ⅬⅨ
Ogosaba gw’okonyora oborendi bwa Nyasae
(Ogoteera gwa Daudi ekero Saulo atomete abanto bamoite)
Ⅰ Aye Nyasae one, ntoorie korwa ase ababisa baane,
indende korwa ase abanto aba banyimokeire gonkora bobe.
Ⅱ Nkonye korwa ase abakori amabe;
ntoorie korwa ase abaiteri amanyinga.
Ⅲ Rora, abanto aba bebisete na komboera bang’ite,
abanto abatindi basangererekanire amo bankore bobe;
Omonene, ayio tari ase engencho y’ogosaria gose ebibe nakorire.
Ⅳ Tindakora bobe bonde bokogera baminyoke gocha gonkora bobe.
Omonene imoka, orore amang’ana ayio, onkonye!
Ⅴ Aye Omonene, Nyasae bw’Emeganda, naye Nyasae bw’Abaisraeli!
Imoka, orue egesusuro ase abanto b’ebisaku bionsi,
tobaisa gotigaria nonya noyomo ore moyo
ase abwo bagokora amabe ase obong’ainereria.
Ⅵ Kera omogoroba nigo bakoirana,
baetanana omochie, bakoga buna chisese.
Ⅶ Oise kobarigereria, orore buna bakona‐gokwana‐kwana!
Ebikoba biabo nigo bire buna emioro emioge,
bateba: “Ning’o oranyare gotoigwa?”
Ⅷ Korende aye Omonene nigo okobasekerera,
aye nigo ogochecheria abanto bonsi batakomanyeti.
Ⅸ Aye Nyasae ore chinguru chiane, nimbe nkoganyete,
ekiagera naye ore obotamero obokong’u.
Ⅹ Nyasae one nigo agonchichera nobwanchani bwaye botari koera,
Nyasae one nankore nchenge igoro y’ababisa baane.
Ⅺ Aye Omonene, enguba yaito, tobaisa kobaita!
Abanto baane nigo barabaise kweba.
Obaomboganie ase chinguru chiao,
erio omanye kobasiria.
Ⅻ Ebibe nigo bire ase emenwa yabo,
na amang’ana bagokwana namabe.
Ase igo, tiga oboenenu bwabo bobabwate buna oboreba bokobwata.
Barabwo nigo bakoragereria na gokwana amang’ana ’oborimo.
ⅩⅢ Ase ayio, obasirie nendamwamu yao;
basirie kegima, onde tanyorekana ore moyo nonya noyomo,
erio abanto b’ense yonsi mbamanye
ng’a Nyasae nere okogambera abanto ba Yakobo.
ⅩⅣ Kera omogoroba nigo bakoirana,
baetanana omochie, bakoga buna chisese.
ⅩⅤ Nigo bakoong’anya korigia endagera,
batayenyoreti nigo bakogeesa bokia.
ⅩⅥ Korende inche nintere igoro y’okobua kwao,
kera emambia nintere neriogi rinene
igoro y’obwanchani bwao bogendererete botambe,
ekiagera ase chingaki chi’emechando
nigo kwabeire egekengero kiane na obotamero bwane.
ⅩⅦ Aye Nyasae ore chinguru chiane, nintere ogoteera gw’okogotogia;
aye naye egekengero kiane,
aye naye Nyasae onyanchete mono.