ⅬⅩ
Obobui magega y’okobugwa
(Ogoteera gwa Daudi gw’okworokereria, ekero arwanete n’Abaaramu korwa Naharimu na Soba, na Yoabu akairana goita Abaedomu 12,000 ase Riranya ri’Omonyo)
Ⅰ Nyasae, aye gwatwangire na gwatosiareire,
kwabeire kore nendamwamu, toiranerie amaya aito.
Ⅱ Aye gwatengechirie ense na koyetandora;
iraneria naende amatandoku ayio, ekiagera nigo egotengecha mono.
Ⅲ Gwakorire abanto bao babeire nemechando emekong’u;
gwatonyoisirie edivai yatotindirie na gotoong’anyia.
Ⅳ Aye kwaeire abanto abwo bakoirogete ekemanyererio,
kenyare koimokererigwa igoro ase ogotenenera ekeene.
Ⅴ Igo nonyare gotooria abanto abwo gwanchete;
otoe obobui goetera ase okoboko kwao gw’okorio,
oigwe ogosaba gwaito.
Ⅵ Nyasae okwanire korwa ase Obomenyo bwaye Obochenu, ogoteeba,
“Ase omochengo ninyatanane Sekemu,
na ense omweya ya Sukoti inyiate chincherere.
Ⅶ Gileadi neyane, na Manase neyane;
Efraimu nekegogwa kiane gi’ekioma, na Yuda nenyimbo yane y’obogambi.
Ⅷ Moabu negetaabo kiane ngoisabera;
nindute egekoroto kiane igoro ase Edomu,
ning’ake eriogi ri’okobua igoro y’ense y’Abafilisti.”
Ⅸ Ning’o orandaae ansoyie ase omochie ogiteire chindwaki?
Ning’o orantang’ane gochia Edomu?
Ⅹ Aye Nyasae, Inee, ngwatotigire kegima?
Aye tori kogenda amo nabarwani baito b’esegi.
Ⅺ Tokonye torwanie ababisa baito tobabue,
ekiagera ogokonywa kwa Mwanyabaanto mbosa.
Ⅻ Ekero tore amo na Nyasae, inatokore amang’ana amanene,
nere orabue ababisa baito na kobatiringera inse.