EGETABU GIA KABERE
ⅩⅬⅡ
Ogosaba kw’omwoswa ore namaiga ase Enyomba y’Omonene
(Ogoteera kwa basinto ba Kora)
Ⅰ Buna koreng’ana engabi ekogania amaache a rooche,
naboigo omoyo one okoganetie aye Nyasae.
Ⅱ Omoyo one nigo ore nerang’o asore aye Nyasae ore moyo.
Ndiriri ndachiche ndore obosio bwao, aye Nyasae?
Ⅲ Omobaso na obotuko nigo nkorera, na amariga abeire endagera yane;
botambe abanto nigo bakomboria: “Nyasae oo ng’ai are?”
Ⅳ Nigo nkoumora ayare ase omoyo one ime, ekero nkoinyora amang’ana aetire,
buna narenge kogenda amo nomoganda bw’abaanto gochia ase enyomba ya Nyasae,
nkaba ngotera nomogooko neriogi rinene na koiraneria ng’a mbuya mono
amo nabwo barenge koinyora na korenda Rituko Rinene.
Ⅴ Aye omoyo one, nase ki kwabeire nomoichano?
Nase ki otari n’obotoereru?
Semeria Nyasae!
Igo ninyare komotogia naende
ase ogotooreka gokorwa ase obosio bwaye.
Ⅵ Nyasae one, enkoro yane yabeire nomoichano,
ase ayio, nakoinyoire ekero inde ase ense ya Yorodani,
na ase egetunwa kia Herimoni na ekia Misari.
Ⅶ Endiba y’amaache nigo ekorangeria endiba ende,
ekero amaache ’ebieera akoeera;
chiooro chiao chionsi na emerindo yao biantubire.
Ⅷ Ase omobaso Omonene nigo akong’a obwanchani bwaye botari koera,
na ase obotuko nigo nkomotogia namatera
na gosaba Nyasae oyore obogima bwane.
Ⅸ Nigo ngotebia Nyasae ore egetare kiane,
“Nase ki aye kwanyebire?
Nase ki ngendererete korera
ngochandwa nababisa baane?”
Ⅹ Ekero ababisa baane bagonchecheria,
nigo nkoigwa buna amauga aane akonyatia.
Nigo bagendererete kona‐komboria,
“Nyasae oo, ng’ai are?”
Ⅺ Aye omoyo one, nase ki kwabeire nomoichano omonene?
Nase ki otari n’obotoereru?
Semeria Nyasae!
Igo ninyare komotogia naende
ere oyore ogotooreka kwane, na Nyasae one.