Ⅼ
Ogosasiima gw’ekeene
(Ogoteera gw’Asafu)
Ⅰ Nyasae omonguru, Nyasae Omonene, nigo agokwana,
nigo agokwana na korangeria ense yonsi
korwa moocha goika bosongo.
Ⅱ Korwa Sayoni, omochie omoikeranu bw’oboseera,
Nyasae omorekire korwao.
Ⅲ Nyasae oito ngocha are, tagokirakiri;
omorero okoria nigo otang’aine bosio bwaye,
omwaga omotindi nigo omoetanaine.
Ⅳ Ere nigo akorangeria igoro na ense chibe birori,
ekero akonachera abanto baye ekiina, ogoteeba:
Ⅴ “Sangereria abanto baane abegenwa bache asende,
abwo bakorete okobwatana kw’ogotianania nainche ase okorua ebing’wanso.”
Ⅵ Igoro nigo chikoraria oboronge bwa Nyasae;
Nyasae omonyene nere omonachi ebiina.
Ⅶ “Inwe abanto baane, tegerera moigwe, inche nkwane!
Inwe Abaisraeli, inche nimbe nkorua oborori bore mamincha yaino.
Inche Nyasae inde Nyasae oino.
Ⅷ Tinkobatogonyera ase engencho y’ebing’wanso biaino;
ebing’wanso biaino bi’ogosambwa nigo bire ase obosio bwane botambe.
Ⅸ Tingwanchera chieri chikorwa ase ameeri aino,
gose chigoree chikorwa ase amaicho aino;
Ⅹ ekiagera ching’iti chionsi chi’orosana nechiane,
ne chiombe chilifu chire ase ebigoro nechiane.
Ⅺ Nimanyete chinyoni chionsi chire ase ebitunwa,
ne ching’iti chinde chionsi chikonagoetanana ase ense nechiane.
Ⅻ “Onye narenge nenchara, tinare kogotebia,
ekiagera ense, na ebinto bionsi bireo nebiane.
ⅩⅢ Inee! Inche ne chinyama chie chieri nkoria?
Gose namanyinga e chimbori nkonywa?
ⅩⅣ Aye omoruere Nyasae ekeng’wanso gi’okoiraneria ng’a mbuya mono,
naende ikerania ase Oyore Igoro Mono chiira kwamorierete.
ⅩⅤ Ndangerie ase engaki y’emechando;
inche ninoboseemia, naye nontogie.”
ⅩⅥ Korende Nyasae nigo agotebia omokori amabe,
“Naye mboronge ki obwate okonagwatora amachiiko aane?
Gose kona‐gokwana‐kwana okobwatana kwane kw’ogotianania?
ⅩⅦ Aye nigo ogechete amorokererio ay’okorongeyia,
gwatugutire amang’ana aane gochia magega.
ⅩⅧ Ekero okorora omoibi, nigo ogwancherana nere,
boigo nigo okobwatana nabatomani.
ⅩⅨ “Omonwa oo nigo ore omwango gokwana amang’ana ’obobe,
na oromeme rwao nigo romanyete koroisia amang’ana ’obong’ainereria.
ⅩⅩ Aye nigo ogoikaransa na konakogamba abanto bamino bobe;
nigo okona‐kong’acha oyomino morwete enda eyemo.
ⅩⅪ Kwabeire gokona‐gokora ayio, nainche nkirete‐kiri,
nigo okagete ng’a inche nigo inde buna aye.
Korende bono nkogotogonyera nde na kobeka ayio ase obosio bwao.
ⅩⅫ “Inwe aba mwanyebire inche Nyasae, rengereria amang’ana aya mono;
onye taibo, nimbaake mbatandorane,
na monto onde tari orabatoorie.
ⅩⅩⅢ Onde bwensi okong’iraneria ng’a mbuya mono,
okwo nakwo ekeng’wanso ki’ogonsika,
na onde bwensi okobwatia chinchera chi’oboronge,
oyio nimorentere ogotooreka kwane inche Nyasae.”