Ⅳ
Ogosaba kwa mogoroba ase okonyora ogokonywa
(Ogoteera gwa Daudi)
Ⅰ Aye Nyasae, aye okong’a oboronge,
ong’iranerie ekero ngokorangeria!
Ekero narenge nkomiga‐migwa nobokong’u nigo kwang’ete ribaga rigare.
Indorera amaabera, na oigwe ogosaba kwane!
Ⅱ Inwe Mwanyabaanto,
ngoika ririri moragenderere korenta emechando na kobeka echayo ase obonene bwane?
Ngoika ririri moragenderere gwancha amang’ana abosa
na korigia ay’oborimo?
Ⅲ Korende manya ng’a Omonene bwechoreire omonyene oboronge.
Omonene nigo akonyigwa ekero nkomosaba.
Ⅳ Nabo morabee, korende timobaisa gokora ebibe;
morengereria mono kegima amang’ana ayio ime ye chinkoro chiano ekero mokorara ase amarere aino,
na mobe abatoereru.
Ⅴ Karue ebing’wanso bi’oboronge,
na mosemerie Omonene.
Ⅵ Abanto abange bagokwana iga:
“Naki yare koba buya onye ’ntwanyora ayare amaya.”
Aye Omonene, tiga omobaso bw’obosio bwao otomorekere.
Ⅶ Kwang’eire omogooko ase enkoro yane ime
ore omuya kobua oyo abanto bande bakonyora,
abwo bare nobonge bw’endagera na edivai.
Ⅷ Ekero ngochia gwetoora koraara,
nigo nkorara chitoro inde nomorembe,
ekiagera aye Omonene naye okogera imenye ase okorendwa okuya.