ⅩⅫ
Okorera kw’obororo n’ogotera kw’ogotogia
(Ogoteera gwa Daudi)
Ⅰ Nyasae one, aye Nyasae one, naki gwantigire iga?
Nabeire nkorera ontoorie, korende kwambeereire aare.
Ⅱ Aye Nyasae one! Nigo nkorera botuko bokia, korende tori kong’iraneria;
nase obotuko boigo, korende tindi konyora ogotimoka.
Ⅲ Nonya naboigo, aye nigo ore omochenu;
obonene nobwao, naye ogotogigwa n’Abaisraeli.
Ⅳ Chisokoro chiaito nigo chiagosemeretie,
ee, nigo chiagosemeretie, naye ogachitooria.
Ⅴ Barabwo nigo barerete asore, bakanyora ogotooreka,
nigo babete bagosemeretie, na tibasoogetigwe.
Ⅵ Inche nerikonde, tindi omonto,
nigo ngochecherigwa na gochaywa n’abanto.
Ⅶ Abanto bonsi abakondora nigo bagonchecheria na gonsekerera;
nigo bagoaka eriogi asende na gosinga‐singisia emetwe yabo,
Ⅷ bagoteeba: “Omonto oyo nigo asemeretie Omonene ng’a namotoorie,
tiga amotoorie bono, ekiagera agokirie nere!”
Ⅸ Omonene, naye kwandusetie ase enda ya baba;
naye kwabete gokondenda buya ase amaboko a baba.
Ⅹ Nigo narutetwe asore korwa ase okoiborwa kwane,
na korwa ekero narenge ase enda ya baba naye kwarenge Nyasae one.
Ⅺ Tobaisa kobeera aare korwa asende, ekiagera emechando nigo ere ange,
na monto onde tari orankonye.
Ⅻ Chieri chinyinge nching’etanaine,
ee, chieri chiria chia Basani chire ne chinguru nigo ching’etanaine.
ⅩⅢ Baasamirie emenwa yabo gocha asende,
yabeire buna chindo chikoronya na koruma.
ⅩⅣ Nabeire buna amaache aiteirwe ’nse;
amauga onsi ay’omobere one atengokire na achoga‐chogire;
enkoro yane yabeire buna obochoe, yanyititokire ime yane.
ⅩⅤ Chinguru chiane chiang’ereire,
omoyo one bwomire pa buna ekegonkorio,
oromeme rwane rwabwatanire namang’ang’ura;
aye kwanyareirie ase amaroba nkwete.
ⅩⅥ Abakori amabe nigo bang’etanaine korwa kera aase,
ee, nigo bang’etanaine korwa chinsemo chionsi buna ekeombe gie chisese;
bambetire ebisanyi bi’amaboko, na ebi’amagoro boigo.
ⅩⅦ Amauga ’omobere one atongororokire nabo ’nkoyabara;
abanto nigo bakondigereria na kogokera obobe bwane.
ⅩⅧ Baatananire chianga chiane ase egati yabo;
baakeire eganchwa yane obomera.
ⅩⅨ Korende aye Omonene, tobeera aare korwa asende;
aye ore chinguru chiane, koranche, ayerera onkonye!
ⅩⅩ Ntoorie korwa ase omoro bw’amakweri,
tooria obogima bwane korwa ase okobua gwe chisese chiria!
ⅩⅪ Ntoorie, ondusie ase emenwa ye chindo chiria;
nkonya korwa ase ching’unchara chie ching’era!
ⅩⅫ Omonene, nindarie erieta riao ase abanto baminto,
ase egati y’omosangererekano ningotogie.
ⅩⅩⅢ Inwe abamoirogete Omonene, motogie!
Inwe mwensi ab’ororeria rwa Yakobo, togia obonene bwaye!
Inwe Abaisraeli bonsi, moiroke!
ⅩⅩⅣ Omonene tari gochaaya emechando y’abwo bachandegete, gose koyegecha,
gose tabiseti obosio bwaye korwa ase bare;
korende ekero bamorangeretie nigo abaigwete.
ⅩⅩⅤ Ekero ’nde ase omosangererekano omonene ningotogie.
Chiira nariete ning’ikeranie agwo ase obosio bw’abaanto bamoirogete Omonene.
ⅩⅩⅥ Abwo bare abaitongo mbanyore endagera barie baigote.
Abanto bakorigia Omonene mbabe bakomotogia,
ne chinkoro chiaino nchigenderere koba moyo goika kare na kare.
ⅩⅩⅦ Abanto b’echinsemo chionsi chi’ense mbainyore Omonene, bamoonchokere;
chiamate chionsi chi’ebisaku nchimosasime.
ⅩⅩⅧ Omogambi Omonene, nere okogamba igoro ase ebisaku bionsi.
ⅩⅩⅨ Ee, abanto abatenenku bonsi bare ase ense
goika batung’ame ase obosio bw’Omonene,
abwo bonsi bakogenda ase chimbeera ime mbatung’ame ase obosio bwaye;
naboigo nabwo batanyare korenda obogima bwabo bogenderere.
ⅩⅩⅩ Abanto b’ororeria rwaye mbabe bakomokorera;
mbabe bagokwana igoro y’Omonene ase ebiaare bigochi‐gocha.
ⅩⅩⅪ Oboronge bwaye mbobe bokorarigwa ase abanto bataraiborwa,
ng’a ere oikeranirie onsi.