ⅩⅩⅤ
Ogosaba ase okonyora oboraai na oborendi
(Ogoteera gwa Daudi)
Ⅰ Aye Omonene, ngocha nde asore nomoyo one bwonsi.
Ⅱ Aye Nyasae one, naye nsemeretie, tontiga nsookigwe;
totiga ababisa baane bagokere okobugwa kwane.
Ⅲ Monto onde bwensi ogosemeretie totiga asookigwe;
korende abwo batigire obwegenwa engencho ende etaiyo basookigwe.
Ⅳ Omonene, imanyie chinchera chiao;
inyorokererie oboeto bwao.
Ⅴ Ondaae ase ekeene kiao na onyorokererie,
ekiagera aye Nyasae nogotooreka kwane,
aye nigo ngosemeretie.
Ⅵ Omonene, inyora amaabera ao na obwanchani bwao botari koera,
ekiagera nao biarenge korwa kare.
Ⅶ Aye Omonene, tobaisa koinyora ebibe na ogosaria bi’obosae bwane;
ong’inyore ase engencho y’obwanchani bwao bogendererete botambe,
na ase engencho y’obuya bwao.
Ⅷ Omonene nigo are omuya na ere nere omonyene oboronge,
ase ayio nigo akworokereria abanyabibe enchera bagwenerete kobwatia.
Ⅸ Ere nigo akoraa abanto bare abaitongo ase enchera endonge,
naende aborokereria komanya enchera yaye.
Ⅹ Chinchera chionsi chi’ Omonene nigo chire echi’obwanchani, na echi’obwegenwa,
ase abwo barendete okobwatana kwaye na oborori bwaye.
Ⅺ Omonene, ase engencho y’erieta riao
onyabere ogosaria kwane, ekiagera nokonene.
Ⅻ Kera omonto omoirogete Omonene,
eri’Omonene amworokereria enchera agwenerete gochora.
ⅩⅢ Omonto oyio nagenderere gosesenigwa,
na ororeria rwaye ndoire ense.
ⅩⅣ Omonene nigo are omosani bw’abaanto bamoirogete,
nigo akobamanyia okobwatana kwaye kw’ogotianania.
ⅩⅤ Botambe nigo nkoba imorigereretie Omonene,
nere orarusie amagoro aane ase oboreba.
ⅩⅥ Aye omonene, ing’iranere ondorere amaabera,
ekiagera nigo inde inche bweka, naende nchandegete.
ⅩⅦ Omoichano nigo oichire ase enkoro yane,
ndusie ase obokong’u bwane,
ⅩⅧ ndigererie orore obororo bwane na ogochandwa kwane,
na onyabere ebibe biane bionsi.
ⅩⅨ Rora ababisa baane bonsi buna bare abange;
na buna bangechete nobotindi obonge.
ⅩⅩ Renda omoyo one na ontoorie;
naye ngotamera tobaisa gontiga nsookigwe.
ⅩⅪ Tiga obwegenwa na oboronge bindende,
ekiagera naye nsemeretie.
ⅩⅫ Aye Nyasae, booria Abaisraeli
korwa ase emechando yabo yonsi.