ⅩⅦ
Ogosaba kw’omonto otari na komocha
(Ogoteera gwa Daudi)
Ⅰ Aye Omonene, tegerera oigwe okogania kwane kw’ogokorerwa oboronge,
igwa okorera kwane na ogosaba kwane,
omonwa one tori gokwana obong’ainereria.
Ⅱ Aye omonyene onachere ekiina gi’okong’a oboronge,
amaiso ao nigo akorora ayare ay’ekeene.
Ⅲ Aye Omonene, kwarengire enkoro yane,
nonya nase obotuko nigo ogonteema,
kwauna-unirie na tonyoreti gento,
amabe are ase enkoro yane tinkoyakwana.
Ⅳ Mang’ana ande onsi abanto bagokora,
na koreng’ana namang’ana ao
natigire kobwatia chinchera chi’abasaria.
Ⅴ Nabeire nkobwatia chinchera chiao botambe;
amagoro aane tana-gotererigwa.
Ⅵ Nyasae, nigo ngokorangeria ng’a onkonye, ekiagera aye nong’itabere;
tegerera oigwe amang’ana aane ngokoboria.
Ⅶ Aye Omotooria bw’abagotamera
okoboko kwao kwa borio korwa ase ababisa babo,
oorokia obwanchani bwao bw’ogokumia.
Ⅷ Indende buna orendete endorero y’eriso riao;
intube ase ekiriri gie chimbaaba chiao;
Ⅸ mbise korwa ase abakori amabe, abarigetie gonsiria,
korwa ase ababisa bang’etanaine bang’ite.
Ⅹ Abanto abwo bare ne chinkoro chitari namaabera
nigo bagokwana amang’ana ’oboenenu.
Ⅺ Bono bang’etananire ase chinsemo chionsi;
banaaririe, erinde bambwate na konyiyeria inse.
Ⅻ Barabwo nigo banga buna endo eganetie orotwari;
buna endo ensae eboete ase egesarara.
ⅩⅢ Omonene, gaki imoka! Orwanie ababisa baane obabue!
Ntoorie korwa ase abakori amabe ase okobarwania n’omoro oo.
ⅩⅣ Ee, Omonene, ntoorie nokoboko kwao korwa ase abanto abwo.
Barabwo nabaanto b’ense eye, egetari kiabo neki’obogima obo.
Chinda chiabo chiisaneke n’ebinto ebio kwabagacheire,
biisane nase abana babo,
naende abachokoro babo batigerwe ebiatigaire.
ⅩⅤ Korende inche nindore obosio bwao inde noboronge;
ekero ndabokigwe ning’isaneke ase ogokorora.