ⅩⅧ
Ogoteera gwa Daudi kw’obobui
(2 Sam 22:1-15)
(Ogoteera Daudi, omosomba bw’Omonene, atererete Omonene, ekero Omonene amotooretie korwa ase Saulo na ababisa bande)
Ⅰ Aye Omonene, aye chinguru chiane, ningwanchete mono!
Ⅱ Omonene nere egetare kiane na eburi yane y’ogokumia,
nere Omotooria one, na Nyasae one,
Nyasae one nere egetare kiane ’ndatamere;
nere enguba egonkengera, na Omotooria one bw’echinguru,
oyo ogonkengera bokong’u.
Ⅲ Nindangerie Omonene, oyo ogwenerete gotogigwa,
nigo arantoorie korwa ase ababisa baane.
Ⅳ Obororo bw’amakweri bokong’etanana,
chiooro chi’obobe chikandetera obwoba.
Ⅴ Obobe bw’amakweri nigo bwang’etananete,
emeeto y’amakweri egantega na kombwata.
Ⅵ Ase emechando yane nkarangeri’Omonene,
nkarera ase Nyasae one ng’a ankonye.
Korwa ase Hekalu yaye akaigwa eriogi riane,
ekerero kiane gekamoikera, ere agakeigwa.
Ⅶ Erio ense ekanyegerigwa na koondoka,
na amaroso ’ebitunwa agatengechigwa.
Ee, ense ekaiguswa, ekiagera Omonene arenge nendamwamu.
Ⅷ Erioki rigasoka korwa ase chimioro chiaye,
na omorero ogosamba ogasoka korwa ase omonwa oye;
ee, omorero bw’amakara ogasoka korwa asare.
Ⅸ Akang’usa igoro gocha inse aa, agacha;
riire rimwamu rikaba inse y’amagoro aye.
Ⅹ Akariina egetongwa kebwate chimbaba, akairuruka,
agacha ng’ora igoro ye chimbaaba chi’embeo.
Ⅺ Agakora omosunte koba egietubo kiaye ere omonyenye,
na amare amarito aichire amaache.
Ⅻ Korwa ase obomeka-meku obwo bwarenge bosio bwaye
amagena ’embura na omorero bw’amakara
bigasoka goetera ase amare aye.
ⅩⅢ Omonene agaaka enkoba korwa igoro;
na eriogi ri’Oyore Igoro Mono rikaigugwa;
amagena ’embura na omorero bw’amakara bigacha.
ⅩⅣ Akaruta emegwe yaye, agaserebania ababisa baye;
akamesia chinkoba, akabatantania.
ⅩⅤ Erio ebiambokero bi’enyancha bikarorekana,
na amaroso ’ense akaorokigwa aarabu,
ekero Omonene abatogonyerete
ase ogwoka kw’omoika bwe chimioro chiaye.
ⅩⅥ Omonene akarambora okoboko kwaye korwa igoro, akambwata,
akandusia ase amaache amange.
ⅩⅦ Agantooria korwa ase omobisa one ore ne chinguru,
na korwa ase abwo bangechete;
barabwo nigo barenge ne chinguru kombua.
ⅩⅧ Ekero narenge nemechando bakandwania,
korende Omonene akaba egekengero kiane.
ⅩⅨ Akang’ira aase arenge aagare;
agantooria, ekiagera namogogetie.
ⅩⅩ Omonene nigo ang’ete eng’eria y’obuya, ekiagera inde omooronge,
nigo ansesenetie, ekiagera inde namaboko atari na komocha.
ⅩⅪ Inche nabeire nkobwatia chinchera chia Omonene,
tintigeti Nyasae one ase ogokora obonyaka.
ⅩⅫ Nabeire nkorenda amachiiko aye onsi,
na timbeti ngotiga emeroberio yaye echiikire.
ⅩⅩⅢ Nigo narenge omoikeranu asare,
nkerenda korwa ase obobe.
ⅩⅩⅣ Omonene ong’akanire, ekiagera ngokora ayare boronge,
na ekiagera aroche ng’a amaboko aane achenekire.
ⅩⅩⅤ Aye Omonene, nigo ore omwegenwa ase abwo bare abegenwa,
nigo okweorokia ng’a nomoikeranu ore ase abwo bare abaikeranu.
ⅩⅩⅥ Aye nigo ore omochenu ase abwo bare abachenu;
nigo okwanga abwo bare abakorekanu.
ⅩⅩⅦ Aye nigo ogotooria abanto bare abaitongo,
korende abwo bare namaiso ’oboenenu nigo okobairania inse.
ⅩⅩⅧ Ee, naye ogontongeria etaya yane;
Omonene, Nyasae one, nigo akomoreka omosunte ore asende oba oborabu.
ⅩⅩⅨ Konde amo naye, nigo ndasirie omoganda bw’esegi;
na ekero inde na Nyasae one nincharoke chindwaki igoro.
ⅩⅩⅩ Enchera ya Nyasae neng’ikeranu,
amang’ana aye ateemirwe na gotenena.
Ere nenguba ase bonsi abakomotamera.
ⅩⅩⅪ Inee! Ning’o ore Nyasae, otatiga Omonene?
Ning’o ore egetare, otatiga Nyasae oito?
ⅩⅩⅫ Nyasae nere okomboyia chinguru
na kondenda ase enchera yane.
ⅩⅩⅩⅢ Ere okorire amagoro aane abeire buna ey’egesia,
onkong’irie na gontenenia ase ebitunwa.
ⅩⅩⅩⅣ Ere bworokereirie amaboko aane korwana esegi,
erinde amaboko aane anyare gotinga obota bw’etai.
ⅩⅩⅩⅤ Aye kwang’eire enguba yao ase ogontooria,
okoboko kwao gw’okorio kogansiira;
na ogokonywa kwao gwankorire nabeire omonene.
ⅩⅩⅩⅥ Kwang’eire aase aagare ngotaara,
na amagoro aane tagotererigwa.
ⅩⅩⅩⅦ Nkabwatia ababisa baane, nkabaikeera inchera;
gose tinairanete goika nkabakoora.
ⅩⅩⅩⅧ Nkabaaka inse nkabasenyenta, tibanyara koimoka,
bakagwa inse y’amagoro aane, bakabugwa.
ⅩⅩⅩⅨ Aye nigo kwambegete chinguru chi’okorwana esegi;
okabeka ababisa baane inse y’amagoro aane.
ⅩⅬ Ogakora ababisa baane bagatama korwa asende;
abangechete nkabasiria kegima.
ⅩⅬⅠ Abanto aba bakarera ng’a bakonywe, korende onde tarenge obatooretie,
bakarangeri’Omonene, korende ere tabaigwa.
ⅩⅬⅡ Nkabasunyunta bakaba ebuse ekoirurukigwa nomwaga;
nkabatuguta buna ngotuguta esike ase enchera.
ⅩⅬⅢ Aye gwantooririe korwa ase okoamererania nabaanto,
kwambekire nabeire omogambi bw’abaanto b’ebisaku;
abanto ntamanyete, bono babeire abasomba baane.
ⅩⅬⅣ Ekero baigure chinkuma chiane nigo bakonyigwera;
abamenyi nigo bagocha bebeka inse yane.
ⅩⅬⅤ Abanto b’ebisaku ebiaao berusirie moyo
kobagosoka korwa ase chiburi chiabo, nigo bakoiguswa.
ⅩⅬⅥ Omonene nigo are moyo! Ere oyore egetare kiane atogigwe!
Nyasae ore ogotooreka kwane aimokererigwe igoro.
ⅩⅬⅦ Nyasae nigo akonduseria egesiomba,
nabeeke abanto b’ebisaku inse yane.
ⅩⅬⅧ Ere nigo antooretie korwa ase ababisa baane,
akanyimokereria igoro ase abare mamincha yane,
naende agantooria korwa ase abanto abatindi.
ⅩⅬⅨ Aye Omonene, ase ayio ningotogie ase egati y’abanto b’ebisaku,
ninterere erieta riao ase okoritogia.
Ⅼ Nyasae ong’eire inche, omorwoti oye, obobui obonene,
oorokirie obwanchani botari koera asende, inche omoakwa amaguta oye.
Inche Daudi, na ororeria rwane, goika kare na kare.