ⅩⅩⅩⅢ
Ogoteera gw’okomotogia Omonene
Ⅰ Inwe abanto abaronge, mochengere Omonene!
Inwe abamore ne chinkoro chindonge goika motogie Omonene!
Ⅱ Moakere Omonene ng’a mbuya mono ase okobugia amakano yebirigisa,
motogie ase okobugia amakano are ne chinga ikomi!
Ⅲ Moteerere ogoteera okoyia,
na kobugia ase eriogi rireng’aine buya na komochengera!
Ⅳ Naki ring’ana ri’Omonene nigo rire boronge,
na ogokora kwaye gwonsi nigo agokora ase obwegenwa.
Ⅴ Ere nigo anchete ayare boronge na ekeene,
na ense nigo eichire nobwanchani bw’Omonene botari koera.
Ⅵ Ase chinguru chi’ering’ana ri’Omonene igoro egatongwa,
na ase okobua kwe ring’ana riaye erioba na omotienyi ne ching’enang’eni bigatongwa.
Ⅶ Igo agosangereria amaache yenyancha, buna amaache are enyongo ime,
obeka chindiba aase abo.
Ⅷ Ense yonsi neiroke Omonene,
na bonsi abamenyete ase ense bamwoboe.
Ⅸ Naki ere agakwana, na ayio agakoreka;
agachiika, na ayio akabao.
Ⅹ Omonene nigo akoonchorana emeroberio y’abanto b’ebisaku,
na gosaria okogamba kwa Mwanyabaanto kwaba bosa.
Ⅺ Okogamba kw’Omonene nigo goteneine kare na kare;
emeroberio yaye nigo egendererete ebiaare ase ebiaare.
Ⅻ Ngesesenirie egesaku eke Omonene are Nyasae obo,
abanto aba achorete babe omwando oye.
ⅩⅢ Omonene nigo arigereretie korwa igoro,
orooche Mwanyabaanto bonsi.
ⅩⅣ Korwa agwo ase aikaransete,
nigo akobagambera bonsi abamenyete ase ense.
ⅩⅤ Nere otongete chinkoro chi’abaanto bonsi,
namanyete korenga ogokora kwabo gwonsi.
ⅩⅥ Omorwoti tari orabue nomoganda oye omonene Nyasae bw’abarwani,
gose etuoni teri eratoorigwe ne chinguru chiaye chinyinge.
ⅩⅦ Gosemeria chibarasi chi’esegi, ayio mbosa,
tichikonyara kobua,
chinguru chiabo chinyinge tichigotooria omonto.
ⅩⅧ Rora amaiso a Omonene nigo abarigereretie abwo bamoirogete,
abwo basemeretie obwanchani bwaye botari koera.
ⅩⅨ Omonene natoorie emioyo yabo korwa ase amakweri,
tibakwa ekero gi’enchara.
ⅩⅩ Emioyo yaito nigo emoganyete Omonene,
ere nere ogokonywa gwaito, na enguba yaito.
ⅩⅪ Ee, chinkoro chiaito nchimogokerete,
ekiagera tosemeretie erieta riaye richenu.
ⅩⅫ Omonene, obwanchani bwao botari koera bobe amo naintwe,
ekiagera naye togosemeretie.