ⅭⅩⅩⅩⅥ
Okoiraneria ng’a mbuya mono ase Nyasae
Ⅰ Moakere Omonene ng’a mbuya mono, ekiagera ere nomuya;
obwanchani bwaye nigo bogendererete goika kare na kare.
Ⅱ Moakere Nyasae, oyobuete chinyasae, ng’a mbuya mono,
ekiagera obwanchani bwaye nigo bogendererete goika kare na kare.
Ⅲ Moakere Omonene bw’abanene ng’a mbuya mono,
ekiagera obwanchani bwaye nigo bogendererete goika kare na kare.
Ⅳ Nere bweka okorete amakumia amanene,
ekiagera obwanchani bwaye nigo
bogendererete goika kare na kare.
Ⅴ Ere ase obong’aini bwaye nigo atongete igoro,
ekiagera obwanchani bwaye nigo bogendererete goika kare na kare.
Ⅵ Ere oramborete ense, akayiaara ase amaache,
ekiagera obwanchani bwaye nigo bogendererete goika kare na kare.
Ⅶ Ere okorete emebaso eria emenene,
ekiagera obwanchani bwaye nigo bogendererete goika kare na kare.
Ⅷ Akabeeka risase rigambe mobaso,
ekiagera obwanchani bwaye nigo bogendererete goika kare na kare.
Ⅸ Akabeeka omotienyi ne ching’enang’eni bigambe botuko,
ekiagera obwanchani bwaye nigo bogendererete goika kare na kare.
Ⅹ Ere nigo aitete abana abatangi ba Misiri, ne ching’iti chintangi boigo,
ekiagera obwanchani bwaye nigo bogendererete goika kare na kare.
Ⅺ Erio akang’anyia Abaisraeli korwa ase Abamisiri,
ekiagera obwanchani bwaye nigo bogendererete goika kare na kare.
Ⅻ Akabarusia aroro n’okoboko kwaye gwe chinguru koramboire,
ekiagera obwanchani bwaye nigo bogendererete goika kare na kare.
ⅩⅢ Ere nigo aatananete Enyancha Embariri,
ekiagera obwanchani bwaye nigo bogendererete goika kare na kare.
ⅩⅣ Erio akaambokeria Abaisraeli aroro,
ekiagera obwanchani bwaye nigo bogendererete goika kare na kare.
ⅩⅤ Ere akarimeria Farao amo nemeganda yaye ase Enyancha Embariri,
ekiagera obwanchani bwaye nigo bogendererete goika kare na kare.
ⅩⅥ Ere nigo araaete abanto baye goetera ase erooro,
ekiagera obwanchani bwaye nigo bogendererete goika kare na kare.
ⅩⅦ Ere nigo aitete abarwoti barenge ne’chinguru,
ekiagera obwanchani bwaye nigo bogendererete goika kare na kare.
ⅩⅧ Ere nigo aitete abarwoti abaakumete,
ekiagera obwanchani bwaye nigo bogendererete goika kare na kare.
ⅩⅨ Agaita Sihoni, omorwoti bw’Abaamoni,
ekiagera obwanchani bwaye nigo bogendererete goika kare na kare.
ⅩⅩ Agaita na Ogi, omorwoti o Basani,
ekiagera obwanchani bwaye nigo bogendererete goika kare na kare.
ⅩⅪ Akabaura chinse chiabo chikaba omwando bw’ abanto baye,
ekiagera obwanchani bwaye nigo bogendererete goika kare na kare.
ⅩⅫ Chinse echio chikaba omwando bw’Abaisraeli, abasomba baye,
ekiagera obwanchani bwaye nigo bogendererete goika kare na kare.
ⅩⅩⅢ Ere nigo atoinyorete ekero twarenge aboororo,
ekiagera obwanchani bwaye nigo bogendererete goika kare na kare.
ⅩⅩⅣ Ere nigo atotooretie korwa ase ababisa baito,
ekiagera obwanchani bwaye nigo bogendererete goika kare na kare.
ⅩⅩⅤ Ere nigo akorua endagera oa ebitongwa bionsi bire moyo,
ekiagera obwanchani bwaye nigo bogendererete goika kare na kare.
ⅩⅩⅥ Moakere Nyasae o igoro ng’a mbuya mono,
ekiagera obwanchani bwaye nigo bogendererete goika kare na kare.