ⅩⅩⅩⅤ
Ogosaba gw’okonyora ogokonywa
(Ogoteera gwa Daudi)
Ⅰ Aye Omonene, engereria abanto abwo bakoengererania nainche,
rwania abwo bakondwania!
Ⅱ Bogoria enguba na eng’aya,
imoka onkonye!
Ⅲ Aye orute abanto abwo bakombwatia ritimo na esimisi!
Ontebie ase omoyo one: “Ninche Omotooria oo.”
Ⅳ Abanto abwo bakorigia gosiria obogima bwane,
tiga babugwe na gosookigwa.
Abwo bagokora emeroberio emebe y’okong’ita,
tiga bairanigwe babe nobosooku.
Ⅴ Barabwo tiga babe buna omoiriro okoirurukigwa nomwaga,
na omomalaika Omonene abe okobaiyeria.
Ⅵ Omosunte na oboterere bibe ase enchera bagoetera,
na omomalaika Omonene abe okobabwata abasirie.
Ⅶ Abanto abwo bambekeire oboreba bobisi engencho ende etaiyo,
na bakunyire eirima ng’a basirie obogima bwane.
Ⅷ Ogosirigwa tiga kobanyore mobosokano;
oboreba obwo bantegeire tiga bobabwate barabwo abanyene,
tiga bagwe imeo abanyene na gosirigwa.
Ⅸ Omoyo one nogoke ase Omonene
na gochenga ase engencho y’ogotooreka kwaye.
Ⅹ Amauga onsi ay’omobere one nateebe,
“Aye Omonene, ning’o onga buna aye?
Aye Omonene, nigo ogotooria oyo otari ne chinguru korwa ase oyore ne chinguru komobua,
ee, nigo ogotooria oyo otari ne chinguru naende omoremerwa,
korwa ase oyo okomochanda.”
Ⅺ Birori bi’oborimo nigo bakonyimokera,
bakomboria ase amang’ana ntamanyeti.
Ⅻ Abanto abwo nigo bakong’akana amabe ase amaya,
nerusirie moyo.
ⅩⅢ Ekero abanto abwo barwarete
nigo neboyetie eanga y’okweumia na goichana;
ngechanda ase okweng’ata,
ngasaba nturegete omotwe.
ⅩⅣ Nkabechandera buna nigo barenge abasani baane gose abaminto;
nigo nabegete eanga y’okweumia, nturegete omotwe
buna omonto okweumia ekero ng’ina akuure.
ⅩⅤ Korende ekero narenge ase emechando,
nigo basangererekanete amo bakagoka.
Abanto batagwenerete, aba ntamanyeti
bakaba bagonchecheria batari gotiga.
ⅩⅥ Abatamoirogeti Omonene nigo banchayete na gonchecheria,
bakangecha bakaba bakondiananeria amaino.
ⅩⅦ Omonene, ngoika ririri orabe koyarigereretie rioka?
Intaborie korwa ase ogosiria barobeirie,
tooria obogima bwane korwa ase chindo echio!
ⅩⅧ Erio ninkoiranerie ng’a mbuya mono agwo ase omosangererekano omonene,
ningotogie ase omoganda omonene bw’abaanto.
ⅩⅨ Totiga ababisa baane bagoke igoro yane engencho ende etaiyo;
totiga abwo bangechete bosa bagosimanera amaiso bankore bobe.
ⅩⅩ Abanto abwo tibari gokwana amang’ana akorenta omorembe;
nigo bakona-korigia amang’ana yobong’ainereria
igoro y’abanto abwo bare abatoereru ase ense.
ⅩⅪ Abwo nigo bagwasamia emenwa yabo bateeba:
“Ahaa! Ahaa! Ntwayarora namaiso aito.”
ⅩⅫ Aye Omonene, kwarorire amang’ana ayio, tokirakiri.
Omonene, tobaisa kobeera aare korwa asende!
ⅩⅩⅢ Omonene one, ore Nyasae one, tabobora, oimokerere igoro,
erinde orwanerere oboronge bwane na amang’ana aane.
ⅩⅩⅣ Aye Omonene, Nyasae one,
nacha ekiina kiane koreng’ana noboronge bwao,
tobaisa gotiga ababisa baane bagoke igoro yane.
ⅩⅩⅤ Tobatiga bateebe: “Bono twamonyorire buna twaganetie.”
Tobatiga bateebe: “Bono twamobuire.”
ⅩⅩⅥ Abanto abwo bakogokera emechando yane,
tiga basookigwe na batantanigwe;
abwo bagwetogia igoro yane,
tiga baboigwe obosooku na ogochaywa.
ⅩⅩⅦ Abanto abwo banchete ng’a ng’egwe oboronge bwane,
tiga baake eriogi ri’omogooko na omochengo,
bagenderere goteeba: “Omonene noyo bw’obonene!
Ee, nigo agokirie namaya omosomba oye akonyora!”
ⅩⅩⅧ Erio oromeme rwane ndogenderere koraria oboronge bwao,
na ogotogigwa kwao, omobaso boira.