ⅩⅬⅧ
Sayoni, omochie o Nyasae
(Ogoteera kwa basinto ba Kora)
Ⅰ Omonene nigo are omonene mono, goika atogigwe;
ere goika atogigwe agwo ase omochie o Nyasae oito,
ase egetunwa kiaye egechenu.
Ⅱ Sayoni, egetunwa kia Nyasae egeseera, keimokererete igoro agwo sugusu,
nigo kere omogooko bw’ense engima;
omochie oyio noyo bw’omorwoti omonene.
Ⅲ Agwo ase chiburi chi’omochie oyio,
Nyasae bweorokirie ng’a nere obotamero bw’ogwekengera.
Ⅳ Rora, abarwoti nigo basangererekanete,
bagacha amo.
Ⅴ Ekero baroche omochie oria, nigo bakumetie,
bakaondoka, bagatama.
Ⅵ Bagasogwa nobwoba, bakaiguswa,
bagaichana na koba nobororo buna obw’omokuungu okobina aibore.
Ⅶ Nigo kwababunete buna chimeeri chia Tarisisi nomwaga okogusa korwa moocha.
Ⅷ Amang’ana twaigwete,
bono twayarorire agwo ase omochie Omonene bw’Emeganda,
omochie o Nyasae oito.
Nyasae nigo ayorendete na koyokong’ia goika kare na kare.
Ⅸ Nyasae, ekero tore ase Hekalu yao ime,
nigo tokorengereria igoro y’obwanchani bwao bogendererete botambe.
Ⅹ Nyasae, buna koreng’ana erieta riao rikumete,
naboigo nogotogigwa kwao gokumete goikera chinsinyo chi’ense.
Okoboko kwao gw’okorio nigo goichire noboronge.
Ⅺ Tiga abanto b’egetunwa gia Sayoni bagoke;
boigo nab’emechie y’Abayuda,
ekiagera aye nigo okonacha ebiina bia boronge.
Ⅻ Taara moetanane Sayoni,
mobare emerobiri yaye.
ⅩⅢ Rigereria chindwaki chiaye,
eta motaare ime ase chiburi chiaye;
erio nario morache goteebia ebigori bigochi-gocha:
ⅩⅣ “Omonene oyo nere Nyasae oito o kare na kare.
Ere nabe omoraai oito kogenderera botambe.”