ⅩⅩⅩⅧ
Ogosaba kw’omonto obwate emechando
(Ogoteera gwa Daudi)
Ⅰ Omonene, tontogonyera ekero ore nendamwamu,
tong’a egesusuro gi’okondongeyia ekero ore nekeririanda.
Ⅱ Kwandasire emegwe yao yasoeire ime yane,
kwanyiyeirie inse nokoboko kwao.
Ⅲ Ase engencho y’ekeririanda kiao omobere one bwensi orwarire,
nase engencho y’ebibe biane amauga aane nigo akonyatia.
Ⅳ Ebibe biane biantubire nonya nomotwe bwonsi,
bianditoeire na kombua.
Ⅴ Amaote aane agundire atiokire bobe
ase engencho y’oboriri bwane.
Ⅵ Igo ng’umaime na koumata,
nigo ingendererete korera na goichana omobaso boira.
Ⅶ Chibachwa chiane nigo chikoyia buna omorero,
omobere one bwonsi orwarire.
Ⅷ Chinguru chiane chionsi chiaerire, nasenyentekire,
nigo nkona‐kweumia ase engencho y’obororo bw’enkoro yane.
Ⅸ Omonene, aye nigo omanyete okogania kwane gwonsi,
na ogochandeka kwane tikobisekaneti asore.
Ⅹ Enkoro yane nigo egotiesana, chinguru chiang’ereire;
amaiso aane asoirwe orotutu, tindi korora.
Ⅺ Abanchi na abasani baane babeereire aare korwa ase amaakwa aane,
na abanto baminto boigo bambeereire aare.
Ⅻ Abanto abwo baganetie gosiria obogima bwane bantegeire oboreba;
na abwo baganetie gonkora bobe nigo bagokwana amang’ana
’ogosirigwa kwane,
bakorengereria amang’ana yobong’ainereria omobaso boira.
ⅩⅢ Korende inche nabeire buna omotino, tindi koigwa,
nabeire buna omonto rimama, tindi gokwana.
ⅩⅣ Ee, inche nabeire buna omonto otari koigwa,
buna oyo omonwa oye otabwati amang’ana okoiraneria.
ⅩⅤ Korende Omonene, naye nsemereretie.
Omonene, Nyasae one, naye oranyare koiraneria.
ⅩⅥ Nigo nkogosaba ng’a ababisa baane tibagokera emechando yane;
na tibetogeria okogwa kwane.
ⅩⅦ Inche nabeereire ang’e kogwa,
na obororo bwane nigo bogendererete kobeera asende.
ⅩⅧ Bono nigo nkoorokia ogosaria kwane,
neitirie ase engencho y’ebibe biane.
ⅩⅨ Ababisa baane nigo bare abagima, naende bare ne chinguru,
abwo bangechete bosa nabange bare.
ⅩⅩ Abwo bagoakana amabe ase amaya
nigo babeire ababisa baane, ekiagera ngokora ayare amaya.
ⅩⅪ Omonene, tontiga!
Aye Nyasae one, tobaisa kombeera aare!
ⅩⅫ Aye Omonene ore ogotooreka kwane, ayerera onkonye!