ⅩⅬ
Ogoteera gw’okomotogia Nyasae
(Ogoteera gwa Daudi)
Ⅰ Nkaba imoganyete Omonene ase okoremereria,
na ere akanyeonchorera akaigwa ekerero kiane.
Ⅱ Ere akandusia korwa ase engoro y’obosareku,
korwa ase etintira na esike;
agatenenia amagoro aane ase egetare igoro,
agankong’ia ase ngoeta.
Ⅲ Akanyorokereria oteera ogoteera okoyia,
ogoteera gw’okomotogia Nyasae oito.
Abange nabayarore na koiroka,
na igo mbamosemerie Omonene.
Ⅳ Nasesenirie omonto oria omosemeretie Omonene,
otari kweonchora gochia ase abanto abaenenu,
gose ase abwo bagosira ase okoonchokera chinyasae chi’oborimo.
Ⅴ Aye Omonene, Nyasae one,
ogokora kwao na ebirengererio biao ase tore nebi’ogokumia;
onde tari orareng’anigwe naye.
Ninganetie koraria ayio na koyakwana,
korende namange mono, takobareka.
Ⅵ Ebing’wanso na ebiruegwa tobiganeti,
korende amato aane kwayatinoire.
Ebing’wanso bi’ogosambwa, na ebi’ebibe tobiganeti.
Ⅶ Erio ngateeba: “Rigereria, nachire;
ase egetabu nigo eriikire aya ngwenerete gokora.
Ⅷ Aye Nyasae one, ninganetie nkore ogwancha kwao,
amachiiko ao nigo are ase enkoro yane ime.”
Ⅸ Ase omosangererekano omonene narandirie amang’ana amaya ay’oboronge;
aye Omonene, nomanyete ng’a tingotanga ebikoba biane tibiyakwana.
Ⅹ Tinyegachereti inche bweka oboronge bwao ase enkoro yane ime;
korende nararirie obwegenwa bwao, na ogotooreka kwao.
Timbiseti obuya bwao, na obwegenwa bwao,
korwa ase omosangererekano omonene.
Ⅺ Aye Omonene, tondina amaabera ao!
Obuya na obwegenwa bwao bindende botambe.
Ogosaba gw’okonyora ooboseemiaka
(Zab 70)
Ⅻ Amabe amange atari kobareka nigo ang’etanaine.
Ebibe biane biambuire, goika tinkonyara korora;
biabeire ebinge kobua etukia y’omotwe one, goika nerusirie moyo.
ⅩⅢ Omonene, koranche ontoorie!
Omonene, oche bwango onkonye!
ⅩⅣ Abwo bonsi barigetie kong’ita,
tiga basookigwe na batantanigwe bonsi amo,
na abwo baganetie obobe bonyore,
tiga bairanigwe magega barore obosooku.
ⅩⅤ Abwo bagonsiereria bagoteeba: “Kiamonyorire!”
Tiga bakirigwe‐kiri ase obosooku bwabo.
ⅩⅥ Korende abwo bonsi bagokorigia,
tiga bakogokere na kogochengera;
abwo banchete ogotooreka kwao bateebe botambe,
“Omonene nigo are omonene!”
ⅩⅦ Inche nigo inde omotaka na omoremerwa,
korende Omonene nigo akonyechandera.
Naye ore ogokonywa kwane, na ogotooreka kwane.
Aye Nyasae one, totebana!