ⅩⅥ
Ogosaba gw’okonyora oboremu
(Ogoteera gwa Daudi)
Ⅰ Aye Nyasae, gaki ondende,
ekiagera naye ngotamera.
Ⅱ Nigo ngoteebia Omonene iga: “Aye naye Omonene one,
obuya bwonsi ’nde nabwo nigo bokorwa asore.”
Ⅲ Abanto abachenu bare ase ense nigo bare nobonene bokumete;
abwo nabwo bangogeetie mono.
Ⅳ Abwo bakominyokera chinyasae ching’ao,
nigo bakwementera emechando.
Tinkoumora okoruegwa kw’amanyinga okwo bakorua,
gose tingwatora amarieta abo n’ebikoba biane.
Ⅴ Omonene nere egetare kiane;
nere okong’a onsi aya ’ngwenerete konyora;
ere igo arendete aya antungetie.
Ⅵ Ebintungetie biangwereire agwo aase are aagiya,
ee, omwando one nigo ore omuya mono kegima.
Ⅶ Nigo ngotogia Omonene oyo ogonsemia,
ase obotuko enkoro yane nigo egonteebereria gokora igo.
Ⅷ Botambe, nigo ndigereretie Omonene;
ere nigo are ensemo yane y’okorio, igo tinkwoboa.
Ⅸ Ase igo, enkoro yane amo n’omoyo one nigo bire nomosasoko;
nonya n’omobere one nigo omenyete ase ogosemeria.
Ⅹ Aye Omonene, togontiga agwo aase abakuure
gose togotiga omochenu oo agunde.
Ⅺ Aye Omonene, nonyorokererie enchera ekogenda ase obogima;
ase obosio bwao noreo omogooko omonge mono kegima;
ase ensemo yao y’okorio mboreo obwansu obuya goika kare na kare.