ⅭⅩⅬⅤ
Ogotogia obonene na obuya bwa Nyasae
(Ogoteera gwa Daudi)
Ⅰ Aye Nyasae one na omorwoti one, ninkobaake,
nimbe ’ngotogia erieta riao goika kare na kare.
Ⅱ Kera rituko nimbe ’nkogotogia,
nintogie erieta riao goika kare na kare.
Ⅲ Omonene nigo are omonene, nagwenerete atogigwe mono;
obonene bwaye tibokomanyekana buna bore.
Ⅳ Emeremo yao netogigwe ebiaare ase ebiaare.
Mbirarie ogokora kwao kore okonene.
Ⅴ Nimbe ’nkorengereria mono igoro y’obonene bwao bw’ogosikwa okonene,
na igoro y’emeremo yao y’ogokumia.
Ⅵ Abanto ’mbabe bakoraria ogokora kwao okonene gw’okoirokia,
nainche nimbe ’nkoraria obonene bwao.
Ⅶ Mbararie chinkuma chi’obuya bwao obonge,
babe bagotera namariogi amanene gotogia oboronge bwao.
Ⅷ Omonene nigo are nobwanchani obonge, na amaabera amange;
tari omwango ase okoba n’endamwamu,
nigo aichire nobwanchani bogendererete botambe.
Ⅸ Omonene nigo are omuya ase abanto bonsi,
naende nigo are namaabera ase ebitongwa biaye bionsi.
Ⅹ Aye Omonene, ebitongwa biao bionsi nigo bikogoakera ng’a mbuya mono,
na abachenu bao bonsi mbagotogie.
Ⅺ Mbabe bakoraria obonene bw’oborwoti bwao,
naende babe bagokwana igoro y’okobua kwao,
Ⅻ bamanyie Mwanyabaanto ogokora kwao okonene,
na obonene bw’ogosikwa kw’oborwoti bwao.
ⅩⅢ Oborwoti bwao nobwa kare na kare,
na okogambera kwao nigo kogendererete ase ebiaare bionsi.
Omonene nigo are omwegenwa ase amang’ana aye onsi,
na oichire nobuya ase ogokora kwaye gwonsi.
ⅩⅣ Omonene nigo akobwata bonsi abakogwa,
nigo akogororokia abwo bakumbirwe gochia inse.
ⅩⅤ Amaiso y’ebitongwa bionsi nigo akorigereretie nogosemeria,
naye nigo okobia chindagera chiabo ase chingaki chigwenerete.
ⅩⅥ Aye nigo okomaanora okoboko kwao,
kwarua ebisio na goisanekia kera egetongwa kere moyo.
ⅩⅦ Omonene nigo are omonyene oboronge ase chinchera chiaye chionsi,
na omuya ase ogokora kwaye gwonsi.
ⅩⅧ Omonene nigo are ang’e ase abanto abwo bakomorangeria;
abwo bonsi bakomorangeria ase ekeene.
ⅩⅨ Omonene nigo agoikeraneria abamoirogete okogania kwabo;
boigo nigo akoigwa ekerero kiabo na kobatooria.
ⅩⅩ Omonene nigo arendete bonsi abamwanchete;
korende nasirie abakori amabe bonsi.
ⅩⅪ Omonwa one nobe ogokwana ogotogigwa kw’Omonene;
tiga ebitongwa bionsi bitogie erieta riaye richenu
bono na goika kare na kare.