ⅩⅨ
Obonene bwa Nyasae ase Obotongi
(Ogoteera gwa Daudi)
Ⅰ Igoro nigo chikoorokia obonene bwa Nyasae;
na eaanga ya igoro eraria emeremo y’amaboko aye.
Ⅱ Rituko erimo riatebia erinde obonene obo,
na obotuko obomo bwarareria obotuko bonde ayio ayio.
Ⅲ Chinkwana chinde tichiri aroro, gose omonwa onde ogokwanwa tori,
na eriogi riabo tiriri koigugwa.
Ⅳ Eriogi riabo riagendire, riesiareire ase ense engima,
na amang’ana abo aikire chinsinyo chi’ense.
Nyasae okorire igoro koba obomenyo bw’erioba.
Ⅴ Erioba nigo rigosoka buna omonywomi ogosoka korwa mwaye,
na riagoka buna omogosoria omokong’u okominyoka chimbero.
Ⅵ Nigo rigosoka korwa ensemo eyemo ya igoro,
naende riekumba riagenda gochia ensemo ende;
gento kende tikeri gekobisekana korwa ase riberera riaye.
Amachiiko y’Omonene
Ⅶ Amachiiko ’Omonene namaikeranu,
nigo agokora omoyo oba omoyia.
Oborori bw’Omonene nobw’ekeene,
nigo akong’ainiyia oyotamanyeti amange.
Ⅷ Amachiiko ’Omonene namaronge,
nigo akogokia enkoro;
ring’an’Omonene achiikire nerironge,
nigo rikorenta oborabu ase amaiso.
Ⅸ Okomoiroka Omonene nering’ana richenegete,
okwo koragenderere kare na kare;
okogamba kw’Omonene nogw’ekeene, na okw’oboronge.
Ⅹ Ayio onsi nigo are amaya kobua etaabu, ee, kobua etaabu echenire
na amansu kobua obooke,
ee, kobua richoe ri’obooke.
Ⅺ Amo nayio nigo ogokuurera omosomba oo;
oyio okoyarenda nigo akoegwa eng’eria enene y’obuya.
Ⅻ Ning’o oranyare komanya amamocho aye?
Omonene, nchene korwa ase amamocho aane abisekanete.
ⅩⅢ Ontange inche, omosomba oo, tinkora ebibe bi’obomwenu;
tobitiga ebio bingambere!
Rirorio nimbe ntari na komocha,
nimbe omosibore korwa ase ogosaria okonene.
ⅩⅣ Aye Omonene, Egetare kiane na Omobooria one,
anchera amang’ana aane na ebirengererio bire ase enkoro yane.