ⅩⅩⅩⅨ
Ogosaba kw’omonto ochandegete
(Ogoteera gwa Daudi)
Ⅰ Ngateeba: “Nindende orogendo rwane,
timbaisa gokora ebibe ekero ngokwana.
Nimbeke omonwa one ekeokio
ekero abakori amabe bare ase obosio bwane.”
Ⅱ Igo narenge nkirete‐kiri, tinare gokwana,
tinaba na koremigwa konde,
obororo bwane bokamenteka mono,
Ⅲ enkoro yane ekaba ekoyia omorero ime yane.
Ekero naare ndengereretie aya, omorero ogoka,
tinare konyara gwetanga ogokwana kwane.
Ⅳ Omonene, imanyie omoerio bw’amatuko aane,
na ekerengo ki’amatuko aane naki keng’ana,
erinde imanye ng’a obogima bwane nobweng’e.
Ⅴ Naama! Amatuko kwang’ete nameng’e mono.
Engaki y’obogima bwane nigo ere buna teri gento ase obosio bwao.
Amaene, kera omonto, nonya bwetenenerete bokong’u,
nigo agoeta bwango buna omwaga.
Ⅵ Amaene, Mwanyabaanto nigo agotaara ore buna omogwekano okorora ase okorota;
nigo agwechanda bosa;
asangereria enibo, korende tamanyeti gose ning’o orache koyeria.
Ⅶ Nabono aye Omonene, inki nganyete?
Naye bweka nsemeretie.
Ⅷ Ntoorie korwa ase ogosaria kwane,
tontiga nsekererwe noyio ore omoriri.
Ⅸ Nigo nkirete‐kiri, tindi komumora omonwa one,
ekiagera aye naye gwakorete ayio.
Ⅹ Rusia egesusuro kiao asende;
naerire ase ogoakwa gw’okoboko kwao.
Ⅺ Ekero okorongeyia omonto ase okomotogonyera ase engencho y’ebibe,
nigo ogosiria obonene bwaye, koreng’ana buna ebigwankwa bikoria chianga.
Amaene, Mwanyabaanto nigo anga buna omwaga.
Ⅻ Aye Omonene, igwa ogosaba kwane, otegerere okorera kwane;
tokira‐kiri ekero nkoiyeria amariga,
ekiagera inche nomogeni oo inde,
na omoeti buna chisokoro chiane chiarenge.
ⅩⅢ Intige, inyore chinguru chinyia ntararua ase ense, na ntabeo naende.