ⅬⅩⅪ
Ogosaba kw’omonto omogotu
Ⅰ Omonene, naye natameire,
tontiga nsookigwe.
Ⅱ Nkonye na onsibore goetera ase oboronge bwao;
ntegerere, ontoorie!
Ⅲ Aye kabe egetare kiane ki’obotamero ase nkogenda botambe,
aye gwanchire gontooria.
Naki aye negetare kiane, na egekengero kiane egekong’u.
Ⅳ Aye Nyasae one, ntoorie korwa ase okoboko kw’omokori amabe,
indusie korwa ase okobua kw’oyo otari omooronge, na oyore omotindi.
Ⅴ Aye Omonene, naye ogosemeria kwane,
nabeire nkwegenete korwa obwana bwane.
Ⅵ Kwabeire gontenenerete korwa ekero ntaraiborwa,
naye kwandusetie korwa ase enda ya baba.
Naye ndabe nkona-gotogia botambe.
Ⅶ Inche nabeire buna egento ki’ogoichanerwa ase abanto abange,
korende aye naye obotamero bwane obokong’u.
Ⅷ Omonwa one noichorigwe nogotogigwa kwao,
na omobaso boira ninkobake.
Ⅸ Tobaisa gonchwara ekero ndabe nagotire,
tontiga ekero chinguru chirabe chiang’ereire.
Ⅹ Ababisa baane nigo bakongamba,
basangererekanire gokora omooroberio bw’ogonsiria,
Ⅺ bateeba: “Nyasae omotigire,
inchwo tomotunye, erinde tomobwate,
onde tari oranyare komotooria.”
Ⅻ Aye Nyasae, tombeera aare,
Nyasae one, inchwo bwango onkonye!
ⅩⅢ Ababisa abwo bakorigia obogima bwane, tiga basookigwe na gosirigwa kegima;
abwo bakorigia gonkora bobe,
tiga bachaywe na gochecherigwa mono.
ⅩⅣ Korende inche nimbe nogosemeria botambe,
na nimbe nkona-kogotogia mono goetania.
ⅩⅤ Nimbe nkoraria ogokora kwao kw’oboronge nomonwa one.
Omobaso boira nimbe nkonagwatora ogotooreka kwao;
okwo kore okonene ntanyare gokorenga.
ⅩⅥ Aye Omonene Nyasae, nimbe nkoraria ogokora kwao okonene,
nimbe nkona-gotogia oboronge bwao,
ee, ningotogie aye bweka.
ⅩⅦ Aye Nyasae, kwabeire gokonyorokereria korwa obwana bwane,
goika reero iga ningenderere konakoraria ogokora kwao kw’ogokumia.
ⅩⅧ Aye Nyasae, tobaisa gonchwara ekero ndabe nagotire, namerire chimbuche chiarabire se,
goika imbe narareirie abanto b’ebiaare bigochi-gocha chinguru chiao, na okobua kwao.
ⅩⅨ Aye Nyasae, oboronge bwao boigete aaria igoro mono.
Aye nigo gwakorete amang’ana amanene mono.
Ee, Nyasae, ning’o ore buna aye?
ⅩⅩ Ekero gwatotigete, nigo twaroche emechando emenge,
korende nonyare gotokora abayia naende;
torusie, ototiirie korwa ase chiirima chire ase ense.
ⅩⅪ Aye omente obonene bwane,
na ondemie naende.
ⅩⅫ Aye Nyasae one, nimbe nkobugia obokano ase okogotogia,
ekiagera aye nigo ore omwegenwa.
Nimbe nkogoterera ase okobugia obokano bw’ebirigisa,
aye Omochenu bw’Abaisraeli.
ⅩⅩⅢ Ning’ake eriogi rinene ri’omogooko nomonwa one,
ekero ndabe ngotera amatera akogotogia.
Nintere nomoyo one boigo, ekiagera aye gwantooririe.
ⅩⅩⅣ Omobaso boira oromeme rwane ndobe rokona-gokwana igoro y’oboronge bwao,
erinde abwo barigetie gonkora bobe basookigwe na gochaywa.