ⅩⅩⅩⅦ
Omoerio bw’abaanto abakori amabe na oyo bw’abaanto abaya
(Ogoteera gwa Daudi)
Ⅰ Togechigwa ase engencho y’abakori amabe,
toba ne ribero ase abakori amabe.
Ⅱ Barabwo mbasirigwe bwango, basire buna obonyansi
basusane buna ebimeri ebibese.
Ⅲ Mosemerie Omonene okore ayare amaya,
erio nario oramenye ase ense, obe korendire buya.
Ⅳ Goka ase Omonene,
ere nakoe okogania gw’enkoro yao.
Ⅴ Erue ase Omonene
mosemerie ere bweka, nere naoboseemia.
Ⅵ Omonene naorokie oboronge bwao buna akoorokia oborabu,
na ekeene kiao buna amasase a mobaso gati.
Ⅶ Obe n’obotoereru ase obosio bw’Omonene,
omoganye noboremereria.
Togechigwa nomonto okogenderera buya ase enchera yaye,
omonto oyio okoroberia ogosaria.
Ⅷ Bwetange korwa ase endamwamu, tiga ekeririanda kegima.
Togechigwa; okogechigwa nigo koragere okore ebibe.
Ⅸ Abanyabibe mbasirigwe kegima,
korende abamoganyete Omonene mbaire ense ebe omwando obo.
Ⅹ Netigarete engaki ensinini, na omokori amabe asirigwe;
nobe gokorigereria mono aase aye, takonyorekana oreo.
Ⅺ Abaitongo mbaire ense ebe omwando obo,
na barabwo mbagoke na goisaneka ase obonge bw’omorembe.
Ⅻ Omokori amabe nigo agokora omooroberio bw’ogoita oyore omooronge,
na komoriananeria amaino.
ⅩⅢ Omonene nasekerere omokori amabe,
ekiagera aroche ng’a rituko ri’ogosirigwa kwaye ndichiche.
ⅩⅣ Abakori amabe nigo bagosomora emeyio yabo na batinga amata abo,
erinde baite abanto abataka na abaremeire,
baite na abakobwatia chinchera chi’oboronge.
ⅩⅤ Emeyio yabo nebete chinkoro chiabo abanyene,
na amata abo nabunwe.
ⅩⅥ Ebinto ebike omonto omonyaboronge abwate,
nigo bire ebiya kobua ebinge biria abakori amabe abange babwate.
ⅩⅦ Abakori amabe mbaurwe chinguru echi babwate,
korende Omonene nagenderere koa abanyaboronge chinguru.
ⅩⅧ Omonene nigo amanyete amatuko ya abamoirogete,
na omwando obo nogenderere kobao kare na kare.
ⅩⅨ Barabwo tibari gosookigwa ase chingaki chi’amabe,
ase chingaki chi’enchara nigo bakoigota.
ⅩⅩ Korende abakori amabe mbasirigwe;
ababisa ba Omonene nigo bare buna obuya bw’ebisicha,
nigo barasire, ee, mbasire buna erioki rigosira kegima.
ⅩⅪ Omokori amabe nigo akoira egento singo tagokeirania,
korende omonto omooronge nigo are namaabera na korua ebiegwa,
ⅩⅫ Abanto abw’Omonene asesenirie mbaire ense ebe eyabo,
korende abwo aragereirie mbasirigwe kegima.
ⅩⅩⅢ Omonene nigo akobeka orogendo rw’omonto omooronge chinguru,
na kogokigwa nabarabwo.
ⅩⅩⅣ Omonto oyio naisa kogochwa, takogwa inse,
ekiagera Omonene namobwatete okoboko kwaye.
ⅩⅩⅤ Nigo narenge omwana, bono nagotire,
korende tinana-korora omonto omooronge ogotigwa bosa,
gose abana baye bakoborwa endagera.
ⅩⅩⅥ Omonto oyio nigo akogenderera kona-korua ebiegwa na korua singo,
abana baye nigo barasesenigwe.
ⅩⅩⅦ Tiga gokora amabe, kora ayare amaya,
igo nario orachie kare.
ⅩⅩⅧ Omonene nigo anchete oboronge;
tagotiga abachenu baye.
Barabwo mbarendwe goika kare na kare,
korende ororeria rw’abakori amabe ndosirigwe kegima.
ⅩⅩⅨ Abanyene oboronge mbaire ense ebe eyabo,
erio bagenderere komenyao botambe.
ⅩⅩⅩ Omonwa bw’omonto omooronge nigo agokwana amang’ana yobong’aini,
na oromeme rwaye nigo rogosokia ay’ekeene.
ⅩⅩⅪ Amachiiko a Nyasae oye nigo abeerete ase enkoro y’omonto oyio;
ase agoeta tari gotererigwa.
ⅩⅩⅫ Omokori amabe nigo agotengera omonto omooronge,
erio origia chinchera chi’okomoita.
ⅩⅩⅩⅢ Omonene tagotiga omonto omooronge ase okobua kw’omokori
amabe, gose takomotiga abugwe ekero asoeirwe ase ekegambero.
ⅩⅩⅩⅣ Gany’Omonene na obwatie enchera yaye,
nere nakoimokererie igoro akoe ense ebe eyao;
erio norigererie orore buna abanyabibe bagosirigwa.
ⅩⅩⅩⅤ Narorire omokori amabe otindire ase obomwenu,
akaba okoranda buna emecharake egokina ase amaroba amatobu.
ⅩⅩⅩⅥ Magega y’amatuko amake ngaetera aase agwo, korende tarengeo,
nkamorigia, korende tinamonyora aande.
ⅩⅩⅩⅦ Rigereria omonto omoikeranu, ee, origererie omonto ore nenkoro endonge,
norore ng’a omonto ogokora omorembe nere orachie kare.
ⅩⅩⅩⅧ Korende abasaria mbasirigwe bonsi pi,
na ororeria rw’abakori amabe tirokogenderera.
ⅩⅩⅩⅨ Ogotooreka kw’abanyaboronge nigo gokorwa ase Omonene,
ere nere obotamero bwabo ase chingaki chi’emechando.
ⅩⅬ Omonene nigo akobakonya na kobatooria;
nigo akobarusia korwa ase abakori amabe, obatooria,
ekiagera bakomotamera.