Ⅶ
Ogosaba gw’okonyora oboronge
(Ogoteera gwa Daudi)
Ⅰ Omonene one, Nyasae one, naye ngotamera,
intoorie korwa ase abachandi baane, ’nkonye!
Ⅱ Onye taibo, nigo barantaborane bare buna chindo,
’mbankurure gochia aase omonto onde otache gontooria.
Ⅲ Omonene one, Nyasae one, onye nakorire amang’ana aya,
onye nakorire amabe namaboko aane,
Ⅳ onye naakanire omosani one
amabe, gose nasakoire ebinto bi’omobisa one ase engencho ende etaiyo,
Ⅴ rirorio tiga omobisa one ambwatie na kombwata,
erio antiringere inse egere asirie obogima bwane,
erio ansarerie amasikani.
Ⅵ Aye Omonene, imoka kore nendamwamu yao,
imokerera igoro orwanie ekeririanda ki’ababisa baane!
Inchuo onkonye! Aye gwachikiire ekiina.
Ⅶ Abanto b’ebisaku bionsi tiga basangererekane bagoetanane;
obagambere korwa ase ekerogo kiao ki’obonene aaria igoro.
Ⅷ Omonene, naye okogamba na konachera abanto bonsi ekiina.
Aye Omonene, onachere inche ekiina koreng’ana noboronge bwane,
na buna ntari na komocha.
Ⅸ Tiga ebibe bi’abakori amabe biere,
korende omonto omooronge omotenenie bokong’u.
Aye Nyasae omonyene oboronge nigo okorenga chinkoro na emioyo.
Ⅹ Nyasae nere enguba yane,
ere nigo agotooria abare ne chinkoro chindonge.
Ⅺ Nyasae nigo are omogambi omooronge,
na kera rituko nigo akoba nekeririanda ase abakori amabe.
Ⅻ Omonto karaange gweitia, Nyasae natierie omoro oye,
natinge obota bwaye abobeke ang’e.
ⅩⅢ Oroisirie ebirwanero biaye ebiogoita omonto buna oyio,
akore emegwe yaye esambe buna omorero.
ⅩⅣ Omonyabibe nigo aichire nobobe,
nigo are morito, oborito bw’ogosaria na gakoibora oibara oborimo.
ⅩⅤ Omonto oyio nigo agokunya eirima entambe,
korende ogwa ime y’eirima eyio ere omonyene.
ⅩⅥ Emechando yaye nigo ekomoiranera;
na ogokora kwaye okobe kwamogwera ere omonyene.
ⅩⅦ Ning’akere Omonene ng’a mbuya mono ase engencho y’oboronge bwaye;
nimotererie Omonene ogoteera kw’ogotogia erieta riaye, oyore Igoro Mono kegima.