ⅩⅩⅩⅣ
Okomotogia Nyasae ase obuya bwaye
(Ogoteera gwa Daudi)
Ⅰ Nimbake Omonene chingaki chionsi,
ase omonwa one nimotogie botambe.
Ⅱ Ase omoyo one ninyetogerie Omonene,
abwo bachayire tiga bayaigwe bagoke.
Ⅲ Raria obonene bw’Omonene amo nainche
totogie erieta riaye twensi amo.
Ⅳ Nkarangeria Omonene, nere akang’iraneria,
akandusia korwa ase obwoba bwane bwonsi.
Ⅴ Abwo bamorigereretie nigo bakomeka‐meka bare nomogooko,
gose amasio abo takororekana are nobosooku.
Ⅵ Omonto omotaka nigo akorera, n’Omonene omoigwa,
omotooria korwa ase emechando yaye yonsi.
Ⅶ Omomalaika Omonene nigo akorenda na goetanana abwo bamoirogete Omonene na kobatooria.
Ⅷ Moteeme Omonene, morore ng’a nomuya.
Nasesenirie omonto oria omotameire.
Ⅸ Moiroke Omonene, inwe abachenu baye,
naki abwo bamoirogete tibakoremerwa kende.
Ⅹ Chindo chinsae nachinyare koremerwa na koba nenchara,
korende abwo bakomorigia Omonene tibakoremerwa kende gionsi kere ekiya.
Ⅺ Abana baane, inchwo montegerere,
mborokererie buna moramoiroke Omonene.
Ⅻ Inee! Aye nomonto bwanchete obogima?
Oganetie obe moyo amatuko amange, na korora amaya?
ⅩⅢ Rirorio tanga oromeme rwao tirokwana amabe,
na ebikoba biao tibikwana obong’ainereria.
ⅩⅣ Otige amabe, okore amaya;
origie omorembe na koyobwata mono.
ⅩⅤ Amaiso a Omonene nigo arigereretie abanyene oboronge,
na amato aye nigo akoigwa ebirero biabo.
ⅩⅥ Obosio bw’Omonene nigo bore mamincha y’abwo bagokora amabe,
nabasirie korwa ase ense, tibainyorwa.
ⅩⅦ Ekero abanyene oboronge bakorera ng’a bakonywe,
Omonene nigo akobaigwa na kobatooria korwa ase emechando yabo yonsi.
ⅩⅧ Omonene nigo are ang’e nabwo chinkoro chiabo chiabunekire,
nigo akobatooria abwo berusirie moyo.
ⅩⅨ Omonyene oboronge nigo akonyora emechando emenge,
korende Omonene namotoorie korwa ase eyio yonsi;
ⅩⅩ nigo akorenda amauga aye onsi,
rinde tiribunwa nonya nerimo.
ⅩⅪ Obobe nigo boraite omokori amabe,
na abwo bagechete omonyene oboronge nabagaambigwe, banyore egesusuro.
ⅩⅫ Omonene nigo akobooria emioyo y’abasomba baye,
gose onde tari ase abwo bakomotamera orache kogambigwa.