Ⅴ
Ogosaba gw’okonyora oborendi
(Ogoteera gwa Daudi)
Ⅰ Aye Omonene, tegerera oigwe amang’ana aane;
oiraneria egekoe kiane.
Ⅱ Aye omorwoti one, aye Nyasae one,
tegerera oigwe amang’ana ’okorera kwane,
ekiagera naye ngosaba.
Ⅲ Omonene, aye nigo okoigwa ogosaba kwane maambia;
kobogokiamoka nigo nkobeka okogania kwane obosio bwao,
erio naganya ntegesetie.
Ⅳ Aye tori Nyasae bwanchete ogokora okobe.
Oyogokora ebibe takonyara komenya amo naye.
Ⅴ Abanto abaenenu tibakonyara gotenena obosio bwao,
nigo ogechete abakori amabe bonsi.
Ⅵ Aye nigo orasirie abanyaborimo bonsi;
aye Omonene nigo ogechete abaiteri amanyinga na abang’ainereria.
Ⅶ Korende ase engencho y’obonge bw’obwanchani bwao botari koera
ninsoe nyomba mwao;
nigo ndasasime ndigereretie Hekalu yao Enchenu na
nimbe ngokoiroka.
Ⅷ Aye Omonene, nigo mbwate ababisa abange,
ase ayio, ondaae ase oboronge bwao; roisia enchera yao ase ngoetera ebe endonge.
Ⅸ Amang’ana ababisa baane bagokwana nay’oborimo,
chinkoro chiabo nigo chire nemeroberio y’ogosiria kegima;
emioyo yabo noboina bwasie,
chimeme chiabo nigo chigokwana amang’ana amansu ay’ogosiria.
Ⅹ Aye Nyasae, obae egesusuro ase ebibe biabo:
emeroberio eyio bakorire tiga egere bagwe.
Obaserie kegima, ekiagera basaririe asore,
na ekiagera bangire gokoigwera.
Ⅺ Abanto bonsi abakogotamera mbabe nomogooko,
barabwo mbatere kogenderera botambe na gochenga.
Aye igo orakengere abwo banchete erieta riao,
erio banyare koba nomogooko omonene ase engencho yao.
Ⅻ Aye Omonene nigo ogosesenia omonyene oboronge
na komotuba n’obuya bwao bw’amaabera buna enguba.