete Omonene, motogie!
ⅩⅪ Omonene tiga atogigwe korwa Sayoni,
Omonene oria omenyete Yerusalemu.
Motogie Omonene!